Day3我地主要去京都清水寺! ------------------------ 我地今日book左11am岡本織物著浴衣! 所以我地又係7點幾就起身準備出門口! 我地又係食琴晚係超市&7仔買的壽司、飯團做早餐! (岩哂我地發掘日本便利店有咩好野食!) ----------------------------------- 我地會搭地鐵去新大阪JR站, 然後搭9:35am個班JR東海道山陽本線新快速去京都, 560円一個人, 55分鐘就會到京都架啦! 呢架車無劃位,有位就坐啦, 咁岩得一個位,我就坐,男友就企係度, 然後我訓係佢肚腩到 :P 到左京都之後, JR站出面就會有京都市巴士搭, 可以搭D1位置的100號巴士/D2位置的206號巴士去清水寺, 兩個巴士站的位置都差唔多, 車費都係230円(用ICOCA卡都可以比錢架!) 見到有邊架就搭啦! 100號巴士路線 https://www2.city.kyoto.lg.jp/kotsu/busdia/keitou/kto/100.htm 206號巴士路線 https://www2.city.kyoto.lg.jp/kotsu/busdia/keitou/kto/206.htm 由於岡本織物清水坂店近清水道多D, 我地就係清水道落, 但好多人都會早一個站五条坂落車行去清水寺。 我地落車就見到間和菓子店, 忍唔住買左兩串食,100円一串! 好好味,甜甜地,煙煙韌韌。 浪川菓舗 地址:京都府京都市東山区辰巳町113 開始落毛毛雨啦,明明琴日去環球影城好曬好好天架! 其實由落車行到去岡本織物清水坂店都幾長, 大約要行10至15分鐘的路程。 岡本織物清水坂店 地址:京都市東山区清水2丁目237-1-1 (photo form: http://okamoto-kimono.com/about/index.html) 清水坂店係店鋪與店鋪之間的窄巷入面, 所以留意個logo 唔好行過左呀! (photo form: http://okamoto-kimono.com/about/index.html) 行到入去其實好大,右面有個庭園仔。 然後就可以除鞋入屋啦。 有和服同浴衣揀, 我地揀左浴衣 (因為當時6月都幾熱), 外表其實分別唔大, 只係入面著少層衫, 我浴衣set (浴衣+腰帶+手提包+兵兒帶+腰帶飾物+木屐) 5000円 set頭加 500円 男友浴衣set 4000円 加埋連稅兩個人係10260円。 另外我地仲加錢係影樓度影相, 價錢係2700円連稅。 (photo form: http://okamoto-kimono.com/about/index.html) 揀好咩plan之後就要揀浴衣+腰帶+手提包+兵兒帶+腰帶飾物的款式啦, 其實店員都唔係好識英文, 佢同我講左邊D野要揀,邊D唔揀得, 但我都聽唔明 一頭霧水, 好彩當時有個客人識國語同日文, 然後佢就幫我翻譯下啦。 揀好哂之後就上樓上, 呢個時候男女就要分別去唔同的房度換衫, 要同男友分開立刻慌慌地 haha 個度無獨立房間, 幾個女仔係間房度一齊換衫。 (photo form: http://okamoto-kimono.com/about/index.html) 職員幫你著好浴衣之後, 就可以去格離房set頭。 佢有幾個髮型比你選擇, 真係好難揀,所以就求其篤左個髮型。 Set完頭就可以揀頭飾, 當時都無咩頭飾好揀, 好多都蓉蓉爛爛, 揀個完整無缺就算。 成個look就完成, 然後就落樓下搵番男朋友仔!(男仔一定係換快D haha) 之後就可以去影樓度影相, 影樓就係庭園度的一間屋仔, Package包左兩張相(hard & soft copies)、一本相簿。 攝影師會指導我地擺pose 其實我地的表情非常生硬, 相片質素唔係好高,當係留一個念。 本相簿的質素都幾好。 之後我地就出去行清水寺+瘋狂影相。 下篇繼續講day3做左D乜! ------------------------------ 其他文章: 去大阪玩 之 出發前先興奮 去大阪玩 之 Day1a(電話卡,兌錢,買ICOCA卡) 去大阪玩 之 Day1b(大阪城,黑門市場,固力果廣告板,Pablo) 去大阪玩 之 Day1c (新世界元祖串,章魚燒) 去大阪玩 之 Day2a(環球影城Universal Studios Japan) 去大阪玩 之 Day2b (東心斎橋,遠離遊客區食好西) 去大阪玩 之 Day3a (浴衣體驗,京都清水寺) 去大阪玩 之 Day3b (京都清水寺,浴衣體驗,釜座,丸善,Dalloyau,沾麵) 去大阪玩 之 Day4a (京都伏見稻荷大社,千本鳥居) 去大阪玩 之 Day4b (奈良,進擊的鹿,梅田Grand Front Osaka) 去大阪玩 之 Day5 (關西機場手信,JR大阪locker,Luke’s Lobster) 去大阪玩 之 住宿篇(Best Western大阪心齋橋) 去大阪玩 之 住宿篇(Intercontinental Osaka)