第3日的行程~ Day3: 礁溪->宜蘭->台北車站 ------------------------------------------------ 今日係酒店食完早餐(詳睇去台灣嘆 之 台北住宿篇(凱撒大飯店)),就由台北車站搭台鐵到宜蘭縣玩! 宜蘭縣我地剩係去左礁溪同埋宜蘭呢兩個站 我地首先去左礁溪,然後去宜蘭,最後番台北 台北車站去宜蘭的車程快則1個鐘多d,慢則幾乎要2個半鐘 ---------------------------------------- ~出發前注意事項~ 大家出發前記得得上http://twtraffic.tra.gov.tw/twrail/ check好搭幾點邊架車 揀番起程站同到達站,然後揀日期同時間,再禁"查詢",就會睇到有D咩車架啦!而且可以去網絡訂票個度訂定車票,到時就唔洗驚無車坐啦! (系統更新左,所以介面已經唔同啦) 我地就搭左呢架自強號的車去礁溪。12點上車,1點半到達礁溪,車程為個半鐘。 我地早大約一個星期上網買定飛,每張NT$183 *記得係香港print埋張"取票單",填番D資料,當日拎張"取票單"去車站就換到車飛架啦! --------------------------------------- 出發 :P 車程成個半鐘 我都訓足成個鐘 lol 到達礁溪了,一落車就發現礁溪到處都有溫泉旅店! 我地黎礁溪的目的地就係為左浸溫泉魚, 我地出發前上網見到有人推介山泉飯店的溫泉魚,所以我地特別去試下啦。 離火車站大概5分鐘路程,但係條路唔係咁好行, 有段路係無行人路,要行馬路,而馬路又多電單車,都有D危險架! 終於行到去山泉飯店! 地址: 262台灣宜蘭縣礁溪鄉礁溪路六段36號 溫泉魚幫你做Spa! NT$100,30分鐘,都唔貴呀! 比錢之後服務員就會比塊毛巾你,然後自行入去浴池 浴池旁有花灑洗腳,有木櫃可以放隨身物件同鞋。 個度有3個池,可能人唔多,所以剩係開左2個池。 一放對腳入去池度,D魚仔就會游埋黎啜我對腳 開頭會覺得好痕 但過左一陣就會覺得無乜野 可能我男朋友隻腳D死皮多D 佢隻腳特別多魚仔游埋去 lol 浸完我覺得隻腳真係好似會滑左! 溫泉魚真係好好玩 大家黎宜蘭玩都要去試下呀! -------------------------------------- 浸完之後我地就係礁溪周圍行下啦 我地經過礁溪地景廣場 呢度有免費的溫泉比人浸腳 好日式的設計 有幾個免費的溫泉 我揀左個無人浸的影相 由於我地岩岩浸左溫泉魚所以唔浸呢度的溫泉啦 行行見到礁溪好出名的蔥油餅 地址: 台灣宜蘭縣礁溪鄉礁溪路5段(湯圍溝公園旁、奕順軒斜對面) 礁溪頂好蔥油餅 三星蔥 加蛋 NT$30 幾好食呢! 之後行左去呢間礁溪溫泉麻糬買手信 門市地址: 礁溪鄉溫泉路62號 總共NT$320 上排係傳統口味:紅豆、黑芝麻、綠豆、花生 下排:紫米和果子、烏龍綠茶、橘香鳳梨、溫泉蕃茄 我覺得麻麻地 唔係特別好食 --------------------------------------- 行完礁溪,之後就搭台鐵去宜蘭啦 宜蘭火車站出面就係"幾米公園" 當時好熱 只係係門口影張相就走了 去左附近的POYA寶雅shopping同涼冷氣,類似香港的屈臣氏, 遲D會再寫個blog講下買左D乜! 行到攰同肚餓 我地就去左間cafe食野 叫做Nu Pasta 地址:宜蘭市光復路22號 我地叫左金典英式午茶雙人套餐 NT$268超抵!! 只不過大概$67港紙!! 仲有送兩杯$45野飲+兩杯特飲!而且唔洗加一! 簡直平到一個點!!!Unbelievable!!!! 港女最愛的afternoon tea! 第一層水果沙律 第二層檸檬芝士蛋糕、Tiramisu、熱情果奶凍 第三層千層pizza、湯勺酥脆薯條、意式香酥嫩雞 騎士烏焙奶(Oolong milk tea烏龍茶奶茶)、波霸珍珠奶茶(呢個原價$50 所以要加$5) 特調飲品,好好飲! 以上所有野加埋係 NT$268+$5=NT$273,大約HKD$68.25 雖然同香港6舊水的酒店afternoon tea係無得比,但呢度的性價比完勝! 野食同野飲都唔差!大家黎台灣都可以去試下,Nu Pasta有好多分店呢! ------------------------------------ 去左宜蘭文學館 呢度好有日本的感覺! 但可惜原來逢星期一休館 無得入去睇 只好係門口影相 ~本日公休~ 繼續再周圍行下 雖然唔係好肚餓 但都去試下宜蘭出名的蒜味肉羹 傳承蒜味肉羹 地址: 260台灣宜蘭縣宜蘭市舊城北路148號 NT$50,真係蒜味十足! 旅遊書推介的木瓜牛乳大王 地址:舊城北路141號之1 木瓜牛乳NT$50,麻麻地,台中逢甲夜市超獨特果汁傳奇的木瓜奶 好飲十倍! (詳睇去台灣嘆 之 Day1 (長榮航空,桃園機場去台中, 逢甲夜市)) 之後我地就行番去宜蘭火車站搭車番台北了 ---------------------------------------- 番到台北車站,臨番酒店之前,我地去左微風度買cake食! 和風賞 手信坊 地址:台北市北平西路3號1樓 被佢地的外表吸引而買黎試下!總共NT$140 呢兩舊和菓子都麻麻地 中間好凍好硬 雖然個和菓子好大件幾抵食咁 但好似係度迫緊自己食哂成件cake的感覺 除左上面兩件cake外,我地仲買左朋友介紹的蛋糕 草莓派+蘋果派蛋糕6吋 NT$400 原本想買草莓派+芒果派,但可惜賣哂! 但呢個蛋糕真係幾正!好足料! 橘村屋蛋糕kitsumuraya 地址:台北市中正區北平西路3號1樓(車站大廳) 蛋糕盒的設計好貼心!底部放置餐具。 大家黎台北車站都可以試下呢! Day 3完~ ---------------------------------------------------------------------------------------------------------- 想收到個blog最新update 記得like Facebook Page https://www.facebook.com/fatbjai.travel/ 其他文章: 大家可以係menu bar度揀《去台灣嘆》的其他文章 去台灣嘆 之 Day1 (長榮航空,桃園機場去台中, 逢甲夜市) 去台灣嘆 之 Day2 (第二市場,太陽餅街,宮原眼科,台中去台北,蘋果工房) 去台灣嘆 之 Day3 (礁溪,宜蘭,溫泉魚,Afternoon Tea) 去台灣嘆 之 Day4 (永康街,度小月,府城,天天利) 去台灣嘆 之 台中住宿篇(理想與現實,Airbnb中伏) 去台灣嘆 之 台北住宿篇(凱撒大飯店) 去台灣嘆 之 戰利品篇 《去台北嘆》系列 一家去台北 之 住宿篇