踏入秋天又是芒草盛開的季節。 見到日本妹韓妹喺IG上狂post芒草照,令Nuts又有點懷念大東山上一片暖黃嘅芒草海。 結果今年10月底又再挑戰大東山! 由東涌市中心搭3M/11/23號巴士至伯公坳下車牌(大概15分鐘車程), 下車後沿指示牌登山。(**小心行錯對面鳳凰山!) 大東山可以話係Nuts行過(其實也不是很多XD)數一數二難行嘅山!! 由伯公坳至大東山山頂大概需要2.5小時,當中超過一半時間都係要上樓梯,重點係大部份樓梯都好大級好高(見圖)T_T 少啲精力都唔得。 不過行到半山見到好靚嘅一大片芒草海,就覺得幾攰都係值得DER~ 上次因為太大霧上唔到山頂,今次終於成功登頂喇!!!!!!! 以下係Nuts小小嘅影靚相心得,同大家做小小分享: 1.利用景深效果拍出意境照 點擊圖片放大 「景深」其實就即係前清後矇嘅效果,用相機嘅話以「大光圈」、「長焦端」再用距離就可以做出「景深」效果。今次Nuts就用咗「定焦鏡」去影,效果會更好架~ 2.借位影出置身芒草海中嘅效果 絕對唔建議大家踩入芒草海中! 因為會踩斷芒草… 如果想影出「仿如置身芒草海中」嘅效果,其實都可以行入小路,再借助距離去影出架! 3.一定要等埋日落! 影相構圖極佳 點擊圖片放大 大東山嘅日落真係超級靚! 除左可以照到芒草金燦燦之外,更加可以借助個咸蛋黃影出背光剪影、逆光美照^^ 不過日落後個天黑得好快,掛住影相都要記得預留時間落山呀! (記得帶電筒~) 影相還影相,千祈唔好因為想影靚相就去破壞芒草,更加唔好帶仙女棒上山點,好容易會做成山火!!!!!! 仲有要自己帶走垃圾,注意安全呀^^