吉澳，對好多朋友嚟講可能係比較陌生嘅地名。其實吉澳係本港一個位於大鵬灣西南水域嘅小島，島嶼面積2.35平方公里，常住人口不足50人。 吉澳鄰近沙頭角邊境，係香港最北嘅海島，東南面係娥眉洲與往灣洲。由於地處浪急風高嘅大鵬灣，反寫「之」字形海灣可作漁船天然避風港，故名吉澳，取其吉祥之意；另因海島呈屈曲狀，當時嘅英語名稱係Crooked Island（意即曲島）。 遊覽吉澳，唔少人選擇參加本地遊旅行團，或者好似我咁自行組團，包船喺馬料水碼頭出發。由於自行出發就要喺沙頭角乘搭街渡，大家必須持有禁區紙先可以從禁區沙頭角嚟到吉澳，而且每日亦只有4班街渡。 上篇: 離島海岸地質遊－印洲塘、鴨洲、吉澳 因為交通不便，唔少朋友嫌煩卻步，間接令呢個小島得以保留古樸嘅漁村風貌。 走出碼頭，樹影婆娑，往右行就到達吉澳唯一嘅大街──吉澳大街。喺吉澳，所有嘢都可以話係數一數二！點解？原因係呢度只有2間餐廳同2間賣茶粿嘅小食店，即係話，唔係幫襯呢間就幫襯嗰間。冇所謂嘅朋友可以隨便揀一間幫襯，好似我咁麻煩又有要求嘅人當然會向大家推介d正嘢啦！ 大家冇理由一開始就食飯，但又想食少少嘢先去行山，咁就一定要試試傳統茶粿喇！好似我咁嘅識途老馬，梗係去村公所前少少嗰間茶粿店啦！一上岸，我就衝出小市集嚟到茶粿店。 其實都唔可以話係店，因為係村民喺屋企前擺放一個個蒸盤，裏面全部都係自家製茶粿。茶粿全部都係當日製，售完即止，所以手快有手慢就食手指喇～ 糯米糍係最好賣，有花生、紅豆沙兩種餡料，兩款都超好味，媽媽大人同阿妹都落order叫我一定一定要買番屋企做手信。 除咗糯米糍，仲有艾草茶粿（上圖）、雞屎藤茶粿（下圖）、南瓜茶粿、鉢仔糕等等。我全部都試過，款款都鍾意食，所以每一樣都有買。 就係咁，我就拎住一大袋，內有4盒嘅茶粿，開始行山。有好多人問我，點解唔落山先買，我只係笑下話一陣就冇。（因為我知村民只會做一批茶粿，唔會整得多。）到我哋落山，佢哋想買時，人哋已經賣晒收咗檔喇！嗰時佢哋見到我手上嘅茶粿，個個嘅表情都好後悔冇聽我講買定先。 吉澳嘅老房子大多都十室九空，好多古老石屋已經荒廢，甚至連屋頂也崩塌下來。 雖然吉澳很細，但島上亦設有水警警崗。 經歷半個世紀嘅建築物，從房子上的數字得知。 嚟到吉澳廣場，見到一個仿古牌坊出現喺大家面前。 為提高市民對岩石及地貌保育的意識，廣場牌坊旁邊就係吉澳地質教育中心。中心由村屋改 建，遊客可透過一系列的岩石標本、具代表性的化石標本及吉澳文物，加深對地質及吉澳文化歷史的認識。 地質教育中心內展示不同時期嘅化石仿製品，岩石樣本冇玻璃箱或圍欄阻隔，可以親手體驗岩石觸感。 由吉澳村民捐贈嘅天后花轎和服飾亦非常珍貴。吉澳嘅天后宮有兩座天后娘娘，較大一個長駐天后宮嘅坐相娘娘，較小一個係行相娘娘，天后誕時會坐轎出巡。 吉澳遊樂場內嘅細葉榕，已被納入康文署嘅古樹名木冊之內。打橫生長嘅百年細葉榕，吉澳村民視之為姻緣樹，當然背後就梗係有段故啦。 段古我就唔講喇！不過聽聞企喺樹下面，捉到跌落嚟嘅樹葉就可以擁有美滿姻緣。大家有機會去記得試試。（點解我去時一片葉都冇飄落嚟㗎？！） 細葉榕旁邊亦有一個小碼頭，可以遠眺西北方嘅鴨洲同深圳鹽田貨櫃碼頭，亦因為貨櫃碼頭嘅建成，使吉澳成為香港最接近中國大陸嘅離島，兩岸之間相距不足1公里。所以島上的所需用品都係由深圳運過嚟，呢個亦係點解吉澳嘅汽水飲品唔似其他離島咁貴。 島上居民以漁業起家，所以必定供奉拜祭天后娘娘。