京都5-9月夏季限定!近郊日歸遊,出發去貴船避暑,食竹筒流水素麵+增加戀愛運 (1) 喺京都盆地北面,茂密嘅老杉林中有座流傳無數神話、傳說嘅神秘之地鞍馬山,仲有京都嘅水源之地,祭祀著水神嘅貴船山,兩邊都係關西首屈一指嘅避暑地。夏季嘅來臨,一齊嚟鞍馬山同貴船,體驗一下涼爽嘅樹蔭與川流上清涼嘅微風,當然仲有清甜美味嘅泉水、清新嘅空氣! 早排同閨中密友去睇畫展。佢同我講,最近好多朋友話要去旅行,而好多地方都同我N年前就去過,其中之一就係近兩年超多遊客去嘅京都貴船,所以想同大家分享一下啦! 貴船位於京都近郊,好多人覺得去貴船好麻煩,我就覺得只係一個鐘頭左右車程,分分鐘快過由港島入新界,就可以去到咁正嘅地方,仲想點呢? 我哋從京都站搭JR到東福寺站,然後係東福寺站轉搭京阪電車1號線到「出町柳」站。 到達「出町柳」站後就可以跟住指示牌行,一上番地面就會見到叡山電鐵車站。 然後大家再轉乘叡山電車到貴船。 提提大家,叡山電車係有兩條路線,一條綠色線、一條紅色線。如果要到貴船,記得要搭去紅色線,仲要係去「鞍馬」嗰架電車先啱!(宜家電車已經換咗新裝,變成紅色。) 大家由出町柳站出發,搭13個站到「貴船口」站(E16),亦係尾2嘅站。 一出站就見到川流嘅景色,而且貴船比起喺京都真係清涼好多,感覺好舒服。由於京都係盆地,所以比起東京或者大阪,夏天時會氣溫會更加高。加上東京同大阪係沿海城市,會有海風吹到,感覺冇咁熱。既然京都唔近海,就去山上避暑,所以從古時開始,鞍馬、貴船地區就係京都貴族嘅避暑勝地。 無論大家想去神社參拜定係去食嘢都要上去貴船山。一出站,就會見到呢個牌,貴船山就係大家右邊,一直行大約30分鐘就到貴船山入口處。由於全部都係斜路,唔想身水身汗,所以選擇搭車。 喺貴船口站有巴士搭上貴船山入口處。大家行去對面馬路。向左行前少少就會見到巴士站。每位單程160円,5分鐘就到達貴船山入口處。(由我去到宜家都冇加價,好滾動!)。如果大家食川床料理,大部份料理店會有車接送。(食流水麵係冇車接送㗎!) 貴船山入口處落咗車要行10分鐘上山路到貴船山上游嘅ひろ文食流水麵。 行咗半分鐘就見到呢條紅色小橋。沿著小橋,穿過森林小道就會到達鞍馬山。所以亦有人會選擇搭電鐵去到鞍馬站,先去鞍馬寺參拜完,再行過嚟貴船,大概要行個幾鐘。 鞍馬有著天狗嘅傳說。(如果由睇過柯南應該會知少少。)平安時代末期,據說喺鞍馬寺嘅源義經(牛若丸)同天狗一齊修行過,所以去到邊度都戴著天狗面具。(其實我覺得只係為咗神格化咗源義經,所以先咁講。而事實上,源義經咁多仇口,驚人認出佢,即刻嚟追殺佢。) 貴船所有料理店都會喺貴船川上設置川床料理。 途中會經過貴船神社,呢個係正門。京都人會嚟貴船神社祈求增強人緣、締結良緣,係京都祈求戀愛嘅神社之一。 好多人嚟貴船就係為咗食川床料理。好多人誤會咗只有貴船先有川床料理。其實喺夏天嘅京都鴨川上亦可以品嚐到川床料理。不過貴船係鴨川嘅水源發源地,從江戶時代開始,貴族、富商喺度避暑,佢哋利用貴船獨特嘅地形,係河川上搭建咗榻榻米,一邊納涼、欣賞山光水色,一邊品嚐精緻嘅料理,簡直係人生最大享受。 喺貴船有大概十間川床料理店,比較出名嘅有貴船莊、貴船茶屋等等。川床料理完全係夏季限定,其他三季就喺番店內進食。