有留意時間綫既朋友都會發現我上一個Winter其實去左四個旅行 曼谷、北京、東京同首爾 時間上其實係一個接一個,真心個排其實身體都好辛苦 而呢個首爾之旅其實係我冬天最後一個旅程 亦都係最輕鬆既旅程 我呢個行程去既地方其實都係好大路既景點 好似南怡島、景福宮呢d 所以我都唔特別寫一篇遊記介紹啦,相信可能大部分都比我熟悉韓國 講個秘密比大家知 其實我17年5月個陣又去多左次首爾,不過係陪老母去,全程做衣架 唔講得多啦,都係比大家望下我食左d咩啦 明洞夜市 1. 炸醬麵 -- 呢間炸醬麵好好食啊!唔會過咸,而且上面加少少辣醬更加惹味。不過份量真係好少..... 2. 雞蛋糕 -- 我係明洞、弘大同梨大都食過,硬係覺得明洞既係最軟熟,而且最夠熱。但相對亦都係最貴,係明洞食一個等於係梨大食兩個。 3. Nutella榛子朱古力醬香蕉Pancake -- 呢款甜品簡直令我又愛又恨。佢充滿Nutella醬,而且配合香蕉、脆朱古力片同Cream,罪惡感十足。雖然好好味,但好貴,好似印象中要3K定4K,我覺得稍稍唔值。 陳奶奶一隻雞 陳奶奶雞係我去兩次首爾都必食既餐廳!佢其實係用清水煮雞,裏面加兩塊姜同d大蔥,完全係煮雞湯,食雞原汁原味。 其實有蒜蓉、辣椒醬、醋同醬油比食客點雞,但我地只係落左少少蒜蓉落雞度,稍爲調下味已經超級好食。 雞肉好嫩,湯底充滿雞肉味,就咁飲都覺得好好飲。大部分都會加多份麵或者年糕,煮一煮已經好淋,同湯底好夾。尤其年糕雖然好粗,但卻好有咬口。另外其實有d人都會叫個白飯,等湯底開始收乾就擺入去煮粥。 Issac 講到首爾早餐,相信絕大部分人都會提起Issac呢間三文治店。最大吸引就係個醬,酸酸甜甜超級開胃 廣藏市場 廣藏市場真係一個好特別既地方。明明叫市場,但無街市既感覺,反而有美食廣場既感覺。而且入面有好多傳統韓國小食,好似炒年糕、煎餅、手切麵、米腸等等。價格尚算ok,好處係你可以一次試好多款。 炒年糕真係好正!超級煙韌,而且辣味好重,刺激到爆 麻油飯卷反而令我有少少失望,其實就係普通飯卷然後有麻油味,我個人感覺吹大左 米腸我個人覺得好香,而且有咬口。但我朋友同媽媽都覺得有少少腥 其實本身想兩個人share一碗,但呢檔刀切麵規定每人都要叫一碗。我就叫左餃子同辣餃子各半既然麵。麵係粗身,有咬口之餘都好香麵粉味。不過餃子我就覺得普通,入面餡料係豆腐+菜,感覺好似太淋。 生章魚....其實都係享受吸住條脷個一下,除此之外都無乜好講 綠豆煎餅好香,但相對係邪惡度最高。感覺好似食緊有餡既薯餅,不過好大份! 阿峴洞醬油蟹 其實呢間餐廳我係最想介紹比大家,因爲呢間既醬油蟹真係性價比無敵地高!總之大家記住選擇最貴個款就ok,或者叫另一款辣蟹我都好推薦 最貴個款醬油蟹其實都只不過15000Yen左右,質素雖然比唔上50000Yen個d,但新鮮度同入味度都十分之高,絕對比起任你食個d高。 成個set有一隻蟹同一碗紫米飯,一擡會有一鍋大醬湯,配菜任你refill。 我地一開始每人叫左一個醬油蟹一個辣蟹,而最後我地再叫多左個醬油蟹 姜虎東白丁 我個人就對燒烤麻麻地,因爲係香港成日都食唔到好食既燒烤。係炑八、喜來烤肉呢d都係要自己燒,我又成日控制唔好,所以少食。不過盡次去到呢間姜虎東白丁,叫左個大概36K won既烤肉set同一個水冷麵,有店員幫我地烤埋,就變到好正。五花肉d油份好多,好香。而且最重要價錢係適中。 Red Sun 年糕鍋 其實呢間我個人就唔想推薦比大家,因爲唔係我杯茶,但考慮到可能有人對年糕鍋有興趣,所以都講下。年糕鍋裏面有年糕、粉絲、炸餃子、香腸同公仔麵,個所謂辣醬我感覺似炸醬麵個炸醬多d。還我部隊鍋!!!我要泡菜啊!! 不過去到最後仲可以加個白飯入面炒,都好香 Waffle House 呢間誠意推薦!係弘大石頭烤肉附近,每晚都好多人排隊買。係用厚得黎又好鬆軟既Waffle夾住生果同超多Nutella榛子朱古力醬整成,可以選擇香蕉、士多啤梨或奇異果。都係3000-4000won 好抵食!兩個share一個都無問題啊 元堂馬鈴薯豬骨鍋 呢個係我一到步第一餐食既野。元堂最出名係豬骨鍋,雖然一般都係出售N人分量,但其實都有一人鍋。我地叫左個一人鍋、石鍋拌飯同雞蛋卷。豬骨鍋好入味,非常濃稠。雞蛋卷分量都好大。 點擊圖片放大 其他食堂/食物 1. 便利店飯卷 -- 呢款飯卷其實係CU呢d便利店都可以搵到。麻油味仲重過係廣藏市場個d,而且入面餡料十足,牛肉味道好濃。一定要買! 2. 南怡島泡菜飯盒便當 係南怡島餐館都唔少,但價格都比較高。所以較多人選擇一間專門食泡菜飯盒既鋪頭。貪平之餘,仲可以撈下搖下。泡菜煎餅都ok,不過就好軟身,但泡菜分量好多