如果男人無風度,就算幾靚仔有型有學識有錢都好,就好似女神著吊帶背心,但唔記得剃格甩底毛一樣咁肉酸。 John 同 Gigi 係和平分手既,分手左一段時間,大家除左無block對方ig ,基本上係已經無聯絡。某日,Gigi收到John既電話,內容大致係佢想拎番自己既電話月費計劃⋯無錯!你無聽錯,係電話月費計劃!你話拎番個名牌包包或者貴重首飾都無咁令人頭痛。 John同Gigi 仲係情侶、打得火熱既時候,John就用佢自己既員工優惠幫Gigi出左張電話卡,月費係比街價平少少。其實一直相安無事,就算分左手,Gigi都無為意呢件事,因為月費一直都係自己俾既。但Gigi實在估唔到分手兩年幾後,會有人問自己拎番個電話計劃。 其實Gigi在乎既唔係平月費,問題係John講到明佢會用番個員工計劃,但Gigi本身既電話號碼會無左,(點解會無左,原因太複雜,省略1000字)總之Gigi需要換過一個新電話號碼⋯大家可以想像到要更換一個新號碼有幾麻煩!Gigi 當然想盡辦法,例如搵差唔多價錢既計劃比John,提議比返差價佢等⋯可惜那個John完全唔妥協,仲落最後通碟,同Gigi講幾月幾日前佢會自動轉走個號碼⋯ John係道理上佢係無錯架,只不過係欠缺風度~女神都無錯架,只不過係唔記得剃格甩底毛。