旺角cafe開到成行成市,要搵間坐得耐,野食又ok嘅cafe唔難,要搵間有特色嘅就唔容易啦!聽朋友講最近開左間哈利波特主題嘅cafe, 野食唔錯之餘又多野玩,今日得閒就特登黎朝聖下!一上到4樓就見到呢個好sharp 嘅 9 3/4 cafe logo,就好似進入個神秘嘅月台咁! 一推開門就見到電影經典嘅場景重現眼前! 回憶即刻返晒黎! 隔離仲有兩把飛天掃帚!好正呀!不過兩把掃帚都係掛係牆上,無得拎落黎。 牆上仲有好多款魔法棒collection,簡直想將全部收集返屋企。 好靚啊!cafe內有一間房,入面嘅天花有好多蠟燭燈,好似去左霍格華茲咁! 坐位隔離有好多書架,好vintage! 店家好貼心,準備左好多道具俾我地嘅d港女影下相,扮下哈利!下圖見到有識發光嘅魔杖同哈利眼鏡,另外仲有魔法師帽架! 講左咁耐,都係focus返野食先!由於係主題cafe,店家都係menu上用左唔少心思,所有菜式同飲品嘅名都係同小說內容有關。 我地㨂左好耐,決定大家些牙試多d唔同菜式。 飲品幾特別係用電燈泡裝住,重點係底部識發光,好靚,飲落都開心d! 我地㨂左個牛扒些牙,叫左五成熟!係牛扒拎出黎之前店家已好細心咁將牛扒切開成一條條,方便我地分享。不得不讚嘅係d肉質好鮮嫩多汁,燒到恰度好處,真係令人齒頰留香,餵食嘅我咬左淡先記得影相。 另外呢度嘅軟殻蟹沙律都好好味(唔記得左個魔法菜式名),係軟殻蟹下面鋪左青瓜絲同洋蔥絲等,同酸甜開胃嘅沙律醬汁好配合。 因為覺得水煙蟲奇妙通道呢道菜式嘅名好特別,所以叫左黎試下。結果卻是意外的好食!好推薦! 店家連水杯都唔會忽略,特登用尖底嘅玻璃杯,大家等食嘅時候就可以轉下佢,影下相,仲可以表演下魔法厄下like添~ 總括黎講,呢度有唔少打卡位,餐廳佈飾好靚又有心思!食物價錢都ok唔算貴,值得試下。