大阪5日4夜行程: Day1: 關西機場->酒店->道頓堀->大阪城->黑門市場->道頓堀->酒店休息->心齋橋搵食 Day2: 環球影城Universal Studio Japan -> 心齋橋 Day3: 京都清水寺 Day4: 伏見稻荷大社->奈良比鹿玩 Day5: 心齋橋最後沖刺->關西機場 ------------------------------------ 上回講到我地係大阪JR買左ICOCA卡, (文章:去大阪玩 之 Day1(電話卡,兌錢,買ICOCA卡)) 然後我地就行去梅田站搭地鐵去酒店啦, 當時係早上5點幾了, 頭班地鐵岩岩好開左。 然後我地就由梅田搭去長堀橋站, 我地頭3晚會住Best Western Hotel Fino Osaka Shinsaibashi, 下一篇blog我會詳細講下間酒店。 放低左行李係酒店, 我地就行去道頓堀的驚安の殿堂行下, 由於當時係早上6點, 周圍咩都未開, 而驚安の殿堂係開24小時, 我地唯一可以去的地方! 驚安の殿堂 地址:〒542-0084 大阪府大阪市中央区宗右衛門町7-13 驚安印象中有5層咁多, 每層都賣唔同的野, 有零食、化妝品、日常用品、電器、名牌產品、甚至成人用品都有! 入面係有lift搭, 每層都有男廁,或者女廁, 行到人有三急都可以去廁所! Love liner唔係間間藥妝鋪有,都幾難搵到,搵唔到可以黎驚安買! 價錢應該係公價黎,我見到其他藥妝鋪都一樣價。 Curel的護膚品 Visee化妝品 DHC的潤唇膏 Shu Uemura睫毛夾 眼藥水 Supplement Dyson 吸塵機 無錯,我大部分影的相都係化妝品!因為我係女仔囉 :P 晨咁早行驚安係無咩人的, 行左個零鐘,買左D野,係門口退埋稅就閃人啦。 --------------------------------------- 然後我地就行左去左固力果跑步男廣告板下面影相, 呢個固力果的廣告簡直係大阪的地標, 我地7點半黎到影相的好處係......唔洗同人爭! 晨咁早係我得地兩個黎呢度影相 lol 去左Family Mart買飯團做早餐, 好多飯團都睇唔明係咩味 lol 求其揀D賣相好的黎食 :D 味道都唔錯啦。 ----------------------------------- 本身打算下午先去大阪城, 但係道頓堀D店都未開、黑門市場咁早都未有野食, 於是乎我地就出發去大阪城先啦! 大阪城有兩個地鐵站都可以去到的, 分別係森ノ宮 同埋 谷町4丁目 我當時係由上圖上方森ノ宮度行去大阪城天守閣, 然後係下面走,行去谷町4丁目搭車離開。 但要行幾段斜路先上到去天守閣, 如果怕行斜路的你, 我建議你搭去谷町4丁目, 個度入去的路程短D, 無咁多斜路。 最後先係森ノ宮的方向走, 行下大阪城公園。 大阪城公園好大, 去完天守閣可以花點時間係度行下。 上完樓梯 仲有幾段斜路 終於都行到上黎!! 當時有D韓國旅行團係度, 當我地想影相的時候, 有位後生的阿豬媽就主動問我地洗唔洗幫手影! 幫我地影完之後, 阿豬媽問我地影得好唔好呀, 洗唔洗幫我地再影! 呢位阿豬媽實在太好人了! 旅行遇到好人,心情都好D。 自拍個天無咁暗。 影完相,岩岩好9點,天守閣都開放比人參觀啦, 我地興趣不大,所以無入到去天守閣。 走的途中我地見到一間修道館, 我地都不忘停低,影張相。 離開大阪城公園, 行去谷町4丁目途中見到NHK大阪放送局, 兩棟建築物夾住個球體都幾特別 ----------------------------------- 去到谷町4丁目, 就搭地鐵到日本橋站。 