大家估唔估到係邊到 ? 港島西延線上年開通,上次介紹過堅尼地城,今次就介紹剛剛係3月底啟用嘅西營盤站。西營盤由7條主要街道構成,包括正街、第一街、第二街、第三街、高街、東邊街同西邊街。由於西營盤基本上全條都係斜路,真係少d 腳骨力都唔得 ! 當中有唔少有特色嘅地方同餐廳,慢慢遊走話唔定你會發掘到更多得意嘅店鋪。 是日路線:Seoulmate Café -> 前贊育醫院(現西區社區中心)-> 高街鬼屋(現西營盤社區綜合大樓) 第 1 站 : Seoulmate Café 如果放工又或者假日,去到西營盤就當然要醫肚先啦~ 位於第三街嘅 Seoulmate Café 主打韓食,雖然選擇唔算特別多,但都係精心製作。室內地方只有2-3張枱,唔好見到滿座就走人,因為仲有室外。室外主要以白色嘅牆身配上木造嘅枱櫈,雖然空間唔算太大,但就有種好舒服嘅感覺,令你忘記自己身處係市區。店鋪入面除左有個書架有韓國旅遊書等資訊提供外,原來連鋪頭入面嘅decoration都係由韓國買入,簡直係韓風十足! 當日叫左泡菜雞柳飯同燒牛肉韓哥飯卷,仲有青梅茶同柚子茶。 泡菜雞柳飯望落好紅,以為會好辣,但食落唔算好辣,仲愈食愈開胃。 而飯卷就最有驚喜!以麵粉皮包住飯同燒牛肉,入面仲有菜,食落一d 都唔乾。再加上半熔芝士埋蛋汁,真係食唔停口!唔好以為得兩件,份量好似好少咁,因為入面有芝士同飯,所以如果唔太餓嘅,2個 share 一份就啱啱好! 餐廳仲有其他小擺設,大家不妨留意下 ~點擊圖片放大 第2站:前贊育醫院(現西區社區中心) 出左Seoulmate Café 之後轉右沿路一直行,就會見到一座以紅磚建成嘅建築物。原來呢座係贊育醫院嘅舊址,現為西區社區中心。除左可以係外面嘅紅磚牆影相外,仲可以入去影旋轉木樓梯。提提大家,由於樓梯係木造,所以行嘅時候盡量放輕腳步,如果唔係都幾大聲。 點擊圖片放大 除左西邊街正門外,位於第三街嘅後門入口有個紅色嘅郵筒,郵政迷一定唔可以錯過! 第2.5站:高街 由第三街行上多一條街就係高街,沿住高街行會見到有好多酒吧同食肆,有食街嘅稱號。 第3站:高街鬼屋(現西營盤社區綜合大樓) 明明係一座社區綜合大樓,又點解會有鬼屋嘅稱呼?傳說指本來呢到係一間精神病院,而係二戰香港淪陷時,日軍以呢到作為刑場;而位於醫院前面的佐治五世公園就曾經係一個亂葬崗,所以經常都會有d靈異傳聞。而戰後繼續成為精神病院,因當時醫學冇而家咁昌明,所以好多時精神病人通常都係入院「等死」,所以有鬼屋嘅稱號。 至2001年,政府決定將原址拆卸,改建成西營盤社區綜合大樓,只有原建築的正面被保留,同時亦係香港一級歷史建築。時至今日,鬼故嘅傳聞已經少之又少,反而吸引左一班鍾意攝影嘅人去影相。當中最特別嘅係花崗石外牆,拱形長廊同舊式嘅燈。如果假日去嘅話,有機會要排隊影相 tim ~ 點擊圖片放大 +2 其實除左以上介紹嘅地方之外,西營盤仲有好多得意嘅地方同店鋪架,大家行西營盤嘅時候,不妨多d 留意 ~ 今次 Kongirl 仲發現到幾個得意嘅地方,大家如果去西營盤嘅話,不如試下搵唔搵到 ~ 如果你發掘到得意嘅地方,歡迎同我地交流下架 ~ 點擊圖片放大 +2 —————————————————————————————- 想知多d 香港有咩好去處同有咩餐廳推介, 就痴實我地女孩像我 Kongirlike me 啦 ~ FB: http://www.facebook.com/kongirlikeme Blog: http://jmc.hksyu.edu/jour395/w15p2/ instagram: kongirlikeme