懷舊玩具萬歲, 童年味道萬歲, 那些年萬歲萬歲萬萬歲! 正職做櫥窗設計的「阿偉」,與小學同學「Sam」合作萬歲, 過去三個月, 不停走訪全港九車仔麵檔, 拜師學藝「我本來乜都唔識煮,阿Sam就好叻, 我就E三個月苦練囉 」 原來是設計達人, 難怪一間小小的車仔麵檔, 有霓虹招牌, 又扭蛋機, 仲有綠寶, 紅白機, 更有抽啷啷…(全部都係我小學雞時代的東西) 自小愛飲綠寶的阿偉指,「綠寶香港停產都有3年, E家泰國入貨, 計埋運費, 成本都要$9.7, 我哋跟餐賣$10, 講真就真係白做, 但我想要返舊時嘅情懷, 無辦法喇!」 「萬歲」兩位老闆開業前, 做盡準備功夫, 將全港最好味小食共冶一爐, 酸齋-是阿偉每朝必定要駕車入元朗粉麵廠入貨, 「無計啦, 因為佢哋每日新鮮同我哋炸, 我哋訂得少, 唔送貨」 麵底源自雙喜; 新界老師傅的陳皮魚蛋, 魚味香得十足媽媽煮的魚肉釀三寶的感覺; 豬紅是來自北角春秧街街市. 爆醬沙律丸是黃大仙名物, 阿偉每星期最少去三次入貨, 一口咬破白色丸皮, 即時口中只有三個字:「好滾動!」(救命...日日周圍入貨, 比我一定攰死咗, 唔好話仲要煮麵!) 「萬歲」的湯底並非「乸喉味精湯」, 清潤得飲半碗我的敏感舌頭也沒有慘叫乾涸, 偉:「真係老火湯嚟架, 我哋星期日唔開, 我都要專登返嚟開火滾滾佢先得, 係一個老行專教我煲嘅」 阿偉教路:「好多車仔檔狂加辣, 加咖喱主要係想遮咗啲唔新鮮嘅料啫, 所以我哋全部嘢都係味道唔會太重, 因為本身已經好好食, 車仔麵最重要講品質麻 」(係...睇你入晒全港最好食啲貨就知) (嘩!! 救命呀!! 「萬歲」牛坑腩$10, 直情有大埔群記水準) 偉: 「師傅教落, 雞翼, 牛腩一定要每日新鮮煮先好食, 而且佢又教我哋點樣可以煮到啲牛腩唔會熔熔爛爛囉」 一刺穿溏心蛋, 望著澎湃的蛋黃湧出來, 除了目澄口呆真的不能再給更好的反應, 阿偉:心「我淨係每日滷蛋都滷3個鐘呀, 不停係咁攪… 」(痴線! 超晒班嘅質素, 都係賣$9, 老闆你係米傻傻哋架?) 樽裝綠寶...一路飲我一路有返老還童的卜通卜通心跳情緒, 原來味道與車仔麵夾得如此緊要. 本來家住華富邨的兩位老闆, 為何選在炮台山開店呢? 阿偉說:「買食材方便麻, 同埋E區感覺私文啲, 慢活啲, 正經啲」 「萬歲」店名, 源自於曾當過電影美術的經驗, 偉:「拍戲嗰陣, 導演, 明星一開心, 凌晨請晒全場工作人員食嘢, 就叫《萬歲》, 大家都好開心, 而且你唔覺得《萬歲》個名娘娘地咩? 咁米好襯我哋囉」(我好鍾意E種娘味呀!) 伴著我食麵的懷舊活化櫃, 我真的愛你愛到死. 所有我曾經玩過的童年玩物, 就在這裡: 漫畫周刊, 海豹叢書, 過橋抽板, 乖乖玩具...原來偉媽媽也是收藏家, 所以從不掉東西. (我媽媽則是清潔家, 玩具殺手, 專門掉東西呢!) 這個小露寶與阿偉同年, 1975由偉媽媽買給他玩, 所以他最有感覺...(偉...你唔會嬲我爆咗你幾多歲出嚟掛??) 我最愛「七喜」的吸吸波球板, 當年要儲大量蓋掩加錢換, 我日日也拿到停車場與隣居玩, 偉:「我都好難忘..舊時被先生罰打手板就係用佢囉」(我仲衰, Miss係專扭我耳仔, 扭到又紅又腫...) 飾櫃內當眼處有一張「十蚊紙」, 明顯與所有玩具格格不入, 原來記載著一段阿偉十多年乘小巴的難忘經歷.... 話說某日阿偉去瑪莉醫院, 在小巴上有一位貌似劉松仁的男士向司機遞上舊十元紙幣, 但司機拒收, 男士別無選擇, 只有一疊舊十元, 於是阿偉替男士繳款… 男士輕聲道謝並說:「我剛剛放出嚟, 趕住探屋企人, 無新銀紙, 多謝你」, 跟著將數張舊十元塞向偉, 便急忙跑走...(如果阿偉係汪明荃, 故事發展應該比華麗轉身更好睇) 食飽飽, 我建議你用$10, 在盒仔抽一抽運氣… 說不定你可以在100個啷啷中抽到最巨型如拳頭一樣大的特別款色喎… 萬歲一角放了一部任天堂紅白機, 人人也可以玩, 阿偉一邊玩食鬼一邊說:「其實我最叻打熱血高校, 不過上星期有個年青人嚟玩, 好興奮一手扯跌咗部機, 真係幾心痛」(畀我肉痛死添呀!!) 開業只有兩星期, 原來就已經有不少食客拿出家中不要的打火機, 龍虎門, Tamagochi, GameBoy盒帶, 送給阿偉, 「佢哋唔要, 又知我儲, 咁米比我囉, 有人成部紅白機攞過嚟添」 (嘩!原來開車仔麵店有懐舊嘢收, 我都想開呀!!) 地址：炮台山宏安道2-12號宏暉大廈地下9號鋪 (星期日休息) 大仁生活facebook http://dayanlife.blogspot.hk/2015/04/blog-post_23.html
