【Day3】箱根秋色。強羅公園﹑大涌谷﹑御殿場outlets

< 東京﹑箱根﹑飯能8天遊 >

第三天

箱根位於神奈川縣西部,好多地方都係山上,天氣比東京市區凍,樹葉都早變色,但唔知係唔係樹葉太早變色呢?琴日見既好多葉都係灰灰地,希望今日見到多啲紅色既紅葉啦

訓醒望出窗外,原來窗邊已經有紅葉,琴晚天黑見唔到;起身刷完牙第一時間就緊係去浸溫泉,今日唔趕時間可以慢慢浸

早餐有麵包提供,新鮮麵包係好好食

今日天氣唔太好,等到差唔多十點先check out;一步出酒店,發現秋天氣息好濃烈,望住唔同顏色既樹心情特別好

係門口等車同時四圍睇下樹葉,就算只係路邊本應唔起眼既風景都變得好靚好靚

去返「小涌園」轉車,呢道一樣好多紅葉,好靚好靚好靚

巴士都有天窗

唔知點解覺得呢個轉盤好神奇,巴士開上去就會自動調頭

去到「強羅公園」落車;一落車就覺得呢道好靚,成條街都係紅葉

有pass免費入場;我由山上入口入去,由上向下行冇咁辛苦,而且由上面望風景開揚啲

呢道唔洗講風景一定靚啦!唔知點形容好!

有噴水池襯托係唔係更靚呢?

好多唔同顏色

慢慢行,向山下行去

終於行到去出口,見到咁多紅葉已經好滿足,總算冇黎錯箱根

今次呢塊有七片葉

行返落去強羅站,依然周街都係紅葉!

好熱好熱好熱

今日天氣唔好都唔知去邊好,當時突然有個諗法,見到頭先有小小雲海出現,心諗山上會唔會有機會見到靚雲海呢?所以就想博一博上山睇下有冇靚景;再次坐上登山纜車上山,今日冇琴日咁多人,可以欣賞到纜車兩旁紅葉

上到早雲山站見到遠處有小小雲海,再坐空中纜車上山睇下有冇更靚既先

啲雲聚晒係下面,上面反而冇

去到大涌谷附近變得好大霧,而且出面超大風,聽到好似平時八號風球咁大既風聲!但部纜車行得出奇地平穩,就好似平時一樣搖都冇搖,而家先發覺纜車用兩條鋼纜係呢個原因,就算咁大風都超穩定

山上大霧視野好差,好彩琴日睇左靚景咋

好多黑雞蛋!

上到黎冇野睇又坐返纜車落去,車上咩都見唔到

落返黎早雲山站有小小紅葉睇,最重要係冇咁大霧可以睇到野

而且仲疑似睇到雲海,不過位置唔係咁岩睇得唔清楚,算啦

坐纜車去到「公園上站」落車(中途站落車要睇清楚左右,落錯方向想過返對面我諗要穿過部車先得),一出黎就係箱根美術館,呢道係一個好熱門既觀賞紅葉地點,就咁望入去都見到勁多紅葉

美術館入埸費唔平,雨又越落越大,而且我又唔係非常鐘意影相入到去都冇特別野好影,諗諗下都係唔入去lu

本來箱根仲有地方想去,但咁既天氣去黎都冇用,搵地方避雨仲好,係諗緊去邊既時候有巴士到站,總站係御殿場outlet,咁就上車去左先算;呢部巴士好多時間都係行山路唔行大路,反而睇多左好多沿途山區紅葉風景,感覺好好

坐左好耐車終於黎到,呢個話晒係大outlet有超多鋪頭,可惜冇興趣買野只係隨意行行

呢道都好山區feel

落雨落到唔想行就入餐廳食野,第一次見outlet咁熱鬧,之前去東京同大阪outlet都係冇咩人

我鐘意食既咖喱豬扒飯

食完飯冇再落雨,而且仲有藍天,估唔到臨天黑天氣會變好,但已經太遲冇其他地方可以去

成個outlet得呢間吸引小小,當時最新出既Pokémon Sun & Moon

自己冇野岩買,難得黎到都幫屋企人買下野啦,好過空手而回

六點前去返巴士站,等車返轉頭lu

返到強羅轉鐵路落山

呢個時間箱根已經變得好靜,只有好少人坐車

同去程一樣,經過箱根湯本﹑小田原,再坐車返新宿

到新宿再坐山手線到今晚住既池袋;由outlet到池袋用左四個鐘,好彩係車好好訓,時間好快過

住既地方好近JR站,放低野攤左陣就出去搵地方開餐;首先行去附近既無敵家,見咁多人排隊認輸算,繼續去搵其他野食

十一點係日本黎講應該算好夜,我想食既拉麵店已經關晒門,今晚都唔知食咩好,行過啲餐廳又冇咩野想食,最後都係行返轉頭算lu

最後路過松屋入左去食牛肉飯,起碼自己鐘意食

今次係東京冇住青年旅舍冇住酒店,試左airbnb,原因係想試下自己煮野食,仲有就係睇得動漫多好想試下日本人既屋係唔係同想像中一樣;住過之後感覺係開心過住酒店,同我印象中既日本民居好相似,住得好舒服,至於自己煮野食既願望就失敗左,因為懶洗野亦都懶得煮…

睡房前有個小廳,將所有行李拎晒出黎都得,好多位

梳化可以變做床,如果多人住係抵既,我少人住價錢就同酒店差唔多,但感覺係好唔同

今次呢間房住落我好滿意,不過下次未必會再試airbnb,今次第一次用差啲出事!早一個月book好左,我已經揀左呢間好多好評架啦,不過出發前一星期屋主玩失蹤,無論message﹑電郵﹑電話都搵佢唔到!我連地址都唔知搵唔到佢就冇得住!試過兩次打香港airbnb hotline又飛左去美國hotline,美國個邊話處理唔到比左電話我叫我自己打去日本hotline!好彩係網上留左言比airbnb後有講國語既職員聯絡我幫手,又真係比佢搵到屋主出黎,但已經係出發前兩三日既事…難得呢個職員好好人,入住前後都有跟進情況,起碼有得住先,不過出發前咁樣搞一搞真係好煩,仲浪費我成百蚊長途電話費,如果當時冇地方住都唔知點算!!!

 

 

This entry was posted in 日本 and tagged , . Bookmark the permalink.
2 Responses to 【Day3】箱根秋色。強羅公園﹑大涌谷﹑御殿場outlets
  1. YEETING says:

    雖然我而家係日本
    但我覺得我要睇返你D BLOG去玩日本囉!
    哈哈!

Comments are closed.