自由行試得多,但從未試過一丁友去旅行 由於轉新工前臨時確定要清兩星期假,左諗又諗係屋企發霉都唔係辦法 約朋友去旅行人地又拎唔切假,最後膽粗粗行入旅行社買機票開始左屬於一個人既旅行! 相信同好多人一樣,一個女仔自己去旅行實會遇到家人既極力反對 我都用左幾日時間同佢地解釋韓國有幾安全,同埋承諾會租用pocket wifi等佢地隨時搵到我先上到機咋~ 出發既日子係13/03/2014至20/03/2014(共八天) 由於廉價機票關係,來回時間選擇比較少,凌晨兩點幾出發,回程就半夜返到香港 但就係因為咁,先可以玩足八日!! 去濟州島要係釜山轉機,所以我順便網上book埋pocket wifi係金海機場拎 但,一開波就遇上驚險事,話說出發時天氣惡劣,架機delay左成粒鐘先由香港起飛 到的釜山淨返40分鐘度既時間,又要拎wifi,又要check in... 好彩趕到最後五分鐘上到機咋! 所以,以後去旅行轉機真係要預兩粒鐘以上先好.... 2014年3月13日上午九點,終於畀我到達左濟州島呢片土地喇!! 由於自己一個人,我對住宿其實冇咩要求,所以都係上網租平得黎又近市中心既地方 其實韓國guesthouse差唔多間間都係下午三時check in 但一般黎講,如果佢間房之前冇人住,又或者執好左,佢都隨時畀你check in 得 否則,你都可以寄存行李然後出去玩架! 一落機,又攰又肚餓,當然拿拿聲搭的士去guesthouse放行李然後再出去搵食 同好多迷戀泡菜國既女仔唔同,我係一隻韓文都唔識既 所以,去每個地方我都係事先搵定韓文名字,再指手劃腳咁問路 如果搭的士,更要預先搵埋目的地電話,因司機叔叔係用電話search地址架! 放好行李,係時候去第一個目的地醫肚-- 三代湯麵會館 基本上用GPS搵路係好方便架,冇幾耐就到步了 網上唔少blogger話呢間三代豬肉湯麵好好食,所以點都要試 好彩餐牌有漢字,同阿豬媽講一聲好快就有得食喇~ 豬肉薄薄的充滿肉味,好香....但個湯就好似淡左少少,加埋其他泡菜去食就OK 食飽飽就可以行去對面既三姓穴參觀 一般韓國既公園都會收費,但價錢唔算貴,2000-3000韓元不等 三姓穴既參觀費成人 2500韓元,主睇花草樹目同歷史 如果冇咩興趣,其實可以唔睇 行完公園消化得咁上下,當然要去做下SPA啦! 韓國既SPA有好多種,而係濟州有一間好特別既酵素SPA -- 懶惰農夫的酵素故事 首先要沖完涼,赤條條咁走入去一個酵缸內,再有專人用酵素泥將係活埋廿分鐘左右 (實際時間我唔知,因為好快我就頂唔順高溫呼救,哈哈!!) 焗完換好衫會有一間房畀你休息,更會有一杯酸酸甜甜既飲品奉上 就咁我就睡左個幾鐘,盛惠20000韓元 當然,做完皮膚真係滑好多,亦冇咁怕凍,哈哈.... 做完SPA又未肚餓,最好就行下街 市中心既東門在來市場同中央地下商業街真係SHOPPING既好去處 東門在來市場其實即係街市,可以買到唔少生熟食物 當中最正就係海鮮,可以即買即食 至於中央地下商業街,女仔至愛....衣服鞋襪化妝品等等咩都有 價錢仲好抵!!!拎定多D銀彈冇錯架喇... 行得黎都天黑,開始肚餓,於是走左去傳說中既黑豬一條街搵食 係韓國,想一個人食烤肉唔容易,好多店舖都賣二人份起 當然,你畀的起錢,一個人食二人份人地又冇你辦法 而我咁好彩,搵到間叫豬肉的香味既烤肉店肯售一人份烤肉 基本價錢10000韓元起,而我山長水遠黎到梗係食好D,叫左份濟州黑毛豬,都係16000韓元 一上桌已經唔講得少,大大份,又好味 阿豬媽仲會親切咁幫你燒埋切開,全程有人服侍真係爽 食完已經成八點幾,韓國日夜溫差大,所以一入黑就好凍 趁食完飯仲暖暖地當然快D返去抖下,準備第二天既行程