#Venice, Italy #Pisa, Italy #01/07/2013 一早起身搭火車去比薩, 有機會一定要響威尼斯留耐d, 蕩失下路去下d離島。 Train: Venezia Santa Lucia -> Pisa Centrale (change: 1) Dur: 3:38(2:05+1:10) 0925/1303 £29 Venezia Santa Lucia -> Firenze S M N online advance (e-ticket) £7.8 Firenze S M N -> Pisa Centrale auto ticket at station 點擊圖片放大 +2 比薩呢個小城除左斜塔, 周圍都有唔少歷史遺址, 都幾surprise, 真係完全唔知。 終於見到聞名已久既比薩斜塔, 比想像中斜, 真係有唔明點解未冧既感覺。千里迢迢黎到, 既然唔係真係好貴, 緊係要試下上去塔頂喇, 買左飛未到timeslot就周圍行下先。 去隔離既Cattedrale di Pisa比薩主教座堂, 因為著背心要攞淺藍色既不織布袍著, 門口唔使錢攞, 好彩都唔核突。裏面都幾靚, 有唔少石雕同壁畫, 仲有個天花都好值得欣賞。 點擊圖片放大 +7 對面既Baptistery of St John個外型好靚, 圓拱頂圓形既白色建築。 不過省錢冇買到飛入去。 響意大利當然繼續狂食gelato喇, 各個遊客區食足料既3球都只係大概€2.5, 真係唔肥都幾難。 今次試咗士多啤梨, 檸檬同好朋友極力推介既開心果味(Pistacchio)。 食過兩間都真係幾好味喎, 返香港食唔返, 跟著dryers出咗隻開心果味, 不過完全唔係嗰回事。 點擊圖片放大 +2 行完食完都仲未夠鐘就出去d民居度行下, 唔同色既牆, 綠色既窗, 好繽紛, 令人好開心。行到終於夠鐘上斜塔。 行到入塔入面, 感覺好得意, 好有空間錯覺。行圍住斜塔既旋轉樓梯上去, 因為斜既關係, 明明好細級都有d難行, 好似日本d忍者屋咁。上到頂個景好靚, 因為周圍d樓都好矮, 所以望到好遠。 點擊圖片放大 +5 落返黎響斜塔下面既草地坐下, 遇到一個星加坡既女仔, 佢又係一個人, 仲要係coachsurfing。 一齊傾咗好耐計, 自己一個去旅行, 真係多好多機會同其他既旅人交流。 個女仔話原來比薩唔遠就有個沙灘, 唔出名但都幾靚, 唉呀早d講吖嘛, 咁晏趕唔切去。響google map睇Marina di Pisa真係好靚, 點解我諗唔到去意大利要去下陽光與海灘㗎。又有理由再去過, 哈哈哈! 返hostel附近行超市, 好多好大隻既火腿, 原來比較新既parma ham 唔貴㗎, 講得上幾平添, €25.8就有1kg, 買100g都得㗎, 有嬸嬸即刻幫你切薄片再包好, 跟著就可以即刻食。再買咗個細既melon, melon仲貴過ham, 一於雪凍佢聽日ham and melon! 點擊圖片放大 +3 夜晚決定唔煮, 響大街既cafe試下地道既risotto。 最後幾日黎到咁多好野食既意大利, 決定要放肆一下! 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/