依加愈黎愈多甜品店主打梳乎厘班戟。不過小妹覺得味道質素各有不同,以下係食左港九新界3間之後嘅比較︰ 港島【FLIPPER'S】 今年年中,打著日本「奇蹟之班戟」旗號進駐香港,係超人氣甜品店。就算小妹平日下午3點幾去都排左成20分鐘!當日我地見難得試到人氣梳乎厘班戟,所以叫左成4款黎試,分別係︰ 榛子朱古力焦糖香蕉班戟 士多啤梨藍莓香蕉班戟 綠茶紅豆班戟 奇蹟之栗子班戟 其實咁多款式嘅班戟都係原味班戟加上唔同嘅水果或忌廉而成。原味班戟蛋香濃郁,不過由於比較濕潤,個人覺得缺少左梳乎厘班戟嘅空氣感,食完會感覺到飽肚。另外,無論係榛子朱古力、綠茶紅豆定栗子,可能都係加左落忌廉度,味道都唔算突出。 九龍【PAN de PAIN Pancakes】 小妹之前都介紹呢間班戟甜品店,因此就唔多講啦。不過我覺得佢嘅梳乎厘班戟係充滿空氣感,食完真係好似食左空氣咁!係梳乎厘無誤!不過總覺得價錢貴左少少,因為真係好似無食過野。 新界【班戟館】 早前,朋友話屯門都開左間甜品店有梳乎厘班戟食,小妹二話不說又去試下啦。原來間小店唔止有梳乎厘班戟食,仲有好多其他甜品,而且係用iPad落單。 當日我試左名叫「熱戀」的梳乎厘班戟。班戟一拎上黎已經聞到好香嘅焦糖味。一試,發現班戟嘅外皮好脆,入面濕潤軟滑但唔會感覺厚實,口感豐富。加上唔會過甜嘅焦糖漿,食完真係好滿足。 除左班戟外,仲有半個被焦糖包住嘅啤梨、一粒士多啤梨花花同焦糖雪糕,反而無常見嘅忌廉,配搭比較新穎,味道亦相當協調。至於價錢則同 PAN de PAIN 差唔多,不過又有雪糕又有生果食,CP值高! 題外話︰ 我地仲試左法式可麗餅,又係一道大家搶住食嘅甜品!可麗餅中間位置較軟身,周邊香脆,加上焦糖粒粒同焦糖雪糕口感同味蕾好滿足!