話說之前報名參加左「U Blog x 東華慈善嘉年華 【U Blogger VIP體驗全包瘋狂玩!】」活動,好幸運地揀中左我!!!獎品包括東華慈善嘉年華$180門票兩套、$100代幣兩套 同埋英國皇家雜技馬戲團VIP$480門票兩張!!收到中獎email個刻好開心同興奮,我參加的目的就係為左同男朋友一齊玩刺激的機動遊戲!! 去之前我做左D資料搜集,原來呢個嘉年華的部份收益係會捐比東華三院,以支持東華三院的兒童、青少年同埋低收入家庭服務。各位黎東華慈善嘉年華玩之餘,亦都做左善事,幾有意義的活動,何樂而不為? 東華慈善嘉年華 開放日期:2015年12月23日至2016年3月28日 開放時間:(平日) 3pm-11pm;(星期六、日及公眾假期) 11am-11pm 特別日期:7/2 (年廿九) 11am-12:30am;8/2 (年初一) 3pm-11pm; 9/2-14/2(年初二至七)11am-11pm 最後入場時間:活動結束前45分鐘 地點:前啟德機場跑道 (九龍灣承豐道33號,啟德郵輪碼頭旁空地) 一般門票:$180 (包括:機動遊戲+攤位遊戲$160+入場費$20) 而家東華係免費入場!! 仲推出左全日任玩套票,即係可以全日任玩機動遊戲!小童(3-11歲)$180,成人$220。 ------------------------------------------------------------------------------------------ 我地當日係德福廣場二期,Délifrance隔離的小巴站,搭綠色86號van仔到郵輪碼頭,每程 $5.5,搭左15分鐘到。就到個陣,司機就會問人東華嘉年華有無人落架啦! 到左東華慈善嘉年華啦!! 我地就立刻去左換飛啦。 上面兩張就係馬戲團的VIP飛, 下面兩張卡係for機動遊戲、攤位遊戲同埋美食區比錢的, 玩機動遊戲同攤位遊戲個陣係唔收現金架,要用呢張卡比錢。 用哂張卡D錢可以去充值亭度入錢增值架! 1.遊樂設施 我當時去個陣仲未有全日任玩套票,所以我剩係玩左兩樣野,其他機動遊戲都唔係好刺激,所以就唔哂錢玩啦。 一入門口,就係成個東華最刺激的陀飛輪Tourbillon,$120,全場最貴的機動遊戲。 我地立刻就玩左呢個我最期待的陀飛輪!佢會升上去360度咁轉黎轉去,有一下會有少少腦充血的感覺,臨尾又會有少少頭暈暈,玩完落到地面就已經無暈的感覺啦。好正呢個,鍾意刺激的你一定唔可以錯過,係幾貴,但值得的!! 第2樣我玩的野就係超級紐約滑梯 New York Super Slide,$40。 由細到大都對瀡(音:sir)滑梯有情意結,細個好鐘意玩高山戲場個個好大的瀡滑梯,東華呢度仲要有巨型幾層樓高(33米長18米高)的滑梯,我都一定唔會錯過!!!! 不過呢,玩之前就要行一段斜路上去先,我男朋友就行到嗌哂救命。 上到黎可以睇到哂成個東華嘉年華。 呢個時間,工作人員就會教你點樣捉住個塊氈瀡落去架啦。 另外4歲以下的小朋友要陪同一名成人一齊玩架。 瀡落黎個下好正,比我想像之中瀡得好快,幾刺激,好想玩多次haha。 好啦,我剩係玩左呢兩樣,我用哂剩番的錢黎玩攤位lol。 不過我都有影到其他機動遊戲。 終極跳樓機Free Fall Tower,$80。我覺得同海洋公園個個跳樓機差唔多,所以就無玩。 鞦韆樹Tree Swing,$50。 雙層旋轉木馬Double Deck Carousel,$50。 仲有好多機動遊戲都係適合小朋友玩,所以我就無影到相。 2.攤位遊戲 東華慈善嘉年華有好多攤位遊戲,每個攤位都係有唔同的公仔,總有你鍾意的公仔。 首先玩呢個叫杯中物語Basket Ball,$20有4個波。好得意的熊公仔! 4個籃球仔。 掟到藍、橙、綠色杯先有公仔。好可惜係唔中的! 又係我最鍾意的熊公仔! 之後我地玩呢個叫釣瓶高手Lets Go Fishing,$20,4個機會。 