秋天係最適合郊遊嘅季節，雖然香港並唔係一個四季分明嘅城市，但今年秋季嘅氣息非常濃厚，趁住天氣晴朗、秋高氣爽，好應該到郊外行下、玩下！今次行程會從水路探索香港西北。 朝早9點，我帶住娘親大人同兩個妹去青衣搭船開始是日行程。船出航冇幾耐就見到汀九橋，當然唔少得青山公路汀九段啦！ 青山公路上嘅數字，所代表嘅包括近水灣、汀九灣、麗都灣、更生灣、海美灣、雙仙灣、釣魚灣、青龍灣、新舊咖啡灣、加多利灣、青山灣等等，一條公路超過十個海灘，雖然好多都屬於小型規模，但就係因為呢種小小嘅海灣風情，令人更加有度假嗰種休閒嘅感覺。 首先見到近水灣（Approach Beach），近水灣泳灘位於油柑頭與汀九之間，係最接近荃灣西站及荃灣市中心嘅海灘。近水灣灘面雖然略比汀九灣長，但係一個石灘，因為海邊鋪滿石塊，沙地中常有硬物。 近水灣一帶嘅泳屋，又是一個奇景（上圖右邊中間）。沿着海岸而建嘅泳屋，就是以前嘅游泳會，即是以前泳客嘅club house（宜家亦有獨木舟／水上活動會）。時至今日，一班老泳客不論寒暑，每日早上仍然嚟到呢度游水。 值得一提，於都會區下荃灣海岸線以汀九橋以東為界線嘅維港範圍內不准游泳條款中，此處和汀九灣為唯二可在法例下豁免的海灘。（根據香港法例第313章附屬法例《船舶及港口管理規例》，未經海事處處長批准，任何人均不得在維港游泳），不過汀九灣已經係維港範圍最西北角位置喇！ 有機會大家可以去汀九一帶嘅沙灘坐下。喺馬路旁邊沿着石級行幾步就已經係沙灘，沒有過度娛樂化嘅設施，等於冇太多遊人，安安靜靜，非常舒服。 好喜歡汀九灣呢度嘅生活節奏，路旁兩三層高嘅舊別墅，名字包括松溪、南岸寄廬、謙廬、松屋、玫瑰等等，好似時光倒流一樣，充滿懷舊氣息。沙灘後有一條老村，平日下午，寂靜無人，偶爾聽到村內老人交談或者打麻雀，好古樸嘅感覺。 汀九橋係全球最長嘅三塔式斜拉索橋。大橋兩個主跨分別長448米及475米，連引道全長1,875米。大橋跨越藍巴勒海峽，連接汀九同青衣，屬於3號幹線。 大小磨刀（又稱大小磨刀洲、磨刀洲，英語：The Brothers）指大嶼山以北嘅三個小島：大磨刀、小磨刀和匙羹洲。大磨刀洲以前係一個石墨礦場 —「五福礦場」嘅所在地（石墨即係用嚟整鉛筆芯嘅物料）。 喺1990年代，為了興建赤鱲角新機場，避免影響飛機升降，大小磨刀被削平，以及取得沙石用作填海。宜家大小磨刀無人居住，只係剩低公共直升機坪和小型氣象站等設施。 海面上嘅平地－大小磨刀 經過大小磨刀就會見到整個香港赤鱲角機場，今次係我第一次喺海上見到整個機場，真係好大，完全可以想像到呢個移山填海嘅工程係幾咁犀利。 船繼續向目的地進發，見到遠處被一層煙塵籠罩，原來不經不覺已經去到龍鼓灘發電廠一帶。見到原來發電廠係會排放咁多污染物，忍唔住提醒自己，以後一定要更環保D，唔可以浪費資源。 龍鼓灘發電廠位於新界屯門區湧浪，係全球規模最大嘅燃氣聯合循環發電廠之一。發電廠佔地46公頃，係全港首間採用天然氣為燃料嘅發電廠，後備燃料為柴油。廠內共有8台發電機，總發電量大約為2,500兆瓦。 發電廠由青山發電有限公司擁有，公司係中電控股及中國南方電網共同擁有的合營企業，而發電廠則由中電負責營運。