我地去黑門市場食brunch! (無錯係brunch! 因為我地一陣仲會食lunch lol) 鐘意食刺身就要黎黑門市場啦! 首先就比呢間豆腐の匠吸引左 地址:大阪市中央区日本橋1-21-31 就買杯特濃純豆乳飲先,買左大杯100円。 我就覺得濃得濟唔岩我飲,我都係鐘意飲甜的豆腐。 男朋友覺得好杰,但佢覺得唔錯,成杯飲哂。 然後就去左港人集中地 黑門三平! 地址:大阪市中央区日本橋1-22-25 買左帶子 1500円、甜蝦 480円、海膽 2000円、拖羅 2000円。 最正係拖羅!食完有好幸福的感覺! 之前都唔鐘意食吞拿魚刺身,覺得一 pat pat口感好怪, 但是呢度的拖羅係好肥美的感覺!必食!!!!! 甜蝦同海膽都唔錯,可以一試! 但係帶子真係難食,乾爭爭咁,爭鮮都好食過佢! 另外,黑門三平好在有位坐, 又有水斟黎飲。 買完刺身, 就可以即刻搵位,即刻開黎食! 唔怪得個個都黎黑門三平食野啦! 黑門三平對面就有間藥妝店叫做オーエスドラッグ 地址:大阪市中央区日本橋1-21-3 呢間藥妝店係無得免稅, 但係好多產品都比其他藥妝店退左稅仲要平! 飛滋貼 Curel的護膚品 Pair暗瘡膏 休足時間 我建議大家黎呢度睇左價錢先, 先去其他藥妝店買野。 懶得格價的話可以係度買哂想買的野先。 Day3係黑門市場的丸善食肉店食左好正的和牛,詳情請睇 去大阪玩 之 Day3b (京都清水寺,浴衣體驗,釜座,丸善,Dalloyau,沾麵) --------------------------------- 然後我地就行去道頓堀行下, 道頓堀一街都係藥妝店, 本來鍾意格價的我都半放棄狀態, 藥妝店實在多到.....格完都唔記得邊間打邊間! 最後見到一間價錢唔貴, 有哂大部分我想買的野就一次過買哂佢, 然後退稅! ---------------------------------- 大約12點幾,我地就去左Pablo度食lunch啦。 地址:〒542-0085 大阪市中央区心斎橋筋2-3-15(宗右衛門町通り) 我地堂食,因為都攰同眼訓! (凌晨機的後果) Pablo最出名就係食芝士撻 好多味揀,我地兩個都揀左唔同味道。 我覺得太甜,芝士味唔夠, 無人地口中講到咁好食。 可能外賣會好食D掛?! 總共食左3180円 我地係pablo眼訓到頂唔順, 然後就即係番酒店check in訓番陣, 點知一訓起身就已經7點鐘, 訓左成5個幾鐘,補番琴晚無訓過的覺lol ---------------------------------- Day1實在太多野寫~ 下篇繼續講我地Day1夜晚食左D咩! 其他文章: 去大阪玩 之 出發前先興奮 去大阪玩 之 Day1a(電話卡,兌錢,買ICOCA卡) 去大阪玩 之 Day1b(大阪城,黑門市場,固力果廣告板,Pablo) 去大阪玩 之 Day1c (新世界元祖串,章魚燒) 去大阪玩 之 Day2a(環球影城Universal Studios Japan) 去大阪玩 之 Day2b (東心斎橋,遠離遊客區食好西) 去大阪玩 之 Day3a (浴衣體驗,京都清水寺) 去大阪玩 之 Day3b (京都清水寺,浴衣體驗,釜座,丸善,Dalloyau,沾麵) 去大阪玩 之 Day4a (京都伏見稻荷大社,千本鳥居) 去大阪玩 之 Day4b (奈良,進擊的鹿,梅田Grand Front Osaka) 去大阪玩 之 Day5 (關西機場手信,JR大阪locker,Luke’s Lobster) 去大阪玩 之 住宿篇(Best Western大阪心齋橋) 去大阪玩 之 住宿篇(Intercontinental Osaka)