< 雲南大理﹑昆明6天遊 > 第三天(績) 坐上去下關巴士,向住又美麗又神秘既喜洲出發,雙廊有緣再見! 喜洲位於洱海西邊,由雙廊到喜洲大約27公里;我坐既巴士因為要接送乘客去較遠地方落車所以兜耐左,由上車到喜洲落車用左一小時十五分鐘(如果直接由雙廊去喜洲就唔需要咁耐) 上車出發!雙廊去喜洲車費九蚊 車上掛有當地民族特色裝飾,幾特別丫 因為要接送乘客,所以沿洱海邊行多左一段時間,咁仲好啦可以欣賞洱海風景,不過天氣就麻麻啦,成個天都係雲,少少陽光都冇... 路過琴日熱鬧既市集,今日好多地方已經人去流空 一路睇風景,經過個幾鐘車程終於來到喜洲,可能喜洲吸引力唔大,車上就只有我同朋友兩個人落車 「喜洲位於大理古城以北18公里處,東臨洱海,西枕蒼山,喜洲是重要的白族聚居的城鎮,這裡有著保存最多、最好的白族民居建築群。從佈局上看是典型的“三坊一照壁”及“四合五天井”的白族庭院格局。」 喜洲好大,除左遊客經常到既喜洲古鎮之外,喜洲仲包括附近好多條鄉村,有啲鄉村距離喜洲中心幾公里遠,所以村民會用馬車作為交通工具,馬車經過身邊時會聽 到馬蹄聲,感覺就好似返左古代一樣;我去過其他古城都未見過會有咁多馬車係城中心穿梭,估唔到喜洲呢道會有咁多,而且呢啲馬車唔係為遊客而設,而係當地人 生活一部份 點擊圖片放大 落車後先唔理咁多其他野,穿過小巷直接去到喜洲古鎮中心 位於古鎮中心既牌坊 咁心急來到中心就係想搵野食咋,見到有間小店就入去食午餐 今次叫左碗沙鍋米線,味道ok啦 對上一次食沙鍋米線已經要數到幾年前係香格里拉食啦;沙鍋米線一般都比普通米線貴,不過都只係十蚊碗好抵食 米線店旁邊就見到喜洲最出名既美食「喜洲粑粑」,全部新鮮即場泡製一定好好食!不過今日暫時唔食住,留返聽日慢慢品嚐 點擊圖片放大 影出來咁黑白feel 聽日先返來搵你,而家要向洱海邊進發 由喜洲古鎮中心行去我今晚住既洱海邊「金圭寺村」都唔近架,路程大約4公里;唔想行既話可以選擇坐馬車,又可以坐三輪車,好多人仲會踩單車去,而我就想一路行一路睇風景,所以就選擇最慢既方法--行路去,預計個零鐘就可以行到 食飽米線買多支可樂就出發啦! 古鎮好多地方都有得食喜洲粑粑,不過最出名都係頭先見到個檔 行左一分鐘,附近已經冇晒人啦...喜洲本來已經少人到,而且好多遊客來到喜洲都會被車到新開發既「喜洲嚴家民居景區」,到古鎮既人唔多,所以古鎮就係咁 冷清...喜洲古鎮有個有趣既地方,就係古鎮之上見外國遊客可能比中國遊客更多,真係有好多外國人來到喜洲,呢樣係有原因,等我遲少少再分享一下啦^^喜 洲古鎮比我既感覺同未黎之前幻想中既喜洲好唔同,不過都係唔理咁多住,要繼續趕路 建築都唔睇住,趕路重要 點擊圖片放大 好漫長既路丫 我就係想睇呢啲咁靚既自然環境啦,好多農田 農夫們好努力插秧,加油 繼續向住望唔到盡頭既路前進,總會去到目的地既 好環保既路燈 好多地都仲未插秧,如果遲少少來到就可以見到放晒水既農田,到時候一定靚好多 點擊圖片放大 +3 耕田真係好辛苦,每一粒米都得來不易,加油!加油! 點擊圖片放大 +5 佢地又有單車踩,又有電單車坐就好啦,坐車好快就可以去到 已經行左一半路啦,突然有三輛車走過來開價五蚊載我去,就係咁我就上左車啦;部車開得好慢,但點都快過行路既 去到村口空地就可以落車,部三輛車又舊又爛,幾驚佢開開下壞車...