< 吉隆坡﹑檳城﹑怡保8天遊 > 第八天 終於到左返香港既日子,今日要由怡保坐車到吉隆坡再轉機返香港,時間緊迫一早就出發 離開怡保之前,想去怡保好出名既「天津茶室」食早餐,可惜七點三黎到竟然未開門,早之前一晚就黎啦 怡保人又會咁遲都未起身,街上大多數餐廳都未開門,得啲印度餐廳開左;早餐食唔成,只好返hostel拎行李離開lu 早左到火車站,天未完全光 怡保好似周圍都見到貓 冇見好耐既紅色郵筒 預先係網上訂好火車飛,print出黎就可以當車票用,而家坐定定等上車就得 火車到之前有職員通知大家出月台等車 火車都幾靚,一定好過上次坐個部通宵車 車上乾淨座位又闊,感覺會坐得舒服 可惜應該係我太早訂飛,訂左一號位出黎,即係要面壁思過而且係頂腳,幾辛苦先挨過兩個半鐘車程去到吉隆坡;一路坐車一路食埋半個打門抽當係早餐 去到KL Sentral車站仲有小小時間,係locker放低背囊出去行個圈 坐一個站地鐵去到Pasar Seni站 黎到吉隆坡中央市場,其實冇咩特別,就好似女人街咁賣啲旅客野 點擊圖片放大 +3 中央市場旁邊係茨廠街,即係吉隆坡既唐人街,未去都估到係賣遊客野既地方,見未去過都去打下卡到此一遊 外國既唐人街永遠都掛晒紅燈籠,唔怪得外國人會覺得香港都係周圍有紅燈籠啦 點擊圖片放大 朋友推薦呢個冬瓜茶一定要試,飲完覺得好好飲,而且個人涼左好多,之後食完野我都有買多杯黎飲 茨廠街對我黎講冇吸引力,時間唔多已經去唔到其他地方,見小食中心有位坐又唔洗曬太陽就入去坐下 有好多野食選擇,諗起今次冇食過咖哩麵就試下啦,我鐘意食咖哩 食完買多杯冬瓜茶就走啦,差唔多時候去機場 咁多人食豆腐花? 龜苓膏都有 行返去Pasar Seni站上地鐵,見到遙遠既雙子塔 點擊圖片放大 係KL Sentral仲有小小時間行商場 坐巴士去機場,平過坐火車好多 早左兩個幾鐘到機場,班機又寫住delay35分鐘,即係仲有好多時間 KLIA2本身都算係個商場,買又有食又有可以行好耐,不過我都冇野想買,快啲入去坐下睇下飛機仲好 點擊圖片放大 禁區入面都有好多野食 咁早入黎其實係為左食大力水手炸雞,香港機埸個間長期都超多人,多數冇咁多時間排隊,呢間就人影都唔多個;咁多時間慢慢食都得,頭先食左麵其實唔肚餓,但點都要食一食先安樂 食完仲有好多時間剩又再四圍行下,行行下就到左登機位置 點擊圖片放大 班機delay再delay,差唔多遲左一個鐘先上機 為左睇風景揀左近機尾窗口位,可惜今次揀錯啦,個窗唔係係座位旁邊,而係近前面座位位置,要睇景只可以伸前個頭睇 飛機好快由郊區飛到吉隆坡市區,望到吉隆坡塔同雙子塔,再飛到雲海之上,最後入左大霧咩都見唔到 點擊圖片放大 +2 見好耐冇食過飛機餐,買機票時順手訂左飯,今次麻煩啦已經食到好飽唔想再食野;個飯好香相信好多乘客都聞到,都係唔好放係道引誘其他人,快手食左佢算,辣辣地幾好食 差唔多十點返到香港lu 好多謝朋友邀請我到馬來西亞,冇佢就冇今次旅程,更加食唔到咁多馬來西亞美食,感謝x10000;今次旅程好順利,日日都玩得開心,希望下一個旅程都係一樣玩得開開心心啦 < 吉隆坡﹑檳城﹑怡保8天遊 > < 完 >