係辦公室工作了都有一段日子,暫時有一類同事,我實在沒辦法對佢地釋出我既友善。 呢類人講野好有禮貌,態度超級友善好幫忙,工作守時鐘意OT,辦事效率相當高。但係,以上特徵只會係老闆面前呈現。老闆唔係度,呢類人立即變臉變聲。 如果你需要呢類人幫手但事情未能令佢係老闆面前邀功,佢只會灑走你,比說話你聽:「喂! 呢單野唔關我事架喎,唔知道! 唔清楚!」。如果恰巧老闆係度,你會突然聽到變高頻高音的聲調逐漸大聲:「呢個其實好容易架,你點會唔識? 唔緊要喇,雖然唔係我跟既我都可以教你呀!」佢會全程親切地面帶笑容逐part逐part 大聲地解釋你聽,但其實你會聽得出解釋內容不是重點,重點是佢同老闆講緊你好蠢佢好醒。 打工仔唔多唔少都會忌老闆知道自己遲到早退,盡量都唔會想老闆知道。同事間都醒水你幫下我時幫下你,互相體諒互相幫忙,遲到少少早退少少,只要不太過份,都唔會打小報告。如果當你遲到既時候,又咁唔好彩遇到這類人,你真係會想煎佢兩巴! 當你盡量想靜悄悄地返回自己位既時候,平時招呼都唔多打既佢就會行過黎大聲講:「早晨呀! 你依家先返黎呀! 其實無乜,我想問你借枝筆~」這個時候,老闆會遠處望一望,大概你會知佢意思係聽日唔好再遲。 我問:「呢份文件我一陣間要見個客趕住要,你可唔可以比左我先? 」這類人會理所當然地答:「唔好意思喎,我都趕住幫老闆整下星期present 份powerpoint! 我整完再整比你喇~ 你趕既自己整喇。」 公司聖誕聯歡派對,通常同事間都喜歡圍內自己傾計,咁樣會輕鬆自在點。當然,老闆走過黎吹水,大家都會賞面有講有笑聯誼。呢個時候,你會好明顯地聽到一把高八度的聲音係度回應老闆: 「真係架! 你好叻呀! 」「真係架! 你好勁呀! 」「真係架! 原來係咁既,你唔講我都唔知呀! 」雖然聽到都想嘔,但老闆沉醉於佢既被讚美世界,我地都要免強配合一下。 面對呢類同事,盡量避之則吉。