天后宮樑上嘅石灣陶公仔係光緒六年製作，全部有眼無珠，因為驚點睛後會有生命。 而吉澳天后宮嘅歷史，大家只要入廟參拜，就會見到銅鐘上刻着「乾隆廿八年」字樣，說明至今已有超過250年歷史。 天后宮內有對「鬼佬門神」：以前有兩個啹喀兵負責翻新廟宇，大門髹上油漆後遮蓋咗原本嘅門神，他們惟有半靠記憶半靠想像再參考對方嘅臉重新畫上，所以門神面相似鬼佬多過似中國人。而鬼佬門神嘅腰帶亦好似像比卡超㗎！ 旁邊另一道黃色對門上面畫住攞住菜嘅財神，因為啹喀兵以為「財」係「菜」，結果財神就變咗攞住棵菜喇！ 居民深信島上有龍脈橫越，每隔10年就會舉行「安龍清醮」，以保龍脈不衰。按照習俗，居民每次醮會舉行前兩年，向天后擲杯，喺農曆九月擇定吉日，然後籌備醮會。當地人之後會選定一批人擔任打醮管理人，他們必須夫妻雙全、三代同堂、有兒有女有孫，人選定好後，再向天后擲杯9次，邊個獲得最多「勝杯」（即一正一反），就可獲得「攬榜公」嘅最高殊榮，按佢之下仲有副榜公、緣首等職位。 儀式中要供奉「山大人」（紙紮觀音）、演木偶戲及神功戲；另外要舉辦天后出巡、太平出巡及正誕大出巡，吉澳醮期長達6天，屬香港現存醮會中好罕見。上一次醮會喺舊年舉行，下次要等10年後。 沿住澳背塘徑一直行大約15分鐘，就會見到一個恍如世外桃源嘅小沙灘，呢度就係澳背塘。 澳背塘由數個島上嘅高崗與洋洲環護，如湖泊般秀麗靜美。上圖後方11點方向就係全吉澳最高最高點－位於島東高122米嘅雞公嶺（次之為黃幌山、涌灣頂、高棚頂、高地頂及王角頂等地）。 清澈海水直透海底，生物眾多，海星、海參、彈塗魚、招潮蟹及雞泡魚隨時可見；岩石地質五色斑斕奪目非常，陽光下閃閃生輝。 澳背塘村嘅地下水源頭，隱藏喺小徑盡頭，被植物包圍，就好似一個秘密基地。村民會喺井中放一隻龜，如果發現隻龜有問題，代表水源亦有問題。 吉澳島上有唔少牛，因為以前大家都有耕作，後來大家都搬走，就將牛牛野放。不過宜家見到嘅呢d牛牛已經係第3、4代了，牛牛好乖，大家亦唔好去打擾佢哋。 由於前一日落大雨，以為今次又會好似第一次嚟咁要冒雨登山，又凍又濕，仲有行爛泥地，好彩是日天公作美，加上今次登山路徑係另一條，行起嚟舒服簡單得多。 今次我哋會登上高棚頂與桂橋谷。同大部份登山朋友唔同，我哋係又相反方向出發，因為咁行據講會比較舒服。 行咗一陣嚟到半山腰就見到正前方嘅黃幌山（亦即係「印塘六寶」中嘅羅傘）。 繼續向上行，到達第一個山頂位，一邊望住澳背塘，一邊看向深涌。 寂靜嘅深涌海灣，以前曾經係漁船嘅避風港。 所以天后古廟就係建喺深涌口，對著深涌小碼頭。 再向前行少少，就可以眺望鴨洲。 當然唔少得吉澳碼頭同吉澳大街嘅景色。天氣好，景色靚，真係令人心曠神怡！ 澳背塘海灣內嘅魚排，幾乎可以與吉澳以沙堤相連。而旁邊殘餘嘅千尺浮橋，其實係昔日嘅珍珠養殖場（相中一點點，好似水中一條路）。浮橋係俾工人來往魚排同沙灘之用，魚場結業，所以現在只剩下橋腳。 一行人繼續沿住山徑走到桂橋谷（舊稱為鬼叫谷），沿途可俯瞰整個澳背塘，邊行邊欣賞風景，非常寫意。 欣賞完澳背塘風光後，我哋開始從山上向下行，見到牛、蝴蝶等等，跟住突然聽到嗡嗡聲，幾隻大蜂喺我哋身邊飛嚟飛去，有d登山初哥好緊張，仲想趕開大蜂。我喺心入面大叫：唔該有d常識，你整到自己就算，千歧唔好搞到我。（其實蜂類抱住人不犯我、我不犯人嘅原則生存，所以絕對唔好搞佢咁蠢。） 經過山海亭後繼續進行落山，右邊就係 。海水呈現現出深淺不同嘅藍色，大家可以沿住小徑落去沙灘。 