「BB我要食日本野 ʕ•ᴥ•ʔ」 男仔或者啲費時諗嘅朋友都會話:「又食日本野?咁放題囉。」食乜都得又唔怕貴同唔飽 「吓!?(´д`、) 又要飽到嘔都唔知食左咩落肚?」 但同時又唔想食啲hea hea和民元氣板長bla bla bla.....求其食又怕中伏食到唔新鮮嘅難食嘅 如果係你嘅女朋友女神BB要食嘅話,仲大獲!周街都係日本野但係好難搵到啱佢地心水嫁囉 -.-'' 神啊!救救我吧! 可惜呢個時候祈禱都冇用,等我犀犀牛出馬火啦 ✌ ✌ 我會推薦位如尖沙咀北京道一號嘅Ka Ma Do火間土,係一間黎自九州嘅日式料理餐廳。可以睇下佢嘅環境同餐單先 → → http://www.kamadohk.com/enviroment_c.html 睇佢嘅位置都知道個景唔少野啦。冇錯!係有海景嘅!幾靚幾Chilled嫁,不過因為佢地只係8樓,所以唔好期望係無敵大海景,不過已經好夠殺。重要係價錢合理(´∀`)b,帶女黎食海景餐廳都唔洗比人湯到一頸血。 有和式feel嘅房同4人座位,主廳近落地玻璃睇海景嘅都係普通座位。另外仲有特大房添,啱哂一大班朋友黎食飯又唔想嘈到人或者商務飯聚應酬。 呢度環境係好舒服嘅,枱之間都有足夠空間,所以唔會太嘈太迫,我星期二上去唔Full,但如果要窗邊位就一定要一早Book。 **from KaMaDo Website 匯豐 / 恆生信用卡有9折(消費$500以上),或者係FB post相打卡都有9折。 佢地Draft Beer得Kirin麒麟,有分大(mug $38 )同細(glass $29)。因為我地叫左串燒,當然要叫杯大嘅鋸鋸佢✌ 佢地仲有好多日本酒嫁!鐘意飲燒酎、清酒、吟釀嘅朋友就可以黎一試。 新鮮海老天婦羅芒果醬沙律 $98 ☞ 沙律係第一個上嘅菜係常識吧。天婦羅炸得好好,都唔算厚粉,蝦冇裝假狗,有番咁大碌(^_<)。我最鐘意佢嘅沙律菜有紫蘇香!推介推介!! 激好味3色丼(海膽、帆立貝、三文魚) $148 ☞ 我又唔覺得激好味,三文魚唔算好甘,海膽都唔太甜,中等級數啦。因為前幾日食左放題,所以今日只係叫左刺身飯試下佢地嘅魚生水準,結果冇驚喜。另外佢地有好多刺身、壽司、卷物,下次我會試下卷物,其他就夠了唔想試^^"。 九州下關新鮮生蠔 $38 ☞ 作為生蠔發燒友,點都要試下啦!肉厚好鮮甜,比較creamy,鐵銹味同海水味唔算重。 §§犀犀利推介§§日式串燒係今餐最吸引我嘅野!佢地有特選嘅5串同10串,但係我冇理到 ;P,揀左自己愛嘅3款 ↓ ↓ ↓ 北寄貝 $38 + 照燒芝麻豬肉串燒 $23 + 牛脷串燒 $20 ☞ 佢地串燒真係一個字「好食!」北寄貝串燒本身已經夠特別,燒完雖然少左佢嘅鮮,但竟然好香口同好爽口!芝麻豬肉係我最推薦嘅,因為芝麻香,豬肉脆得黎好鬆軟,味道極佳!牛脷好厚身,但一 ‧ 啲 ‧ 都 ‧ 唔 ‧ UN!下次黎我剩食串燒都得 YEAH 鹽燒銀鱈魚骨 $42 ☞ 銀鱈魚不嬲都係好香好甘,係超市買返屋企唔落油是但煎都係人間美味。銀鱈魚骨有更加多魚油香!送酒可以話係頂瓜瓜。 東京牛鍋燒 $98 ☞ 經典日式料理,大家一定不陌生。配着壽喜燒嘅醬油湯底,加上烏冬、豆腐、蔬菜菌類,唔好忘記畫龍點精嘅生雞蛋!係咪即刻吞口水呢?呢個鍋好好食,牛肉都好多,有4-5塊大大件嘅牛肉,輕輕拖幾拖熱湯就好食啦,咁先食到佢嫩嫩嘅口感。 味道:★★★★✰(4/5) ☞ 刺身壽司類好多,但我覺得反而串燒先係皇牌! 外表:★★★★✰(4/5) ☞ 唔好講笑睇到都想流口水 環境:★★★★★(5/5) ☞ 望海,舒服,空間感大,唔比滿分對唔住人 價錢:★★★★★(5/5) ☞ 咁嘅環境仲要食咁多野,先大約$530兩個人,唔係抵係乜? 服務:★★★★✰(4/5) ☞ 唔係專業/傳統日式嘅服務,但係好貼心,你有咩未上佢地會主動跟進 廁所:★★★★✰(4/5) ☞ 呢啲大廈同餐廳,梗係要去完廁所先走啦 總分:★★★★✰(4/5) ☞ 總括黎講係食得好開心,已經諗埋下次黎食乜噜 ^3^ Ka Ma Do火間土 地址:尖沙咀北京道1號8樓802室 (港鐵尖沙咀C1出口 / 尖東站 L5出口) 電話:2269 5051 營業時間:星期一至日 12:00 – 15:00 18:00 – 23:30 付款方式:Visa, Master, UnionPay, JBL, 現金 **匯豐 / 恆生信用卡有9折(消費$500以上),或者係FB post相打卡都有9折。 犀犀牛幫你中伏 ☞ 我食過一次就夠啦...冇乜特別你一次都唔洗去試→→→ 玉子造屋https://blog.ulifestyle.com.hk/blogger/journey2west/2017/07/玉子造屋 Facebook: @EatingJournet2West 雜食犀牛記 https://www.facebook.com/EatingJourney2West/