好想重拾打日記嘅感覺,開個Blog分享下生活上零零星星嘅趣事,如果你都有同感或者共鳴,可以俾個五我✋ 好,分享下剛剛嘅深圳東門遊先。話說,我地一班貪小便宜嘅人仔見填個名申請東亞信用卡又送百佳現金券又送戲飛仲有每人兩張來回深圳直通車飛,我地梗係諗都唔諗就申請啦!說是咁,我地相約完sem一齊柴娃娃上深圳,朝拜一下呢個人稱香港人購物天堂嘅東門。 就係兩張免費車飛,一班無所事事嘅大學生,懷住興奮嘅心情出發深圳。最搞笑是,有人到咗皇崗先發現無帶回鄉證,所有人心情直插谷底,無人覺得需要提帶回鄉證,但竟然真係會有人唔記得!後來出現咗好戲劇性嘅情節,一班人夾錢俾同學A搭的士歸家拎回鄉證,然後想送佢去的士站但有個人話:「一係佢自己走,一係一班人走,走咗返唔到轉頭架喇!」跟住我地個個企定定,目送同學A俾帶走...... 去到深圳,第一件事梗係飲飲食食,東門果條食街真係超級多野食。玉女卷、糯米釀雞翼、香辣豬腳、平到笑酸辣粉真係必食,最後飲杯青檸蘆薈,真係大滿足。女仔購物嘅戰鬥力同腳骨力真係不容忽視!行左幾粒鐘,不停格價再買買買。我嘅戰利品係一枝超堅硬仲可以防埋狼既自拍神棍,盛惠35人仔,在深水埗買都要95港幣架,感覺超爽的!仲有裝手機影相嘅三用小鏡頭、懶人iPad夾架、兩件衛衣加加埋埋唔使一百蚊,女仔買到平嘢內心總有種莫明嘅快感,果然係購物天堂!行到攰攰來個野妹麻辣火鍋,鴛鴦湯底真係無得彈,食得辣真係好和味。雖然逐碟計錢,但六個人埋單每位唔使五十蚊。最後芋圓豆花糖水作結,perfect池!全日加加埋埋用左二百人仔左右,唔怪得之香港人一有假期就北上是有原因的。 Btw,最後我地只係用咗一張免費直通車飛,因為上車果個位太山卡啦,搭完地鐵再轉巴士先到,唔怪得之免費啦T.T 溫馨提示,要買印有英文字母嘅衫要小心啲,分分鐘中伏-.- 鴛鴦湯頂級正!