喺銅鑼灣呢啲旺區,閒閒地食餐飯都要成$50先落到樓~更何況要鋸扒呢? 咁你就錯喇!喺銅鑼灣鋸個扒分分鐘平過你食碗車仔麵架… 喺渣甸街一間樓上舖茶記只要用$53 就可以鋸到扒~Nuts食過幾次,質素仲唔伏架!(當然,如果你食慣A5和牛就唔係咁講啦…) 有雞扒、牛扒、雜扒、豬扒、龍脷5款揀,價錢都係$53 – 56。留意返呢個價錢係唔包野飲架,可以加多$9跟凍飲。 呢度5款冠軍扒除左龍脷之外Nuts全部都食過,次次嚟都keep到水準。今次就決定食個雜扒,咩都有啲啱晒貪心嘅人。 熱辣辣鐵板上枱,「炸」一聲淋上黑椒汁,忍唔住開餐先喇! $56嘅雜扒餐意料之外咁豐富,有牛扒、豬扒、火腿扒、雞全翼、腸仔,仲有薯條同椰菜,夠晒大份! 扒類好稔,唔會硬實實咁,配埋濃稠嘅黑椒汁,雖然唔可以話係好好食,但味道都絕對對得住個價錢有突。薯條略嫌稔左啲,但吸收左黑椒汁個味好夾。 唔夠飽就可以+$10追加個意粉/白飯,意粉上枱時已經係涼左,建議擺落鐵板熱一熱先食。 餐廳唔收加一,扒+凍飲+意粉埋單都係$72,鋸扒嚟講都幾抵食。有時平平地同男女朋友嚟鋸返個扒,其實都幾浪漫呀~唔一定要食貴野既! 新聯威餐廳 地址 : 銅鑼灣渣甸街54-58號1樓