好恐怖 如果係坐馬車就好啦 呢道環境咁靚,有新人山長水遠來到影婚莎相 先唔去睇風景住,去客棧放低背囊先,今晚就住係芒果小屋;以我所知金圭寺村呢道就只有兩間可供住宿既客棧,而芒果小屋就係最出名個間啦,係村口就有指示教人行入去 由村口去芒果小屋好近,幾分鐘就可以行到 一行入門口就見到好多好靚既紅花 客棧係傳統白族建築設計,亦即係「三房一照壁,四合五天井」;白族房屋用四方形設計,正中間有一幅好似大屏風既牆,就係照壁,而對正照壁就係正房客廳,客 廳兩邊係房間,客廳房間成一個U字型設計;照壁同正房﹑兩邊房間中間係一個天井,所以就有以上「三房一照壁,四合五天井」呢句說話;好多時「照壁」上都會 鑲有自然山水圖案既大理石,所以特別靚,而照壁都有實用既地方,就係反射太陽光,將天井院子都照得光亮 呢道天井幾靚架,種左好多花,感覺好舒服 點擊圖片放大 有隻又得意又怕醜既貓仔,行去佢道佢會走得好快 點擊圖片放大 +3 好靚既木雕 我間房就係開住門個間啦 我住既係六人房,只係25蚊超平丫!今晚冇其他人住所以我自己一個霸晒成間房!今日成間客棧都唔多住客,連我在內都只係得四個人咋,夜晚非常寧靜 休息左一陣就出去;一出來就見到咁靚既風景,有山有水有天有海,仲有咁多植物,真係好靚(其實呢兩日相機setting一路都係錯,影出來顏色有少少奇怪...) 點擊圖片放大 又見到佢bor 經過三棵大樹,向前行就係海舌半島 海舌半島伸入洱海中間,三面環海,我相信環境一定好靚 天氣唔錯bor,係雙廊時成個天都係雲,而家見到藍天啦;沿路兩旁都係農田,原始又美麗既自然環境 點擊圖片放大 +5 又藍又綠,好靚既對比 行行下發現有條小路通去外面,即刻出去望望先 行到出來啦,咁多垃圾既...仲好多烏蠅 不過風景又真係幾靚架,唔同既綠色好有層次感 點擊圖片放大 淺綠色地方其實係水黎架!因為呢道係濕地,所以水同陸地交界唔明顯;大家都係綠色,行既時候就要好小心,一個唔留神隨時下一步就會踩左入水中間 對岸就係雙廊,南詔風情島好明顯啦 一片片綠色既海水 有藍有綠都幾靚架,影多張相先 上返大路繼續向前行 去到海舌公園入口;海舌公園唔需要收費,可以隨意進入 點擊圖片放大 入口附近種滿好多大樹,有人突然係樹上摘左呢個落黎比我食,唔知係咩呢 點擊圖片放大 沿左邊海邊望望,可以望到洱海西岸既喜洲﹑蒼山等等景色 點擊圖片放大 +4 岸邊有好多樹枝 繼續向半島最尖尖既地方行出去 越行出去就越少樹 望住海景吹吹海風,真係好舒服 點擊圖片放大 +4 地上有好多貝殼 草都好特別 終於見到有小小人啦,由入來海舌半島到行到出來,見到既遊人兩隻手數得晒,呢道終於有返小小人氣;海舌半島就係一個咁寧靜既地方,想靜靜地睇風景呢道岩晒;由喜洲古鎮行入來有小小遠,如果踩單車就正 行到去海舌半島最尖尖既位置啦,三面都係海景;不過唔可以行太出,啲泥已經濕濕地,再行出去隨時踩左落水! 望住又藍又綠咁靚既自然環境真係好舒適 點擊圖片放大 樹既造型都好特別 點擊圖片放大 +2 有好多應該已經枯萎既樹木 點擊圖片放大 睇到咁上下,又係時間離開啦 點擊圖片放大 +2 影多張360度相就走啦 來既時候行左邊,而家走就行右邊,可以望到洱海東岸風景 點擊圖片放大 +4 呢邊海上都有好多樹枝 點擊圖片放大 +4 唔知佢係道做咩呢?對岸起好左高速公路,望落去冇咁靚tim 出返來門口,海舌公園已經行晒啦 出返來又可以見到綠油油既農作物 蒼山頂都冇晒雲啦,可以睇清楚蒼山真面目 天氣變得好快,坐車來喜洲時天空好多雲,而家就係咁靚既藍天,我都幾幸運丫 繼續欣賞咁靚既農田 點擊圖片放大 +4 行到返來呢三棵大樹道,亦即係之前落車既地方啦(啲樹真係好大棵) 同我一齊來喜洲既朋友要坐夜車返屋企,所以就坐三輪車離開啦,再見 得返我一個人,係時候繼續去睇靚景啦,沿環海西路行 有艘小漁船撤網捉緊魚bor,洱海有好多海鮮出產,唔知好唔好食呢? 點擊圖片放大 +3 呢位伯伯好辛苦,連個人都要企係海之中,咁深水行步路都唔易架 呢道竟然有乳牛!大理有咁多特色奶類制品,有乳牛都唔奇怪掛? 四圍影下海 點擊圖片放大 +3 係道踩單車一定好正,條路又冇車又靚,風景就更加靚 點擊圖片放大 呢隻係咩雀仔呢?海鷗夏天應該飛走晒架? 