今日我地去左浮潛, [請睇冬日非自駕沖繩遊 Day3a (浮潛, 慶良間諸島)] 浮潛完好凍, 我地係汽水機買罐熱飲去暖身, 汽水機有熱飲賣真係冬天的恩物! 我地番酒店休息一陣, 然後就搭monorail去國際通搵食啦。 我地首先會去第一牧志公設市場食刺身! 雖然沖繩的刺身唔係出名, 但黎到日本總係想食下生冷野。 我地係牧志站落車, 然後沿住國際通直行, 見到Pablo同埋驚安の殿堂就轉入去條行, 再直行就見到第一牧志公設市場啦。 下午6:45pm. 我地黎到第一牧志公設市場開餐。 入面的格局有D似香港的街市, 不過就通爽乾淨好多。 我地就去左間叫仲田鮮魚的鋪頭度買左盒雜錦刺身&甜蝦刺身, 加埋係1620円,大約HKD$110,平過香港好多。 飲品每支係100円。 當時有個來自廣東省的店員, 用廣東話招呼我地, 仲安排左 離店鋪不遠的用餐區比我地食野。 D刺身未算超級好食,但都食得過,當過下口癮啦。 當時見到隔離有個日本人食緊海葡萄, 我地都想買番盒食,可惜呢度全部都好大盒, 我地一定食唔哂, 唯有留番plan左聽日個lunch食海葡萄啦。 ----------------------------------- 離開左第一牧志公設市場之後, 見到有檔賣ラフテー(Rafute), ラフテー係琉球王朝的宮廷料理, 佢外表好似東坡肉,好香好吸引, 試食完 男友二話不說就買左一包番香港, 而且寫住可以香港入境,但台灣就入唔到境啦。 牌子叫做 和ちゃん,1500円。 http://kazumeet.jp/product/rafute/ D東坡肉本身已經係整熟左一片片, 只要加熱番就食得! 男友覺得D東坡肉幾淋,幾咸, 同一般係香港食的東坡肉唔同, 但又好岩佢口味。 ----------------------------------- 之後我地就去驚安の殿堂、藥妝店血拼一番。 驚安の殿堂地面個層主要係賣化妝品、護膚品, 地底個層主要賣零食、個人護理產品, 而且要分開兩層的產品比錢。 我地係地面個層買左19,203円, 送左上圖個兩隻吉祥物ドンペン(Donpen)公仔, 但我地係底個層買左10,595円就無送到公仔。 買到一袋二袋, 我地就沿住國際通一直行去搵野食。 ----------------------------------- 我地晚飯黎到呢間食沖繩料理的餐廳 - 龍泉。 地址:沖縄県那覇市松尾1-4-5 1F/B1 我地每人叫左杯野飲,我個杯係扁實檸檬汁梳打 (シークワァーサージュース), 扁實檸檬原產於沖繩同埋台灣, 佢本身係好低糖粉&非常酸的, 當然呢杯梳打就無咁酸,幾好飲, 400円。 洛神花梳打酒 (ハイビスカスのお酒), 加左梳打酒味無咁濃,易入口, 480円。 前菜非常好食,D肉酸酸地, D汁好味,但就凍的。 豬軟骨蕎麥麵 (軟骨ソーキそば ), 豬軟骨同湯底好正, 但D麵就無乜特別, 730円。 好似東坡肉的ラフテー(Rafute), 超正,連D配料,蘿蔔都好好正, 800円。 鹽燒Agu豬 (あぐー塩焼き),好好味, D肥膏好正,但D肉韌左D, 1,790円。 沖繩鹽味炒蕎麥麵 (沖縄塩焼きそば), 男友覺得好咸好好食, 但食到尾有D咸到膩, 680円。 餐廳入面竟然有樹。總共食左5,950円。 我地之後去左Family Mart買野飲, 一見到沖繩限定就為之瘋狂買左黎飲, 佢係櫻桃+蜜瓜果汁, 含4%的酒精, 但櫻桃味突出D,價錢係152円。 Day3完, Day4我地會搬去Resort度住一晚! 想收到個blog最新update 記得like Facebook Page https://www.facebook.com/fatbjai.travel/ 其他文章: 冬日非自駕沖繩遊 酒店篇 (DoubleTree by Hilton Hotel Naha) 冬日非自駕沖繩遊 Resort篇 (Kafuu Resort Fuchaku Condo Hotel) 冬日非自駕沖繩遊 Day1a (內附5日行程,港龍) 冬日非自駕沖繩遊 Day1b (Naha Main Place,屋台村,第1日就唔見野?) 冬日非自駕沖繩遊 Day2a (Local Tour,古宇利島,屋我地大橋,備瀨福木林道) 冬日非自駕沖繩遊 Day2b (Local Tour,美麗海水族館,御菓子御殿) 冬日非自駕沖繩遊 Day2c (Local Tour,萬座毛,掛上英殖香港旗的餐廳?) 冬日非自駕沖繩遊 Day3a (浮潛, 慶良間諸島) 冬日非自駕沖繩遊 Day3b (第一牧志公設市場,國際通,沖繩料理) 冬日非自駕沖繩遊 Day4a (首里城,那霸去恩納,利木津巴士) 冬日非自駕沖繩遊 Day4b (恩納必食餐廳,海葡萄蓋飯,琉球之牛) 冬日非自駕沖繩遊 Day5 (那霸機場有咩好買?) 冬日非自駕沖繩遊 有咩手信買?