九龍同新界嘅朋友就係用呢度嘅電！ 經過咗40分鐘船程之後，我哋終於見到沙洲（仲加埋龍鼓洲）出現喺遠處出現喇！ 可能好多朋友都會問，咁究竟沙洲係喺邊㗎？ 答案就係紅色標記嗰度！ 沙洲全貌～ 終於嚟到沙洲喇！上船登岸～ 沙洲係香港新界西部龍鼓水道其中一個島嶼，即係屯門區西部龍鼓灘對出小島，沙洲亦是連島沙洲之一，因而得名。 整個沙洲分為上沙洲、沙洲主島、小沙洲和下沙洲。沙洲主島上頂部圓型狀物體係雷達站。 上沙洲東岸築有飛機燃料儲存庫，喺上沙洲可以見到煤油接收設施，呢個設施喺為機場提供後備燃料接收之用（接收設施位於沙洲及龍鼓洲海岸公園範圍內）。 沙洲與龍鼓洲及白洲等島嶼同屬於具特殊科學價值地點及海岸保護區，合稱沙洲及龍鼓洲海岸公園。公園面積1200公頃，為香港面積最大嘅海岸公園。呢個海岸公園係香港第3個海岸公園。 喺呢一帶海域可以發現中華白海豚（印度太平洋駝背豚）嘅蹤跡。（雖然今次見唔到，但由於我之前已經見過中華白海豚，所以唔覺得失望。） 沙洲西端嘅小沙洲上，有漁民建設嘅天后廟，與南果洲天后廟一樣，屬無廟祝打理嘅無人廟，但每年農曆天后誕時，青山灣嘅漁民必會前來沙洲天后廟酬謝神恩祈求庇蔭。 一登島，就見到貓石出現喺右手邊（上圖），唔知你又睇唔睇到呢？ 我哋一行人沿著沙洲路首先向沙洲最高點－雷達站進發！ 喺半山腰望番碼頭～ 位於沙洲上，望住呢片空無一人嘅沙灘，腦海即刻浮現《失落沙洲》呢一首歌～ https://www.youtube.com/watch?v=Ie1KcGvBN_k 又來到這個港口 沒有原因的拘留 我的心乘著斑駁的輕舟 尋找失落的沙洲 隨時間的海浪漂流 我用力張開雙手 擁抱那麼多起起落落 想念的還是你望著我的眼波 我不是一定要你回來 只是當又一個人看海 回頭才發現你不在 留下我迂迴的徘徊 我不是一定要你回來 只是當又把回憶翻開 除了你之外的空白 還有誰能來教我愛～ 繼續向山頂進發～由於沙洲最高點並唔高，而且整條路都鋪得好好，所以唔難行。 位於56米高嘅沙洲之巔，設有機場管理局及天文台合作嘅天氣雷達站，監察機場一帶天氣變化，以確保航機不受風切變影響而發生危險。 沙洲主島嘅氣象雷達就如一顆明珠，領隊話行山人士稱為「西海明珠」。 沙洲雷達站旁邊設有直昇機停機坪。究竟我哋成班人企晒喺停機坪邊做咩呢？ 之唔係為咗睇小沙洲囉！小沙洲12點方向就係白洲，白洲後面就係內伶仃，而上沙洲後面就係龍鼓洲。 龍鼓洲比沙洲偏北，掌管龍鼓水道出口，地理位置優越。龍鼓沙洲海峽間有一細小島嶼名為白洲，亦係在海岸公園水域內，白洲以西有一石排名為白排，而嗰度已經係屬中國內地水域範圍伶仃洋中間。 沙洲係一個連島沙洲（又稱連島壩），係由沉積作用形成嘅地形，外形與沙咀及沙洲相似，但形態卻係連接兩處陸地嘅沉積地形，其中一端原本係島嶼，或者兩面都係島嶼。連島沙洲形成嘅地方通常都係位於狹窄嘅海峽。 海浪因受島嶼嘅形狀以及季候風影響，形成兩股季節性相反嘅沿岸漂移。因為水流較慢嘅關係，沿岸漂移就有機會將岸邊嘅沙石堆成沙咀。隨著時間發展，兩邊沙咀不斷延長，最後連接一齊，形成連島沙洲。