早排DBS Black Card做迎新Promotion，新客戶只要首兩個月簽帳滿$20,000，就可以有兩晚免費酒店入住。H生及M太早前擺酒，呢個優惠正好比我地用黎碌酒席～故此，我地早兩個月前已經收到DBS寄黎的Coupon，但由於早排香港風雨欲搖，所以都冇咩心情處理。直到近排先了解下咩情況。講返個計劃，今次DBS同Anantara合作，送兩晚酒店，一共有5間4個地點的酒店比大家選擇，而且連早餐及機場來回接送。5間酒店分別為 - - 泰國布吉島 Anantara Vacation Club - 泰國蘇梅島 Anantara Bophut Resort & Spa - 泰國蘇梅島 Anantara Lawana Resort & Spa - 印尼峇里島 Anantara Vacation Club - 中國三亞 Anantara Sanya Resort & Spa 雖然話免費，但其實係要比稅同服務費，每晚盛惠$42美金(折合328港幣)。其實如果有玩開Resort朋友都會知，Anantara算係一間大集團，世界各地，包括東南亞同馬爾代夫都有酒店，所以比328蚊晚就有得住，絕對可以講話抵！然而，魔鬼在細節，事情點會咁簡單！ 如果大家再細心睇，你會發現其實雖然大家都叫Anantara，但係個名就有少少唔同。蘇梅同三亞叫做 Resort & Spa而布吉同峇里就叫Vacation Club。唔好睇少呢個分別，因為呢兩個係完全唔同的BRAND!連網站都係分開！ logo顏色及下面字都不同。上面係Resort & SPA，下面係Vacation Club 先講前者，Anantara Resort & Spa 屬於正規酒店。同其他集團式Resort一樣，酒店內有大部份設施，包括餐廳、泳池及其他服務。集團於馬爾代夫的酒店亦屬此系列。 而後者Anantara Vacation Club，屬於所謂分權渡假 Time Sharing (Wiki)形式。然而，如果大家Google一下，就會發現Time Sharing呢個形式曾被人投訴當中有人用詐騙手法，以類似傳銷的形式去呃錢！亦即係大家早年經常聽到的旅遊會藉騙案(Wiki)。不單如此，由於出租並非此類酒店主要用途，佢地主要係作為一種投資產品而存在，因此呢類分權渡假酒店好多時只係徒具硬件而冇軟件。網上有不少人住左之後投訴酒店未完全建好，有不少地盤動工。亦有人投訴入面冷氣壞左無人修理，甚至酒店餐廳沒有營業等。而酒店員工質素亦令人成疑。 事實上，曾有網友投訴，指在你購買會藉後，先會發現原來集團旗下非Vacation Club的靚酒店(即Resort & Spa)指會預留少部份房予呢類Club Member，因此非常難去訂房！ 以峇里為例，雖然網站顯示Resort & Spa同Vacation Club都叫 Bali Seminyak ，但原來兩者相距1.2公里遠。前者係臨海，而後者則同海邊唔近。最重要係兩者的軟硬件都不在同一層次！ 故此，識揀，一定揀返Anantara Resort & Spa ！我最終亦同M太決定揀蘇梅島的Anantara Lawana Resort & Spa 酒店(PS:蘇梅機票貴過布吉同峇里成倍，要4XXX一位 & 三亞已被自動SKIP，因為自細對海南島冇好感)。 話說回頭，蘇梅有兩間Anantara Resort & Spa，分別在近查汶Chaweng 同 波普 Bophut。做左少少功課，知道查汶在島西邊，好似係比較旺，屬於旅遊區。而波普則在島北，相對冇咁旺，但好處係酒店比較平。在權衡左利弊之後最後決定住旺區。 填好左上面份form再Email去就會有人聯絡你。我星期一E-mail去，星期三就收到佢地電話。電話中除左confirm你佢地已經收到你份form之外，亦會問你同你同行者夠唔夠三十歲。如果夠三十歲，佢地就會「邀請」你去聽一個有關Time Sharing的講座。睇返網友匯報，個講座大約90分鐘左右。當中會有人向你推銷旅遊會藉。而講座地點有可能在香港或在當地酒店。如果你意志夠堅定，恭喜你！佢地會額外送多一晚酒店比你！因此如果有興趣而意志又堅定的朋友，可以自行考慮是否去聽呢個講座。話說回頭，據有網友回報，指佢地聲稱要入會都要有一定條件。除左夠三十歲以上之外，亦要有＄75000美金年薪(不過香港人就唔難達到)。而個會藉據了解係需要十幾萬~值唔值，就自己大家衡量～其實早兩年前，Anantara Vacation Club亦曾經邀請過好多人去參加一個所謂「試住」計劃。會以一個好低價錢就住到有關酒店。但當然聽90分鐘「講座」是常識吧~ 總括而言，今次DBS Card雖然有5間酒店可供選擇。但實際只有蘇梅同三亞係叫做比較好的選擇。如果各位朋友同我一樣，唔想返大陸玩的話，就剩低蘇梅可以揀。但問題係由於蘇梅航線被泰航壟斷經營，並無廉航可以選擇，變左機票價格長期高企，比兩晚酒店仲要貴，形成「DBS出豉油，我地出雞」的困境。所以如果大家已經達標考慮緊邊間酒店，又或者被佢個迎新吸引的話，就要好好考慮清楚。當然，如果大家玩開儲Miles的話，呢張又的確唔錯，不過呢個又係另一個故事了～
