普通街鋪已經滿足唔到雜食犀牛,所以我又繼續「娟long娟喇」去搵好野食,今次係觀塘工廈嘅一間泰式餐廳。 其實觀塘好多好多樓上餐廳,雖然工廈人流少啲所以平啲,但係觀塘呢個舊區實在係太多人係個度返工返工行街啦,所以即使偏少少嘅餐廳都好多客。但要小心......餐廳太多太雜好易中伏 -_- 為左大家犀牛就變身開荒牛去試盡佢地啦!!!!!!! (為左自己定大家?......) 第一印象唔錯,門面同裝潢都幾好,餐廳侍應態度良好。(當然唔少得泰姐姐講下你唔識嘅泰文啦,雖然冇乜用但幾有feel啊吹~) 環境好靚好開揚都好舒服!星期二黎食嘅所以唔多人,但Full左都應該仲係咁舒適嘅,即刻好想約啲姐妹黎狂野吹水 <3 仲有一張圓枱,可以坐到7個人,有棵樹插係中間幾有熱帶感覺,雖然棵樹會令未必見到你對面個個人嘅樣...... 唯一大家要注意嘅係梳化!一坐落去係會沉左落去矮左勁多嘅,亦都唔算太舒服,雖然員工話可以墊個Cushion,但作用不太,建議全人類坐木櫈 ! 始終一間餐廳最重要嘅係食物,一齊睇下佢地有咩食啦↓ ↓ ↓ ↓ ↓ ↓ ↓ 沙律及生菜包、泰式濃湯、風味小食、BBQ、咖哩、粉麵飯、蔬菜、甜品、特飲等等 其實都係一般泰式料理加少少Fusion感覺,但款式的確比一般嘅餐廳同九龍城嘅泰菜多嘅,一大班人黎食一定會搵到你地嘅心水。咁當然,睇菜式就唔夠九龍城嘅地道啦,始於呢度係食環境同Feel。 青檸薄荷梳打 $32 ☞ 普通野,不過不失 ^^" 椰子珍多冰 $45 ☞ 口感好厚,椰味濃(當然係人工嘅),啲珍多一舊舊舊舊。可以一試嘅但價錢貴囉,性價比低。 泰式柚子大蝦雜菜沙律 $78 ☞ 只係叫左一份,但係佢兩隻碗仔咁上,唔知係唔係因為我地兩個人呢? 但我估係佢想一碗配一隻sauce。個醬汁十分好味!白色個個有少少似平時嘅沙律醬,但多左少少酸甜。個人最愛係紅色嘅,微微辣,酸甜適中,非常開胃。另外,唔好以為佢蝦好多,只係開左邊一分為二,為普通雪藏蝦仁,志在沙律有啲肉食。 馬沙文咖哩配一口酥炸牛肋粒 + 手抓餅 $118 ☞ 佢地就整得一般啦,得個甜字同質地較厚身,唔香口亦唔濃椰香。馬沙文咖哩本應要係口感厚重,偏甜同埋濃郁嘅椰香,微微微辣到可以話係唔辣,但依然香口,可惜可惜。牛肉粒都算多,但「鞋」身,仲有少少薯仔同芋頭。手抓餅不算鬆較......總括黎講,唔洗試啦各位。 胡椒雞湯河配海南雞 $78 ☞ 佢全部湯河都係呢個湯底,另外有沙嗲雞串或者豬頸肉。首先,胡椒味不濃,配河粉味道唔夾,而我個人又喜愛越南Pho多啲,所以我冇乜食個河,主力試海南雞。本身我份人好雞(XDD),所以佢地嘅雞滑,玻璃皮,唔算太肥,有雞味,我已經比佢合格,但作為海南雞嘅花椒八角薑汁味就差啲啦!當佢普通白切雞湯河嘅話就會高分好多。而且欠個油飯真係差好遠,好食嘅海南雞飯有好多,可以試下其他,哈。 蒜香泰式臘腸炒芥蘭 $68 ☞ 芥蘭好好食!搞到我一邊打食評都一邊流口水想食返......好香,如果配埋啲香料同飯一齊食就Perfect。我朋友話偏咸味濃但可接受,但重口味嘅我就覺得剛剛好啦。覺得就咁炒芥蘭已經好好食,加埋佢啲「中式」臘腸反而有啲九唔搭八,但如果鐘意食臘腸嘅朋友,分開黎食送飯都幾唔錯。 服務唔錯嘅,會同你換碟加水,雖然睇得出有好多侍應係暑期工,怕怕醜醜咁,但態度都OK。餐具同擺設加分,係會令你食得好舒服好享受嘅,慢慢同朋友食下野吹下水都咪話唔爽。 味道:★★★✰✰(3/5) ☞ 一般般啦,世間有咁多好野食就未必會encore囉 外表:★★★★✰(4/5) ☞ 擺盤唔錯,吸引嘅 環境:★★★★✰(4/5) ☞ 認真舒服,下次試下lunch 或 tea time上去hea下 價錢:★★★✰✰(3/5) ☞ 價錢商宜,啱返呢個味道嘅食物 服務:★★★★✰(4/5) ☞ 有一個年紀大啲嘅女侍應好細心,其他後生嘅有啲醜但都有熱誠 廁所:★★★★✰(4/5) ☞ 乾淨。可能因為個人少人用呱,哈哈 總分:★★★✰✰(3/5) ☞ 如果你同朋友黎開呢頭,又想搵地方hea下嘅就上去食個飯啦 Add Some Thai Restaurant 地址:觀塘開源道62號駱駝漆大廈一座9D室 電話:27741008 營業時間:星期一至日 11:30 – 23:00 付款方式:Visa, Master, 現金 Facebook: @EatingJournet2West 雜食犀牛記 https://www.facebook.com/EatingJourney2West/