行完一小段滿佈「牛地雷」嘅路途，見到高棚頂、桂橋谷嘅路標，就知道我哋到達終點。 荒廢小屋有綠色大樹做屋頂，喺晴天下唔會令人覺得陰森，反而使人覺得綠意盎然。 回想起上一次嚟吉澳，我哋天寒地凍冒雨登山嘅情景。雖然過程都幾辛苦，但景色真係好靚。 同今次唔同，上次我哋向吉澳南面方向嘅紅花嶺進發。（大約上面紅點標記位置） 沿途上見到鴨洲與深圳鹽田 終於嚟到紅花嶺，煙雨迷濛，真係好似望住山水畫一樣。 呢度屬於香港地質公園新界東北沉積岩園區。 白沙頭灣與橫門海，海水清澈，顯出不同深淺嘅藍。 如果天氣好的話，相信又係另一番絕美景色。 跟住我哋行過少少，前往另一邊眺望「上有蘇杭，下有印塘」美譽嘅印洲塘。 印洲塘海域內大部份範圍被劃入印洲塘海岸公園，有虎王洲等小島嶼。當中印洲外形宛如印台，就係印洲塘中文地名來源。 印洲塘有「印塘六寶」－羅傘和文房五寶，因為天氣與角度問題，畫面上只見到文房四寶－紙張、筆尖、玉璽、筆架，獨墨硯受潮漲被海水掩蓋。希望有機會再嚟時可以見到！ 完成行山行程，我哋番到吉澳大街醫肚。領隊朋友同吉澳村長好friend，而益民茶樓係村長開嘅，所以兩次我哋都嚟呢度食飯。而且朋友更加請村長準備咗一餐超豐富嘅非一般海鮮午餐俾我哋。自己組隊出嚟係梗係要食好嘢啦！大家如果想食好嘢記得預先訂位喇！ 一開始先有我好中意嘅柴魚花生粥，清清地又帶少少柴魚香，最正當然係任添啦！ 跟住落嚟就係第一炮－龍躉川芎天麻湯！呢個湯真係正到呢，連我超憎食魚嘅細妹上次飲完，今次都不斷求我帶一碗返去俾佢。村長用木柴竹枝煲湯，極具風味整煲湯煲咗十幾二十個鐘，令所有材料出晒味。湯入面仲加咗大量胡椒，天氣濕冷飲呢個湯會令人全身發滾，體內嘅廢物透過毛孔排放出嚟，感覺暖笠笠，連水腫等問題都解決埋。 白切走地雞－肉質嫩滑冇肥膏，雞味香濃，加上大量薑蓉，讚！ 手打墨魚丸－嚟得吉澳點可以唔食最出名嘅嘢啊？！酒樓係清蒸嘅，一碟10粒，每粒墨魚丸搓到大過乒乓波，比平時吃嘅大得多。唔同出面好多墨魚丸咬落去成口粉，呢度嘅係用墨魚加魚肉、豬肉打到起膠，再加入墨魚粒、蔥粒同陳皮粒，咬落爽口彈牙、味道鮮甜腴豐美。 食完覺得好食，大家可以係番益民買走。外賣係一盒墨魚滑，大概整到16-18粒。買番屋企後自己搓成墨魚丸蒸又得。不過，個人覺得更正嘅做法係整成墨魚餅，然後煎到金黃色，食落好香口，得咗！ 客家扣肉 客家人每逢有喜慶場合一定會食豬肉，所以豬肉菜式做得非常出色！呢味客家扣肉令我食指大動。五花腩入口即溶，芋頭吸收醬汁精華，香甜軟糯，其他地方根本做唔到咁嘅味道，食過就會令人念念不忘。 白灼油菜 除咗馳名墨魚丸外，另一樣就係清蒸蝦乾吊桶銀魚仔。烹調方法好簡單，蒸完加入熟油豉油及就可以食。味道鹹香可口，越吃越好味，送飯一流。蝦乾、吊桶同埋銀魚仔呢d乾貨一樣可以喺益民茶樓買到，試過先買有保證好多。 蒜蓉豉汁蒸龍躉腩 咁大條十幾斤嘅龍躉有點止一食呢？！所以龍躉湯只係用咗龍躉頭同龍躉尾去煲湯。而龍躉腩位油分較重，魚味濃郁，清蒸會比較膩，所以用蒜蓉豉汁蒸比較惹味，又唔會奪去龍躉嘅魚味 龍躉炒球，簡直就係啖啖肉，而魚皮好厚、膠質超重，女士們成日話要補充膠質，食龍躉啱晒喇！ 白灼海蝦 食飽飽，我梗係即刻抓住村長個仔買墨魚滑同蝦乾、吊桶、銀魚仔啦！買完其他人見到我滿手戰利品，大家都蜂擁過嚟買嘢同排隊俾錢。所以話，行得快好世界，真係好有道理！再見，吉澳！不過我的旅程仲未完，待續！ 上篇: 離島海岸地質遊－印洲塘、鴨洲、吉澳
