受到好朋友影響,第一次開Blog 做下小編,實行一人一小篇計劃 XD 先略略自我介紹一下,閒人一個,典型港男,無特殊嗜好,又無乜癖好,主要鍾意登山露營,因工作關係間中會帶隊行山,甚至露營,所以對登山郊遊都算有一定認識,又受過些少訓練,對近年登山活動有自己睇法。除左行山,重好鍾意影相(基本上都係敗家玩意XD),稍後有機會再分享一下攝影作品同心得~最後,就係鍾意打籃球(已屆退役之年)同打機,日後有機會再同大家分享毒L開箱文! 近年愈黎愈流去下郊外,做下文青,但凡D乜假期,物西望報下,文青們就會出動(文青們請恕罪),話說早排小編係大東先見到兩個短裙妹妹行山,真係大熱天時都滴汗"",登山雖好,但都首先要留心一下安全同要有充足準備(唔係裝備!)。另一方面,近來行山活動愈來愈講專業,裝備、知識等等~尤其裝備愈來愈講究(某程度黎講小編都係一個裝備控)。不過,其實小編其實都幾唔贊成呢種風氣,尤其當引申出某女孩同某男孩面書上既罵戰,其實都幾無謂,登山,小編唔係大師,但小編眼中都係一種態度!大佬,唔通無對千幾蚊既行山鞋,就唔好行山,去行街市咩?正所謂風儉由人,安全至上!只要做足準備,注意安全,其實人人都可以行山! 先講講一般一日行山基本裝備(非專業類) 衣著: 1.上裝: 一般運動衫,建議快乾衫或運動衫,避免棉質衫(濕左唔乾,乾左勁臭) 2.下裝: 褲就建議有彈性運動褲(視乎是否穿林決定長短),牛仔褲、熱褲、短裙等就 絕對唔建議 3. 鞋 : 一般運動鞋is ok,如有行山鞋就行山鞋 飲食: 1. 主糧(小編行山主要食朱古力,好求其) 2. 補充糖份食糧或飲品(小編最鍾意飲利_納,錫紙包個種,日後講原因) 3. 後備糧食(以防登山迷路,等人黎救或被迫留係山度過夜,有野食無咁悶) 水量: 一般單日行山需要1L至1.5L,可視乎個人需要加減,但建議帶多少少好過少左少少! 額外: 密實袋1/2個(好有用,日後解釋) 替換衣物(落山搭車有朋友) 今次小編單人走鉛礦坳,其實主要係想為日後鉛礦坳露營探路,大家唔好學小編,自己一個人行山呀!由於行既時候無諗住寫Blog,所以無影太多相同大家分享,日後有待改善!大家可以由可風中學上城門水塘或者係荃灣眾安街坐小巴上,有朋友就坐文青的啦~路線圖今次都係欠奉~唔好意思XD~今次路線都唔難行既~無乜上落,適合新手,俾D相大家睇睇! 由鉛礦坳落山時遠眺大埔風景 城門路段樹林