三至五歲小朋友只有17%識自己整早餐!

A-ten-year-old-boy-uses-an-Apple-Ipad-tablet-computer-590x392

「港孩」成日都俾人話「三低」,即係自理能力、情緒智商和抗逆力偏低。時不時都會聽到啲新聞講咩小六都唔識自己洗頭呀,有事無事都嗌工人姐姐,直情「衣來伸手,飯來張口」,梗係咩都做唔到啦。

呢個情況唔係只喺香港出現,英國《每日郵報》轉述咗AVG技術公司嘅一項調查,發現3-5歲嘅小朋友有58%識用手機,但係每6個細路得一個知點樣整早餐。其實我都唔明,手機啲用腦game可以玩得咁純熟,簡簡單單整個燕麥加牛奶早餐,又或者係塊麵包上面搽啲果Jam有幾難?

321

而紐約公司MiMedia都做咗個1,000人調查,近60%父母話佢哋嘅小朋友未識講嘢之前就已經會用iPad,約50%父母表示佢哋三歲以下小朋友都好鍾意自拍。鬼咩,47%父母每日至少up一張小朋友嘅相上Facebook呢啲社交媒體,正所謂近墨者黑,自自然然都搞到啲細路只係鍾意玩電子嘢啦。

其實講到尾咪又係怪獸家長問題,成日話啲細路只係識打機,如果當初你用心陪佢玩,教佢踩下單車、一齊整下早餐,而唔係就咁畀部iPad佢就算,佢就唔會咩都唔識做變港孩啦!唔好成日用忙做藉口,如果你唔用心喺佢仲細嘅時候做開始多啲陪佢玩同傾計,佢哋大咗你就後悔莫及啦⋯⋯

This entry was posted in 其他, 知識, 親子 and tagged , , , , , . Bookmark the permalink.