上篇講到搭Jetstar 凌晨機去大阪 (文章:去大阪玩 之 出發前先興奮) 日本時間凌晨2點就到達關西國際機場 Terminal 1, 過完關 拎埋行李 2點半就出到去啦。 ------------------------------------ 天都未光就到左大阪 點算好呢? 大部份人都會訓機場 等到5-6點去搭頭班電車 但我地就選擇搭通宵巴士去梅田 (因為我地實訓唔到 不如利用D時間出去大阪市區啦!) 架通宵巴士3點鐘就開頭班車, 一個鐘就到梅田啦。 (巴士的資料/時間表:http://www.kate.co.jp/tcn/timetable/detail/UM) 我地唔想咁趕 打算搭4點個班巴士 於是我地係機場搵個位坐低執下野、探索下個機場、買D野食下 出到黎大堂 搭電梯上一層就有M記、Family Mart...... 仲有好多位比人訓! 係Family Mart買左D野飲、零食,總共¥575 芝士獅子狗好好食! 出左機場門口 就有售票機比你買車飛啦 部機都好易操作,我地揀"大阪駅前",然後比錢,就係咁簡單! 價錢係¥1550一個人! 然後就可以去5號乘車處度排隊啦! 上車的時候 職員會問你係邊個站度落車, 我搭車的時段有"新阪急酒店"同埋"大阪Herbis" 兩個站, 我睇左地圖兩個地方其實都好接近, "新阪急酒店"近阪急梅田站, "大阪Herbis" 就近梅田站, 我就是但揀左係"新阪急酒店"度落車啦! 4點鐘準時開車!架車無咩人搭,加埋自己好似有5個人左右! 座位好舒服!一個鐘的車程 訓陣就到啦! ----------------------------------- 買ICOCA卡 5點就到左梅田, 我地當時打算去行去梅田站搭地鐵, 梅田站搭去心斎橋站 首班車係5點15分, 我地諗住買ICOCA卡搭車(類似八達通卡) 但發現地鐵站的售賣機都無得買ICOCA卡! 然後我地行去大阪JR站, 就發現到原來JR站先有得買ICOCA卡! 呢部機寫住"ICOCA購入" 先有得買ICOCA卡! 然後就行番去梅田站搭車啦! (梅田站同大阪站距離5分鐘路到) ----------------------------------- 兌錢方面 話說d Yen我地係係香港兌定先的, 男朋友有恆生戶口, 所以兌錢唔洗手續費, 恆生個rate都幾靚,係跟恆生的tt rate, 我地出發前兌左2次,匯率大約係7.03同6.91。 大家記得:兌個陣set自己要幾多yen, 而唔好set自己用幾多港幣換yen, 因為你都唔想銀行比D零頭yen你架嘛 :P 最後就去總行度排隊拎錢! (總行實有yen比你去拎,其他分行未必有咁多yen) ----------------------------------- 上網卡方面 我地分別係淘寶同鴨寮街買左docomo卡。 鴨寮街docomo卡 鴨寮街呢張係8日卡, 有1.2GB 4G,過左流量係3G無限。 價錢比淘寶貴,印象係$68。 佢送左個MicroSIM的轉換器。 我地用iPhone6s,所以本身的NanoSIM都岩用! 入面有張A4紙的說明書 淘寶docomo卡 淘寶的docomo卡同鴨記個張的外表都好唔同。 我地買左8日卡,每日有200Mb 4G,過左流量係3G無限。 價錢係$43人民幣。 淘寶送的野比較貼心!佢送左唔同size sim卡的轉換器! 重點係佢送埋iPhone個支針!!! 我地每次去旅行都唔記得帶支針, 每次都要搵盡身上尖的野去吉張sim卡出黎 lol 因為呢支針 我加淘寶10分! 淘寶呢張似正貨多D 鴨記裡面同背面都係白色,淘寶呢張包裝會靚D。 仲送左D優惠券!我係關西機場有用到5%個張折扣券! 我同男朋友分別一人用一張,結論係兩張上網的速度都分別唔大, 雖然兩張都係4G,但係速度唔係好快,不過都接受到。 本人建議係淘寶買,值錢平,而且贈品實用。 鴨記可取之處係有張A4正體字的說明書, 因為張sim要上個網先可以啟動到, 完全唔想睇淘寶張卡D字 (你懂的) ------------------------------------ 下篇再續day1 的行程啦! 其他文章: 去大阪玩 之 出發前先興奮 去大阪玩 之 Day1a(電話卡,兌錢,買ICOCA卡) 去大阪玩 之 Day1b(大阪城,黑門市場,固力果廣告板,Pablo) 去大阪玩 之 Day1c (新世界元祖串,章魚燒) 去大阪玩 之 Day2a(環球影城Universal Studios Japan) 去大阪玩 之 Day2b (東心斎橋,遠離遊客區食好西) 去大阪玩 之 Day3a (浴衣體驗,京都清水寺) 去大阪玩 之 Day3b (京都清水寺,浴衣體驗,釜座,丸善,Dalloyau,沾麵) 去大阪玩 之 Day4a (京都伏見稻荷大社,千本鳥居) 去大阪玩 之 Day4b (奈良,進擊的鹿,梅田Grand Front Osaka) 去大阪玩 之 Day5 (關西機場手信,JR大阪locker,Luke’s Lobster) 去大阪玩 之 住宿篇(Best Western大阪心齋橋) 去大阪玩 之 住宿篇(Intercontinental Osaka)