寶貝女話成個旅行,最開心就係嚟兒童新樂園,雖然有啲雨,但係歡樂指數不減。 樂園嘅面積唔算大,但係機動遊戲設施好齊全喎,碰碰車、過山車、海盜船、摩天輪、咖啡杯…… 寶貝女仲未係好大膽,淨係玩咗咖啡杯、 旋轉海洋動物呢啲簡單遊戲 碰碰車喺爸爸陪玩之下,當然係超刺激啦 ~ 由於機動遊戲係按人頭收費,每位TWD20,而且係用悠遊卡俾錢,所以入場前記得增值喎 ! 雨開始大,我哋就走咗入室內遊戲範圍,真係大人小朋友都啱玩。裡面有一個好大嘅球池遊戲場,download樂園嘅app就可以預約,每節玩45分鐘架,真係可以玩到攰先走。 除咗有一啲平時去冒險樂園玩到嘅遊戲之外,仲有媽媽最鐘意玩嘅太鼓達人,又有爸爸鐘意玩嘅孖寶賽車。 室內遊戲一個代幣TWD5,每個game都只係3~4個代幣,而球池遊戲場仲要係免費架! 由於我哋去玩嗰日係番學日子,而且有雨,所以每個遊戲都唔駛排隊,連埋lunch都只係留咗4個鐘,已經玩晒大部份嘅遊戲喇!咁好玩,寶貝女話下次一定要再去呀!!! •台北市兒童新樂園• 捷運士林站轉乘樂園1號車 入場費: 成人 TWD30 6歲或以下及65歲或以上免費 ~希晴媽媽與寶貝女~facebook連結