[24-8-2014] 我哋番嚟喇!! 今次係我哋嘅第一次郵輪假期,過程尚算滿意啦,不過對於喺五星級酒店工作嘅爸爸嚟講,食嗰方面真係搞唔掂,冇法啦! 作為一個生活學習主義嘅媽咪,當然唔會參加趕鴨仔團,我要同老公同寶貝女慢慢感受城市,所以,喺高雄落船嘅3、4個鐘,我哋只係去咗一個地方~六合夜市。對於升K2嘅寶貝女嚟講,雖然到處都係繁體字,冇咁陌生,但係lee個城市俾我哋嘅感覺實在太唔同喇,所以我哋要 「找新奇、找不同」,由媽咪嗲哋嘅lee個問題開始 「咦?你睇吓啲的士係咩色嘅?我哋香港嘅的士係咩色架?」(夠簡單喇掛……) 簡單嘅遊戲學得啲咩?觀察、感受、表達樣樣齊,難度仲可以自己調較,好好玩架! 捷運 買飛嗰陣,我哋先知原來6歲以上先要買飛喎,而且出嚟唔係一張飛,係一個膠coin嚟架,寶貝女就好新奇咁左睇又睇,仲要話:真係dood到架,超可愛! 貨幣 媽咪俾咗個50蚊台幣嘅硬幣俾寶貝女睇,請佢留意吓係幾錢,佢開頭話係5蚊,我就再叫佢睇清楚,佢話:「吓?50蚊?香港嘅50蚊係紙嚟架喎!」佢又覺得好新奇喇! 食飯 寶貝女好鐘意食白飯,去到夜市食海鮮嘅時候叫咗碗白飯俾佢,食完兩啖佢就話:「媽咪,台灣啲飯都唔同架!」(果然係佢老豆個女……) 交通燈 你睇吓出面啲交通燈?寶貝女即刻望出去:「咦?有數字嘅?」(媽咪扮晒大驚小怪,哈哈哈哈……) 我又問:「俾司機睇嘅嗰啲燈好似又有啲唔同喎!」哈哈,佢都留意到:「係喎,打橫架喎!」 3、4個鐘嘅遊覽,一件又一件嘅小事都令我記憶猶新,佢對新事物嘅好奇心,加埋佢平日有留意身邊嘅事物,lee一切都已經夠我感動喇!咁究竟佢大個咗仲記唔記得佢去過高雄lee個地方?已經唔重要啦,最重要係個過程啫!