YY 小記錄。 細個同父母經過7-11, 我同家姐一定會扭計買軟雪糕。 次次都唔夠快,個筒比雪糕浸到穿左個底…結果隻手甜椰椰,比阿媽丙。 而家人大左,阿媽都未必會再理你…阿媽表示湊孫好過對住我。 望見7-11 又賣軟雪糕,又重拾番童年回憶, 朱古力味!極濃!日本直送!仲有得比你揀雪糕筒/ 窩夫餅底裝! 唔係唔買呀? 我揀左雪糕筒,價值$20。 另有窩夫餅底揀,貴少少,要$25。 其實都幾大杯下,好濃既朱古力味,雪糕都好挺身, 雪糕筒唔會好似紙皮咁,一濕就淋。 你問我值唔值$20,我覺得值呀! 朋友話我傻,比$20 食杯7-11 軟雪糕,咁鬼貴。 正如你會比$40-50 蚊食杯"名牌"雪糕一樣, 每個人口味唔同,鍾意食朱古力既朋友可以一試。 雖然7-11 周圍都有,但賣軟雪糕既只有以下幾間: 1. 荃灣 67-95號荃灣街市街荃灣千色匯地下G8號舖 2. 屯門屯隆街3號屯門市廣場2期地下7號舖 3. 旺角豉油街 60-104 號鴻都大廈地下 16 號舖 4. 尖沙咀加拿芬道22號地下舖位 5. 金鐘金鐘道89號力寶中心1樓2B及2C舖(只供應窩夫餅裝)