由於係古代貴族風雅玩意加季節限定,所以價錢唔算平,大概$500(港幣)起。 終於行到嚟到ひろ文。雖然貴船川床料理係最出名嘅,但我對流水素麵更有興趣。而ひろ文喺整個貴船地區唯一供應流水素麵嘅店家。 我哋嗰日去到完全冇人食流水素麵,反而川床料理就有好多人食。嗰時同宜家逼滿遊客完全唔同,對於我呢 d最冇耐性排隊嘅人嚟講,真係去得快好世界。 當年食流しそうめん(流水素麵)係1200円一位,宜家都只係加咗100円,變成1300円。咁就已經可以係川床上食透心涼嘅流水素麵,真係一個非常特別嘅經驗!個人覺得超值! 俾完錢後,店員就會派一把有號碼嘅扇,同埋會提供一份食流水素麵嘅指示俾客人,等大家可以了解點樣食流水素麵。 從呢條樓梯往下行到底下嘅川床,川床前面就是吃流水麵嘅位置。 等咗一陣,店員就請我哋去食流水麵嘅川床坐。記得要除鞋先好走上川床! 而上面就係ひろ文提供川床料理嘅川床席。ひろ文除咗係料理店,仲係一間旅館。 我哋一坐低,店員就送上用竹筒型器皿裝住嘅咗冷面醬油、蔥花香菇,同甜品抹茶蕨餅。 由於當日冇人食流水素麵,店員姐姐反而要特別為我哋兩個準備。佢就係喺呢間小茅屋準備流水涼麵嘅! 當店員姐姐喺小茅屋準備緊嘅時候,又嚟咗兩組客人,一組係3個日本人,一組係2個外國人。日本人嗰組坐喺我哋左邊較遠位置,外國人坐係我哋右邊較近位置。 每組客人都會有專屬嘅流水麵竹筒,一組會用同一個,你坐低時店員會話俾你知用邊一條竹筒。大家唔使擔心食到人哋口水,但記得唔好有麵流過嚟就夾,睇清楚係咪你條竹筒,唔好食錯咗人哋D麵。我哋用較近嗰條竹筒。 提提大家,食流水素麵係唔會有人通知你幾時開始有麵食。咁可能有朋友仔會問,咁點先知D麵準備嚟喇?好簡單!就係當你條竹筒開始有水流,唔該打醒12分精神,因為流水涼麵嚟啦!嗱!筷子揸得好,絕對有著數。流水素麵流走咗就冇㗎啦! 將涼浸浸嘅素麵夾到醬汁裡面,再慢慢享用!食流水素麵嘅祕訣就係「唔使急,最緊要快」! 身處一個咁風雅嘅環境,聽住流水聲,食住從竹筒流出來嘅流水素麵,咩暑氣都消散晒啦!完全係夏日小確幸! 不過大家嚟到,應該未必可以見到呢種好似瀑布咁水勢磅礴嘅景象。點解?!因為身為雨神嘅本人每次出門都招風雨,之前一日京都受到12級颱風吹襲,連海上警報、呢樣警報、嗰樣警報統統出齊,再加上落暴雨,所以先會見到咁洶湧澎湃嘅水量。(不過比起之前一日去嵐山,見到渡月橋D水大到可以用作水力發電,貴船嘅流水量算小兒科。) 好喇!當你見到有團粉紅色嘅紫蘇麵流出嚟,就代表係最後嘅麵,要結束喇!(不過紫蘇麵好難食!中伏!)整個食麵過程大概15分鐘,男仔可能未必夠飽,女仔就OK嘅! 因為冇其他客人,所以我哋可以慢慢坐下,享受一下呢個咁正、咁舒服嘅環境。坐多咗10分鐘,我哋就出發前往貴船神社。 貴船ひろ文流しそうめん (夏季限定 5月1日-9月下旬 ,雨天中止) 價格 : 每位1300円 開放時間 : 11:00~16:00 (5、6月 1200-1400期間會停止供應,7-9月整個時段供應) 交通方式 : 搭叡山電車貴船口駅落車,轉搭小巴上山,小巴下車處往上走大約10分鐘左右/京都巴士貴船下車徒步10分鐘 網頁:http://hirobun.co.jp/index.html