在Derawan第一晚已經比到我哋一個好大既驚喜,所以對來緊既行程充滿期待。來到哩種海島旅遊,行程不外乎參加當地人搞既外島遊。好幸運在到步當日就認識了一對來自西班牙的情侶,並邀請我哋來緊幾日都一齊參加Local Tour,因為當地參加Local Tour就係book一架快艇出海,四~五個人攤分價錢最划算! Derawan外海仲有數個小島,其中最著名係Sangalaki,Kakaban和Maratua。第一日既local tour我們選擇去Kakaban和Sangalaki,其實好彈性,因為自己包架船,想幾時出發,想去邊個島,想島上停留幾耐都可以自己選擇和決定。因為由香港來到哩度果24小時真係令人身心疲累,所以選擇第二日下午先出船! 第一個島去Kakaban,航程一小時。出船時天氣不佳,果一小時航程都好痛苦下。快艇好細,連埋駕駛最多坐6個人。速度飛快,係有浪既時候顯得哩架船仔好脆弱,成個鐘都感覺個身體不斷彈下拋下,個Hip位絕對唔好受!在快艇在海面上乘風破浪既同時,不斷吸引到些飛魚跳出海面,在快艇旁飛行,時間可以持續幾秒,都真係前所未見! Kakaban島最著名就係有個島內湖,由雨水形成,而湖內生活著數量極多既無毒水母。(水母湖係世界其他地方都有,以我所知最著名既水母湖係係帛硫)湖中既既水母相信係好耐以前與外海向通時由大海進入,經歷左唔知幾多年,水母既有毒觸鬚因為在無任何天敵威脅下已經退化,亦所以可以大量繁殖而佈滿整個島內湖! 落船後由一座水上橋走入樹林,個樹林既景色都好迷人。走去湖邊既小路都係以木搭成既通道,走五分鐘就到。湖水呈通透既綠色,湖既面積都好大。急不及待戴上mask就跳入湖水,係哩個湖水游水係唔可以著fin,因為Fin好容易對水母造成傷害! 第一次係湖度浮潛,水既透淨度唔算好高。但水底水母清晰可見,係我哋落水位置數量唔算好多,身邊可能只有幾隻圍住。但游遠少少,身邊水母數量越來越多,搞到每次身體擺動都好驚傷害到水母。哩D水母無毒既,可以用手觸摸。摸落去手感好得意,又彈又滑唔識形容。水母體型有大有小,上部不斷有規則的跳動,好似人類既心跳咁!雖然見唔到這種神秘精靈既感官地方,但都好似可以感應到我哋哩D外來者而又好奇咁圍住我哋。水母身軀呈半透明既橙色,在綠色既水裡特別顯眼,形成既景色非常壯觀!在某些位置可以見到湖底,湖底被水草覆蓋,在深綠色既水草上見到無數反轉左身軀既水母。原來這種奇妙既精靈都會有休息既時候! 點擊圖片放大 在水母湖既體驗好美妙,真係令我哋樂而忘返。但我知道係哩個群島還有其他更龐大更優雅既海洋生物等待我哋去探索! 第二站係Sangalaki,係達拉灣最著名海島景點。再未登島之前,先在海島周邊探索一群神秘而且身型龐大的黑色身影。 Manta Ray, 中文學名鬼蝠鱝,俗名飛魴仔、鷹魴,或者大家所知既魔鬼魚!身型扁平,體背面淺灰黑色,腹部淡白色,但都有少數背部和腹部可以呈全黑色。尾細而長,無棘刺。巨型Manta翼展可達9米,體重可達3公噸。個口超級大,主要都係吸食海中浮游生物為食糧。我哋對哩種優雅既海洋舞蹈員既期待和盼望,相信任何潛水員或喜愛海洋的人都會感同身受。 上次係石垣旅遊,去潛水都係為左一睹這個美麗舞者真面目。可惜唔好彩,在佢哋所話既Manta Point水底停留左40分鍾連條大少少既魚都見唔到。 今次終於有幸可以一睹這種巨型海洋舞者真身,仲要係一群,OMG! 由水母湖過來大約20分鐘快艇時間。係水面已經見到龐大的身型,令我哋不得不即刻跳落船。海裡水流超強,完全控制唔到,只能放軟身體,隨著水流浮動。在海裡面見到Manta優雅在身邊游過,佢吔面向同一個方向,張這大口逆流而游。海水能見度好高,可以見到海底大約有15深度。那群manta有些係水面,有些係深水位置游過。牠們非常優雅而又富有節奏感的擺動雙翼,扁平而又流線型的身軀好像在隨大自然的樂章翩翩起舞。可以和這種美麗而且巨大的海洋生物可以咁近距真係非常震撼! 當地人稱哩片海域為Manta Home,每一日都會有一定數量既Manta在這個地方覓食。因為這個海域地形和地理位置關係會不時形成強勁海流,海流中會有大量的浮游生物,就是Manta既食物。而且強勁既水流也可以沖走牠們身體上的寄生物,好像一個Manta既清潔站。 點擊圖片放大 +2 我哋在海裡停留左5分鐘左右,隨著海流消失,Manta群就消失係視線之中。船家立即叫我哋上船,極速開去第二邊。再次跳落海,再次在水裡興奮大叫。就咁追逐Manta,上水落水左4、5次,直至筋疲力盡先離開這片海域。 少少安全tips,當第一次跳入海中,感受到前所未遇的強勁水流。就算水性幾好,幾多經驗。都完全抗衡唔到大自然既威力,所以唔適合不熟水性的遊客。另外在水中不要嘗試追逐Manta,雖然佢哋望落去游姿優雅緩慢,但實際上速度超快。嘗試追逐會浪費體力之餘,更可能游離快艇,構成危險。最好都係隨著大隊,順流而去,欣賞逆流而來的manta張著好像可以將人成個吞落肚既大口係面前衝過來。另外強勁既水流夾雜住好多浮游生物,如果皮膚敏感既人(好似我咁)接觸到,好容易會令皮膚產生痕癢與紅腫。所以建議穿著長袖潛水衣或水上活動衣服先至落水,但穿著衣服可以減少皮膚與海裡浮游生物接觸既機會之餘,仲可以抵擋陽光。 一日遊仲未完ga,想知哩個神秘海島Sangalaki仲有咩獨特之處,就繼續緊貼B&W Travel Life! FB:B&W Travel Life Website: bwtravellife.com