行左一陣都係先返去客棧休息一下,而家已經係6:15但仲係咁好陽光 點擊圖片放大 係客棧hea左半個鐘,到6:45就出去食晚餐,都已經差唔多七點天空依然咁藍,太陽伯伯仲未想收工咁bor;想食野就要出返去村口空地,全村就只有呢道一間餐廳同兩間士多有野食咋 我就揀左呢間小小既餐廳,坐係店外對住靚景開餐;十零度真係好舒服,空氣又清新,坐出面就最好 又係食米線 呢碗米線只係6蚊咋,真係好平!而且米線冇偷工減料,成碗都係配料,無論係米線質地抑或味道都係咁好食,比起午餐食既沙鍋米線好食好多,總之就好正啦! (返到來香港咁耐都冇食過雲南米線啦,香港個啲同雲南當地既米線完全冇得比)呢間小餐廳除左我之外就冇其他客人,老闆娘都出左來坐低同我傾計,講下大理又 講下香港,佢好晌往香港呢啲大城市生活,但其實好多城市人係調轉更喜歡農村簡單生活呢 食完後繼續睇靚景;太陽伯伯準備落山啦,我個影都變得咁長 太陽已經落到山邊!可能因為山太高,太陽唔會好似落到海平面咁,出現一個紅色好似咸蛋黃一樣既太陽 點擊圖片放大 +2 越落越低啦 點擊圖片放大 走入去田地影下相先 水面好似到見到少少金黃色 點擊圖片放大 +2 啲秧插得好整齊!原來農夫會用線一行行逐枝逐枝秧插落去,呢份工作真係好辛苦,我一向都好尊敬默默為社會服務既農夫們 點擊圖片放大 +4 唔同既綠色,好靚丫 點擊圖片放大 倒影都好靚 去到7:40,太陽終於落左山啦,冇左陽光四圍開始變暗 望向對岸,見到有陽光射係山上面? 點擊圖片放大 +2 當時見到對面山頂發出一行金光,感覺就好似梅里雪山既日照金山(山頂唔係白色當然就冇梅里雪山咁金黃啦),即刻走出去海邊試下影落黎;只可惜技術有限,影唔出當時真正顏色出來,美景唯有用眼欣賞 大約十分鐘,所有陽光已經冇晒 點擊圖片放大 襯仲未真正天黑,把握時間影多幾張相然後就離開啦 點擊圖片放大 +4 係離開時,有位係喜洲教書既老師來到海邊準備影月亮,仲提醒我呢道月亮好靚好值得留多一陣欣賞一下洱海月色;唔講都唔記得大理「風花雪月」之中洱海月都有份架,所以就等多陣睇睇洱海月係點既先 八點過後月亮開始慢慢升起 點擊圖片放大 見到洱海倒影出來既洱海月!但呢個位置唔係咁好,好多水草阻住,倒影唔係咁清晰 所以就行去另一個位,睇下邊道可以行出海邊,要接近洱海先得;我就揀左呢道,穿過啲樹行到海邊(如果沿環海西路向前行多一兩分鐘就係海邊,當時我唔知所以先選擇穿過小小樹林,行樹林如果唔睇路就會好易踩落水) 呢個位唔係最好,但都好過冇啦,一路望住月亮等天黑 點擊圖片放大 +3 圓碌碌既月亮都幾靚丫 月亮越升越高就越難影到洱海中既月亮倒影,影多幾張就算啦唔影lu,細心享受呢個洱海月色仲好啦 時間去到九點,喜洲呢道夜晚咩都冇,但又冇理由咁早返客棧訓覺架?咁無聊所以就去食多碗米線!今次食既唔係平時食開既湯米線,而係食我未食過既涼拌米線, 第一次見米線有呢個食法!6蚊蜿涼拌米線又係咁足料,配料堆到山咁高,食落凍冰冰比熱米線更易入口,酸酸地辣辣地仲會越食越開胃,估唔到呢間小小店鋪造出 來既米線比起好多地方更好食 食完都冇野好做就返去客棧啦;負責打理客棧既姨姨同佢既朋友係花園開緊餐,見我返來就邀請的一齊食,我就試左呢個大理特產乳扇,有烤過既乳扇亦都有冇烤過 既;冇烤過既乳扇食落味道好似芝士,有好香奶味,同芝士分別就係乳扇硬好多,食落口好似食野一塊硬既芝士;而烤過既乳扇食落香口啲,但就冇咁重奶味;客棧 姨姨同朋友真係好好客,當我返到客棧時竟然歡迎我返來,當時真係比佢地嚇一嚇,之後先知道原來平時好少好少香港人來到喜洲海邊,所以佢地特別開心,哈哈 ^^ 客棧一樓有一個小小平台可以欣賞風景 月亮又光又圓,照到大地好光,睇野好清楚;唔通呢個就係真正既曬月光 可惜天上既星星睇唔清楚呢... 地下全層都比我霸晒,今晚又可以舒舒服服訓覺啦