【不一樣的炸豬扒包 。幸福西多士- 勝利茶餐室】

 勝利茶餐廳係每次去澳門都必定幫襯嘅茶餐廳,貪佢抵食之餘,味道唔錯又近大三巴景點。 呢日,我地兩點幾到達澳門半島,立即去勝利茶餐室醫下肚再上大三巴影相。 由於母親大人係第一次去澳門,當然推薦佢試最出名嘅豬扒包啦!而我自己就叫左西多士食。

豬扒包

雖然係下午茶,但個豬扒包真係好大個。而重點係塊豬扒都好大,如圖所見,係大過個包嘅!為左方便客人些牙,D豬扒包上台前已切開左兩份,不過我地都係每人食一個,可能真係太肚餓啦!

呢度嘅豬扒包同其他地方唔同嘅係佢D豬扒係炸嘅,而其他店係煎嘅。個人覺得各有各好啦:炸嘅香口D,不過表面較硬,母親大人食果陣話好似整損左個嘴,但細佬就幾中意食。

由於係炸嘅關係,個包比較乾身少少,無咩汁,所以食幾啖之後都要飲下飲品潤下喉。

西多士

呢個真心要推介!西多士唔單止炸得好鬆軟,而且蛋香濃郁,絕對係食過最好味之一!查埋塊牛油食,超幸福呢!

This entry was posted in 其他, 外遊美食, 澳門, 特色餐廳, 購物 and tagged . Bookmark the permalink.