偶爾喺網上見到西環開左間新嘅小店有泰式船麵食,向來鍾意瓹窿瓹罅搵平靚正好嘢食嘅Nuts緊係唔會放過啦!見星期5唔洗OT就即管去試試佢~ 小店位於香港大學站b1出口附近,大約7點半去到已經排長龍。店面裝修都幾有70-80年代懷舊FEEL。等到悶悶地,冇野做都可以透過窗仔睇下師傅煮麵。 等咗20分鐘左右終於有得入座喇!環境算乾浄,有5張大枱,不過坐得有小小迫。 食物款式唔算多。嚟到緊係要食佢嘅招牌船麵啦,新開業優惠每碗$20! Nuts揀咗MENU推介嘅遊泰國遊(豬肉船麵) 配金邊粉(另可選米粉/河粉/粉絲/黃麵)。同泰國一樣,呢度嘅船麵都係細細碗,啱晒細食嘅女仔! 豬肉船麵湯頭食得出係用咗中草藥熬製,香得嚟又唔會太鹹。配料亦都唔少,有豬潤、豬肉片、通菜等等,成個配搭都好啱Nuts胃口。 食船麵唔夠飽仲有海南雞飯($25),雞肉嫩滑,可惜上枱時已經係皮肉分離有少少扣分。飯係油飯,整體不過不失,對得住個價錢。 另外都叫多咗兩個小食 – 酸辣鳳爪($25)同炸蝦餅($30)。鳳爪冇咩特別唔多講,炸蝦餅反而有驚喜! 蝦餅炸到表層脆卜卜,咬落去好彈牙,但又唔會成口油,正! 點埋泰式酸辣醬更加惹味,即時想encore多碟~ 最後叫左兩串豬頸肉串燒($15@1)真係好後悔!!! 豬頸肉好似冇燒過咁,完全冇燒完應有嗰種香脆嘅感覺。Nuts同同行朋友都覺得串豬頸肉唔係幾熟咁…不過個汁都幾香花生味嘅。 最後兩個人埋單$130,雖然唔係好飽,不過泰國菜嚟講都算抵食。 下次行開呢頭都會再幫襯,但串燒就不了! 666泰船麵 地址: 西環德輔道西366號中亞大樓地舖