而海平面上升或地面抬升亦可增加連島沙洲形成嘅機會。 龍鼓洲、沙洲等連串島嶼，因貼近珠江口，海水夾雜大量沙泥，而沉積物因水流轉向使沉積喺島嶼沙咀間，久而久之形成沙堤連接小島間，成為連島沙洲。從地形可見，龍鼓洲主島、沙洲主島都係連島沙洲地貌。由於受到珠江流水令海水變淡及增加營養，使到附近擁有大量海洋魚類及貝類資源。 由於當日天氣唔多穩定，再加上已經開始潮漲，所以領隊唔建議我哋橫渡沙堤去小沙洲。所以如果大家想橫渡沙洲沙堤，一定要留意潮汐漲退時間。如果遇上潮漲時，記得絕對唔可以夾硬橫渡沙堤，以免危險、發生意外。（出嚟玩，最重要都係注意安全。） 睇完靚景，我哋落山去睇島上嘅奇石。 喺落山途中見到唔同嘅植物（點解上山時完全冇留意嘅？哈哈！） 又到大頭茶花盛開嘅季節 沿著山路繼續落山～ 見到位於沙洲最南端嘅下沙洲 番到碼頭呢個位，我哋要喺右邊嘅石堆爬落沙灘。 好彩娘親大人同兩個妹嘅體力同體能都算唔錯，即使跟住我上山下海都冇問題。 攀完石，仲要行過亂石陣，只要慢慢行，其實難度唔高。 終於嚟到呢片沙灘，見到海天一色就覺得好值得！ 企喺呢片沙灘，耳邊彷彿響起陶喆嘅《沙灘》～ https://www.youtube.com/watch?v=c_5balnitLs 「空無一人 這片沙灘 風吹過來 冷冷海岸 我輕輕抖落鞋裡的沙 看著我的腳印 OH～ 一個人 一步步 好寂寞 看海有些綠 天有些藍 那段愛情有些遺憾 像不知不覺游向海天 到最深的地方 才發現你 早已經 放棄我 我聽著海浪 溫柔的呼吸 我看著雲朵 飄來飄去 有什麼方法 讓自己真的忘記 ONLY BLUE ONLY BLUE 愛讓人好憂鬱 我的心 我的心 藍藍地 我真的想找一條船 能遠遠離開這片沙灘 每次又回到同樣海邊 還是會對你想念 想念你 有點BLUE 沒有人能像你 留給我的回憶 有點BLUE OOH～」 香港嘅沙灘真係好神奇，咩奇怪嘢都竟然會出現！ 海邊有張枱，究竟係用嚟打邊爐、打麻雀定係用嚟講數㗎呢？ 仲有沖涼必備嘅黃色鴨仔～ 回頭一望這片沙灘～ 唯妙唯肖、惹人暇想嘅怪石、奇石終於出現啦！ 龜殼石 育嬰石，又有人話係阿爸抱仔石（都話行得快，好世界！好彩行得快，先趕得切睇育嬰石，之後嘅朋友因為潮漲問題，已經睇唔到BB個頭喇～） 呢個應該係俾衝上岸嘅綠色巨型浮標～ 沙洲嘅岩石上屬大嶼山大斑晶粗粒黑雲母花崗岩。呢種有兩種唔同物質組成嘅大石應該係經歷過地殼變動先會形成掛？ 下沙洲距離沙洲主島不遠，位於沙洲主島嘅西邊，島上嘅燈塔係218號。 繼續向前就會見到一連串怪石。 第一塊就係海豚石，如果水位高d就容易睇d，不過淨係睇隻眼同嘴，其實都幾似～ 仲有「心心相印石」，一大塊好似心臟嘅石上有個心形凸咗出嚟～ 而前面散落係沙灘上仲有一塊心形石添㗎！搞到我娘親大人嘅少女魂即刻被喚醒，瘋狂叫我幫佢影相 ... 如果繼續向前行可以到達小沙洲，但因為潮漲，所以唔可以繼續行過去。仲要把握時間番去碼頭嗰邊，唔係就會連回程嘅路都會變得好難行。 Bye bye , 沙洲！我哋繼續向下一站喇～ 下篇：秋季本港海陸一日遊：玩轉沙洲、馬灣、沙螺灣（2）
