Invisalign 隱適美資料搜集篇: 其實幾年前已經好想箍牙,但係自己懶懶閒;另一方面就係讀緊書冇收入,箍牙大大話話都要用幾萬蚊,所以拖左一年又一年。但係聽好多人講,箍牙真係愈早愈好,一拖就會永無止境。所以,早排終於的起心肝儲錢、問屋企人夾資、做資料搜集去箍牙。 咁多個過程,我認為資料搜集依個環節最重要、最花時間同埋最攰。 當時我都用左個幾月做資料搜集同埋搵唔同醫生consult,先揀好邊間診所,邊個醫生去做隱適美。所以我就分享下個人經驗同遇到嘅困難俾大家參考下。 本人一共搵左三個醫生做隱適美箍牙嘅consult, 包括:長沙灣趙醫生、朗豪坊41樓、 火炭康齒堂游醫生。 1.長沙灣趙醫生 價錢: (免費consult) / 唔剝牙 $38000 /剝牙$48000 有人介紹減$3000 一次過俾晒錢再減$3000 優點: 白金級隱適美牙醫(代表做過好多隱適美個案)、出名 基本上,一google 隱適美就會彈出趙醫生個名,可見佢有幾出名 缺點: 超級多客,多人到waiting room嘅位爆晒位都冇得坐 等待時間極長,就算約左時間最少都要等45分鐘先見到醫生 我約左時間去趙醫生到做consult等左一個鐘先見到醫生,但醫生同我講左5分鐘都冇就走左。 感覺上,佢真係太忙,分身不暇,但仲係不停咁收新客。 之後我聽返d牙醫姑娘講,原來趙醫生有一樣野好自豪,就係可以5分鐘睇完一個客。 我相信趙醫生係好醫生黎嘅,但真係太多客,太忙,所以變到做野好急,每個客得到嘅時間都係好少。 另一方面,隱適美大大話話都要搞成兩至三年,如果每次覆診見醫生都要等咁耐,跟住見醫生又冇時間問問題,咁樣都幾難搞。 所以我冇揀到佢。 2. 朗X坊41樓 價錢: (免費consult) /唔剝牙$38000/剝牙$45000 優點: 服務態度好、環境好 (因為間診所係dx reborn集團嘅診所) 缺點: 超級、極度hard sell 可能因為間診所係dx reborn集團嘅診所,所以個診所經理超級chur 佢會周不時就whats app你考慮好未,俾得錢未, 你話未得,佢就會成日作優惠到期架啦,你再唔俾錢就好,令到人好反感 同埋個價錢好海鮮,任佢作,有時佢同我講$45000,本來話減$2000俾我,跟住轉個頭又話其實係$1000,感覺好黑店 3. 火炭康齒堂游醫生 價錢: (免費consult) /唔剝牙$32000不等/剝牙4隻 $43000 /2隻就更平 有人介紹減$2000/3000 優點: 都算方便、一落火車行2分鐘就到 設備超級新 依部機好似冇幾間牙齒診所有 有左依部機就可以掃瞄排牙,跟住即時模擬到箍牙前/後分別,同埋剝唔剝牙嘅分別 再唔洗咁辛苦印牙模,同埋再唔洗等2個星期睇片先知排牙個效果會點。 游醫生好細心,可能話晒係女仔醫生,佢會幫你睇埋個面形,講出好多仔細位。以上兩位醫生都冇指出嘅野,佢都發現到,所以對佢印象好好。 缺點: 有時姑娘會大頭蝦搞錯覆診時間,或者記錯你係睇邊個醫生 唔包retainer 結果,我就係揀左依間診所做隱適美箍牙。 $43000 ,游醫生做顧問醫生,佢做Consult,箍牙方針佢負責設計; 剝牙/普通覆診就會有自己專屬醫生跟 如果要游醫生跟晒所有野好似要$48000 剝4隻牙的價錢 剝少D牙或唔剝牙會更平 我感覺就係,隱適美大部分都係科技主導,最重要設計治療方案個環節游醫生都做左,咁樣問題不大。 我個建議就係,如果你真係想箍牙請盡快行動。 因為由你consult個日起,要印牙模,等片返,再等牙套返,前前後後要個幾月。 再加埋如果你要剝牙,大大話話要2個月先搞好晒D野上到第一個牙套。 我由2016年10月開始做資料搜集,同展開不停consult醫生嘅日子 直到2017年1月先揀好診所拎到第一個牙套正式剝牙。 ------------------------------------------------------------------------------------------------------- 新手上路篇: 早幾日終於拎左第一個牙套,我總共有46個牙套。 我排牙個情況就係上排門牙哨出黎,同埋右邊側門牙凹左入去。 依個情況係因為牙齒太逼唔夠位生所導致,所以如果想效果理想,最好就係剝牙,上下各兩隻小臼齒。 醫生有講過可以用磨牙代替剝牙,但效果一定冇咁理想同埋磨完可能會有敏感牙齒。 俾左幾萬蚊,用幾年時間,緊係將D野做到最好。二話不說即刻同醫生講揀剝牙方案。 終於到拎第一個牙套嘅日子 醫生會俾依個盒你,入面就係裝住一個藍+紅盒 藍就係俾你日常裝依家戴緊個牙套,紅就係俾你放上一個牙套 跟住醫生就會教你點戴,點清潔 平均每日要戴22小時,食野要除落黎,食完野要刷牙先好戴返。 醫生話我第二個牙套先要剝牙,所以我依家仲係未剝牙。 下一篇blog,應該就係紀錄剝牙,祝我好運。 有問題/需要介紹可以留言。 多謝觀看