韓國社會建基於儒家思想, 所以對傳統野有時比香港更傳統, 而且對禮呢家野都做都好足。 韓國公司逄中秋同農曆新年都會送禮盒或者現金比員工, 我返工後第一次收到韓國嘅節日禮盒。如果有係韓國大時大節時行過韓國各大市場及便利店, 應該會見過節日禮盒, 不外乎罐頭、生果、食用油、日常用品等……價格有平有貴, 但貴嘅就會貴得離譜, 誇張到10個大蘋果要成幾千, 唔知係頂級品質, 定送面子。 我公司送嘅係20罐吞拿魚罐頭, 其實我應該係要好知足, 有禮物好過冇禮物, 而且公司冇義務一定要送。20罐頭放晒係禮盒入面, 有送禮感覺, 但當我完全拎晒出黎, 我就覺得好似災難食用品, 走難時用。 我本人對韓國吞拿魚罐頭好一般, 所以呢20罐都係益晒家果位韓國人。我真心覺得比錢好過比禮盒, 20罐頭, 加埋過度嘅包裝, 個重量真係唔講得笑, 由公司拎返屋企, 地鐵又人多, 簡直係大工程, 如果比錢就輕鬆多了。 香港公司新年會有團拜或開工利是嘅習俗; 但韓國呢邊就完全唔會, 利是都唔興周圍派, 派都只係比近親(叫做歲錢), 同埋係用白色利是封, 同香港紅色好唔同。韓國白色係有著純潔、太陽嘅意思, 就如太極旗白色部份, 所以韓國基本上咩鬼節日、祭祀、喜慶都會見到白信封。有時我真係收唔落、比唔出, 完全交比韓國人去做, 雖則住韓國要尊重佢地傳統, 但自己嘅傳統都唔可以放棄。