而家整呢篇網誌實在係啱時候喇,因為正係大學生準備開學嘅日子。喺整理緊dorm呀、去O Camp呀、甚至參加社團上莊嘅時候,有冇諗過其實off campus都有好嘢食?今次就會專注喺我大學時期最常去嘅韓國餐廳啦。 小弟我呢,就讀多倫多大學(聖喬治校區),話易入唔算易,話難讀都...過得去啦。今次呢篇係主要俾而家喺嗰度讀書嘅網友們!(無論土生CBC嘅、移民嘅、定留學生嘅都適合!) (謎之聲:如果吾等港人將港式大學開飯文化,例如開sem飯、勁過飯之類帶去多倫多,都係一件光榮嘅事。) 今次要介紹嘅,係當時我同大學團契嘅師弟師妹們最常去嘅「飯堂」:Seoul Restaurant! Seoul Restaurant位於多倫多市中心嘅韓國街,即Bloor街西面。除咗地鐵方便外,泊車位都足夠嘅。主要食韓式火鍋!三四個人分享一個鍋係非常平常嘅事! 嗯,睇嚟要攞番咸豐年前(喂!)啲相睇囉!當然,而家仲有供應添! 點擊圖片放大 梗係未熟啦!熟咗就開餐啦,仲等乜嘢吖? 當然,啲煎餃子好香口。 如果每人平分大概六七蚊加幣落樓。當然可以額外加錢加其他嘢上去。 不過咁,喺天氣凍嘅時候叫一個火鍋去share,都係我嗰時嘅集體回憶。 Seoul Restaurant 621 Bloor Street West Toronto, ON M6G 1K8 +1-416-532-9669 (最近地鐵站:Bathurst) 第二間嘅係其實我畢咗業咁耐先去過一次嘅The Original Gyro Grill!平時揸車實經過,但係冇機會食。 咁話說我同仲留喺多倫多嘅師弟師妹去gathering暢談香港事(咦,講呢啲!),咁其中一個介紹就去呢間食晚餐啦。 Gyros,港式空耳「依勞士」也,為希臘嘢食。啲肉係打棟咁削,放落pita包度,通常混合蕃茄、洋蔥、同希臘乳酪醬tzatziki食。 今次叫嘅,有羊肉啦、豬肉啦,甚至炸魷魚都有! 點擊圖片放大 +2 好味呢? 都算多種類揀,不過價錢唔平,預十蚊加幣起跳,但係超飽肚同勁惹味! The Original Gyro Grill 4 Walmer Road Toronto, ON M5S 1X2 +1-416-923-0700 (最近地鐵站:Spadina) 番外篇:冰臨城下之我見 近呢幾個禮拜全民冰臨城下為同漸凍人相關嘅機構籌款啦。孤勿論係潮流興玩玩吓定真心籌款,咁的確有達到宣傳功效嘅。小弟亦都預咗私底吓被邀請啦,不過我唔用冰水兜頭淋,而係... 星巴克綠茶星冰樂(改荳奶加朱古力忌廉!)(係呀,原味忌廉用哂) 其實除咗漸凍人之外,心臟病患者都係值得去關注喔。唔講你唔知,最死得人多嘅病...就係心臟病。 所以呀,各位網友,你哋都可以考慮捐去同心臟病研究有關嘅機構度㗎!以下機構可以作為參考同埋捐款對象: 香港: Hong Kong College of Cardiology 兒童心臟基金會 加拿大: Heart and Stroke Foundation Peter Munk Cardiac Centre