同事介紹佐敦有間日式餐廳, 款式應有盡有, 價錢比起集團式餐廳既為平, 於是約左班舊同學今晚一齊去聚舊同大吃一番。 平日既六點多, 店內未算多人, 人流漸漸係7點後就開始多, 幾乎全場爆滿。呢度落ORDER係自己寫紙仔的, 所以唔怕有落錯單既情況出現。 呢度既款式應有盡有, 刺身、壽司、炸物、串燒等等...幾乎比起一般放題既款式更多! 就算我地放縱咁Order, 價錢除返開其實比起食放題既仲平少少tim~ 【魷魚鬚唐揚】HK$45 係街頭小食通常都會炸得油林林, 呢度既炸魷魚鬚炸得表面較為乾身, 入口幾脆, 炸皮脆得偏向硬少少, 入面既魷魚帶點爽, 唔會硬到扯唔開。 【雞軟骨】HK$28 串燒燒得金黃, 唔會太乾身, 爽脆口感 【炭火燒泡菜雞翼】HK$48 雖然唔太食得出炭燒味, 表面色澤金黃, 無骨雞翼釀入泡菜令賣相脤卜卜, 一咬開表面香脆, 入面有唔少既泡菜絲, 酸酸辣辣, 幾開胃 【墨魚咀唐揚】HK$38 呢款反而表面冇咁脆口, 帶些少濕潤, 細細粒墨魚咀帶點爽 【忌廉蟹肉薯餅】HK$42 鬆脆既炸皮, 入面有好重既忌廉香, 外脆內軟正好形容呢個薯餅 【三文魚腩(5切)】HK$60 超級肥美, 厚切, 魚油豐富 【特長三文魚腩壽司@2件】HK$22 驚喜既係呢度有特長三文魚壽司, 而且仲係腩位, 價錢竟然仲要咁平, 當然要Order埋啦! 雖然件三文魚腩比起刺身既厚度再薄少少, 不過魚油同樣豐富。 【帶子壽司@2件】HK$22 呢度既壽司飯比較實, 帶子帶點鮮味, 不過唔算太肥美 【芥辣八爪魚壽司@2件】HK$18 即叫即整, 紫菜還很脆, 軍艦上既八爪魚都幾多 【石鍋燒鰻魚飯】HK$60 由於有石頭鍋,, 飯粒可以形成飯焦, 大大增加香脆口感。鰻魚上充滿甜甜既燒汁, 無幼細既骨方便入口, 林度適中, 中意食鰻魚必叫之選! 【石鍋香辣海鮮手打烏冬】HK$62 石鍋熱辣辣上檯, d湯仲滾下滾下...湯底帶點微辣, 有蟹柳、帶子同埋魷魚, 海鮮都很鮮甜, 但烏冬唔似手打果種煙韌感。 【菠蘿雪芭】HK$48 最有驚喜既係呢個甜品, 手掌般大既原個菠蘿, 以冰墊底的送上, 入面既雪芭啖啖都有很重既菠蘿味, 甜甜地, 正!!! 整體黎講, 一次過可以食到唔同既款式, 大部分野食既質素都唔錯, 最緊要價錢唔貴, 放縱咁食到飽飽都唔會太貴, 有機會必定Encorn!! ———————————————— 餐廳名稱:七福神和食亭 Address: 佐敦彌敦道311-313號1樓 Tel.: 2388 2302 營業時間: 星期一至五 11:30-15:00 17:30-23:30 星期六至日 11:30-15:30 17:30-23:30 公眾假期 11:30-15:30 17:30-23:30 設加一服務費 接受預先訂座: Yes ==================== Find me on Facebook Page▸ www.facebook.com/keresawong/ Instagram▸ https://www.instagram.com/keresawong.l.s Blog▸ https://keresawongls.blogspot.hk/ Blog▸ http://keresa.pixnet.net/blog U Blog▸https://blog.ulifestyle.com.hk/blogger/keresawong/ TheZtyle▸ http://keresawongls.theztyle.com Openrice▸ Keresawong.L.S ==================