早前友人生日,我地去左元朗都多人食嘅緣聚西日餐廳食放題,因為佢話見openrice 寫呢間有生蠔同蟹腳放題,其他放題鋪少見,所以特地生日同佢去食。 不過去到先知原來想試到嫩滑嘅生蠔同鮮甜嘅蟹腳係要每人加98蚊嘅!諗落都幾貴,所以最後我地都無加,只係狂叫芝士焗蠔,味道都幾好,係細隻左小小。 意外嘅係呢度可以無限任飲apple cider、梅酒同清酒,出面放題真係好少見!我地都不停encore。 每次放題梗係唔少得必食嘅刺身,呢度嘅刺身都唔錯,食落都幾新鮮,而且仲有泰式生蝦食。 除左刺身、料理同壽司之外,呢度仲可以打邊爐!我地都叫左個蕃茄芝士湯底洽下佢,配料方面有肥牛、青口等,同出面任打差唔多,當然對於質素就唔好期望太高啦。 甜品方面,好開心有甜筒食,而且口感好smooth,個甜筒唔係脆身,反而煙煙韌韌,個人幾中意!小妹覺得必定要試焦糖芝士雪糕,真係好濃芝士味,而且細細件,食多幾件都得! 任食貌似B仔嘅雞翼尖!不過感覺無B仔果D咁新鮮,質感比較淋身但味道ok。