釣住個汽水樽,令佢企係度就有公仔。 望落好似好易,但玩哂4個機會都令唔到個樽企係度。 然後見到呢個攤位有勁得意的雪橇公仔!!!咦,望真D,玩緊手機個個人咁熟面口的? 原來係《鐵馬戰車》個個袁偉豪,我諗應該係拍緊TVB的綜藝節目。 呢個遊戲叫牛奶瓶Milk Gan,$30,6個波。將個波掟落個奶樽入面就有公仔。 呢個真係超級難玩,我地玩左3次18個波都無個中,我地企咁耐都係見過人贏小獎炸! 呢個攤位係冬甩cushion。 呢個遊戲叫做奶瓶高手Spill The Milk,$20,4個豆袋。 開頭以為整冧D奶樽就有公仔,我玩第2次用兩個豆袋就整冧哂奶樽,點知係要令D奶樽跌哂係台上面。好難玩呀,當D奶樽訓左係個盤度,就好難令佢跌落台。 呢個game叫繞道而行Roll-A-Ball,$20,4個波。 完全係靠運氣的遊戲,放個波入去,睇下佢會滾到邊一格,每格有唔同分數,有0,1,5,10分。 我地分別滾到1+10+10+5=26分,換到中獎! 天呀!!我地終於贏到公仔啦!!!!好感動!! 呢個叫擊牌高手Shuffle Board,$20,4個波。 男朋友打中左2個,贏左細獎。又有公仔啦!! 點擊圖片放大 呢個叫狂風浪碟Token Pitch,$30,8個幣。 呢個又係好難玩,要掟銀仔落碟上面,D碟係好光滑,D銀仔都會好易冼走。 我地最後玩的攤位遊戲,叫做爆破汽球Bust A Balloon,顧名思義就係要個球掟爆D汽球,$20,4個球。呢個係考驗你力度的遊戲,無番咁上下大力都好難令D汽球爆呀。 我地整爆左1個汽球,贏左隻鴨仔。 東華嘉年華仲有好多攤位,有D位置好入,或者係迪士尼公仔,所以我地無玩到。 3.英國皇家雜技馬戲團 估唔到嘉年華會有馬戲團睇。 不過呢個馬戲團係無動物,得人表演架炸!呢個馬戲團睇左1個鐘15分鐘,比我想像之中好睇、精彩! VIP:$480(最近stage的位,送爆谷或者棉花糖) 普通飛:$180 坐位係先到先得,不設劃位。 VIP除左好近個stage,有爆谷或者棉花糖食之外,就係享受到VIP的服務。 入場之後就有專人帶我地入去坐位,而且問我地想要爆谷定棉花糖,然後我地安坐係位中,就有人為我地送上爆谷&棉花糖。呢個就係VIP同普通飛的分別。值唔值得貴$300就睇你的個人喜好啦。 我地叫左爆谷&棉花糖各1。棉花糖開場無耐就比我地食哂啦,haha。 呢個表演係幾深刻的,表演者係呢個引力驅動裝置上面行,佢地越行越快,而且無用任何安全措施,甚至係上面做一D高難度動作,例如打筋斗、蒙眼係裝置上面行。 然後再加多兩個成員係入面行,睇到所有觀眾都目定口呆。 另一個精彩的表演,就係兩個美女企係個波上面,行上去個台的最高瑞,然後再行番落黎。 本身個台係好唔穩陣,好似大力D行都會冧落黎,更何況要用個球行上去?! 睇到我地都好緊張。 呢個表演係幾個表演者合力做高難度動作。 佢地幾下就做到呢D動作,做得輕而易舉。 咁低都過到!!! 更低都係三兩下就過到。 電單車手係全世界最細的球體入面揸電單車,主持人話呢個係好危險的表演。 之後再加多個電單車手入去,佢地越揸越快tim呀! 仲有好多精彩表演都未能盡錄!有好多靚女跳舞、表演者同觀眾互動的遊戲等等!! 如果你好早玩完D機動遊戲,我好推薦大家去睇馬戲團! 4.美食街 呢度有個美食街,玩到肚餓可以去醫肚。但係價錢幾貴,我就無買到野食。 5. 免費東東 呢度有個免費抽獎活動。點都會抽到粒Tim Tam,我見到有人抽到一大包Tim Tam! 我抽到2粒Tim Tam,男朋友抽到粒Tim Tam+口哨。 又幾好食喎。 除左見到袁偉豪外,仲見到阿Bob! 最後走個陣,我地搭左205R免費巴士去油塘地鐵站。 總括黎講,東華都值得一去,而家仲要免費入場!!鍾意玩機動遊戲仲可以買全日任玩套票,玩兩次陀飛輪Tourbillon就已經回本!