係寫南歐前寫下d想寫既無聊野先~連續睇左咁多遊記都有d攰啦,轉轉口味寫返my飛佛飲食先! 早前有個日本綜藝節目表示,世界劣食排行國家由英國當仁不讓高據首位! 小弟不少居英及英國交流生朋友對此深表讚同 -------- 「英國d野真係好x難食ga!!!!!!」「唔係人食ga!」「英國佬都無味蕾ge」 但人始終要食飯,於英國時行程緊密,買餸煮飯的機會唔多,加上一場嚟到,點都要發揮大無畏精神試下某d英國名菜ge! 呢一篇就係講下有d咩小弟係英國食過覺得幾好或性價比不錯的食肆食物! 由於地雷眾多,所以都係要靠好友們指點迷津,於此地獄般的美食沙漠上尋找稀世綠洲............... (因sd card壞左,部份圖片唯有取自網上,請諒!) 第一間係在亞洲遊客中極具人氣既名店“Burger & Lobster”! 店中所見,幾乎超過6成係亞洲人,聽廣東話多過英文 此店只供應4款食物 ------ 燒龍蝦、蒸龍蝦、龍蝦三文治和原味漢堡包 4樣都好似好吸引.......但要食最濃郁最香口既鮮味,當然係燒龍蝦啦! 手臂咁長既原隻燒龍蝦,以火焰烘乾水多餘水份令鮮味更突出,只要蝦靚又唔燒過龍基本上都100℅好味(呢句同“食餅有餅味”有異曲同工之妙!) 呢度無令我失望~蝦肉鮮味有彈性,微帶焦香,配埋香草牛油汁的確一流! 唔想當眾煎皮拆骨或顧儀態既可選龍蝦三文治,味道仍是一流,但份量較少 聽聞漢堡包亦十分不錯! 不過呢度係英國,靚既漢堡包周圍都係,唔需要係半島酒店食揚州炒飯呀~ 埋單連飲品,每人約港幣$300元,如果以英國出街食飯嚟講,性價比算好高ga la! 不過........我都係鐘意芝士焗龍蝦伊麵底多d~ 點擊圖片放大 +2 (英國老友路and當時剛相識的泰國及越南朋友~) 漢堡包係英美國家主食,基本上求其合埋眼撞入一間店都會有Hamburger! 而呢間Patty and Bun,卻係少數門口大排長龍既漢堡包店,甚至英國人認為best of London tim! 小店格局,大型份量,更可選肉的生熟程度,一啖咬落d落肉汁好似刀插大脾d血咁把把聲標出嚟! 推薦羊肉漢堡係羊肉愛好者必點食物! 羊肉味濃,微膻,好食左個羊腩煲走煲咁! 見隔離位d薯條好似都not bad~水牛雞翼則可以跳過啦 價格方面 : 兩個人,兩個包兩杯drinks一客雞翼,每人港幣$150,英國老友話非常抵! 而我既意見係,比較此best of London,香港既漢堡小店皇者Burgeroom同The Big Bite一d都唔會輸! 點擊圖片放大 +3 另外係倫敦既Covent market都可以搵到大量特式街邊檔,魚ar肉ar雞ar鴨ar人ar..........咁market一定有人ga la!~ 我試左個鴨肉卷,係就成£5-6貴d,但味道上佳,遊客lunch time嚟呢度搵食都唔錯!(如有其他market還望告之~) 點擊圖片放大 Wetherspoon同埋Yates呢兩間野係全國連鎖式餐廳,似x家樂同x快活咁風格相似內容相近,而且一樣會互相開係附近頂到“行”! Irish pub風格,自己揀枱坐底,睇岩食咩去吧枱點餐,報上枱號後就可安坐等食物送上 食物種類為正宗英式,burger、hot dog、pie、pasta、roster beef、all day breakfast等等 價格比其他餐廳便宜,平均約£4至£9即港幣50至100左右,份量大,味道亦算不錯,為高性價比之選!所以我係英國兩間加加埋埋起碼食左4餐! 再細評d既話,薯條粗厚有薯味,酸甜意粉醒神開胃,all day breakfast又平又足料,Steak and kidney pudding皮身鬆化但個味腥到暈,炒蛋全熟無蛋味,香腸又乾又細鹹到暈,咖哩魚蛋無魚味,豬紅一夾就散........... ee點解我寫寫下變左彈ge?? hey你點會預x家樂x快活全部都好味ga,點都有d伏ge! 順帶一提,呢度都係睇英超既好地方呢! 點擊圖片放大 +5 (Steak and kidney pudding) 點擊圖片放大 英國美食一定要提Fish and Chips啦! 舉世知名炸魚薯條,聽個名都覺呢個組合無得輸! 我係愛丁堡一間話超級出名既炸魚外賣店要左一份,即叫即炸,到街外搵左個靚位,一打開香氣四溢,10寸平板咁大既魚柳蘇蘇脆脆的樣子,真係睇到都食指大動! 滿懷期待的大咬一口,輕咽慢嚼後,嘴唇不禁吐出一句 : 「他娘親的兒子呀,從未食過咁難食既食物!!!!」 炸粉厚魚身薄,又鞋又腥,魚肉無汁乾過罐頭! 名乎其實金玉其外,敗絮其中! 再試一試薯條......應該係薯棒先岩!唔脆,無味! 同埋唔係度度都有他他醬沙律醬提供,好似我咁麻麻地茄汁既,唔去超市買支頂好牌真係唔使食! of coz you can try當地既名產Brown sauce,味似強酸喼汁,唔係個個頂得順的...... 結果盒野我食到一半就頂唔順放棄了,成£7.5 ga .......... 後來我哎也契女同我講,Fish and Chip其實分為Cod and Haddock兩種,後者會魚味濃d好味d貴d 於是我到Durham時試一間佢話好味的,要左Haddock,感覺上的確好左,但都係未見非常突出!我決定放棄再尋找了! 有朋友話可能澳洲既會好味d,但如要我再食英國既.......可唔可以要M記魚柳包算啦? 點擊圖片放大 另外如果真係想再慳錢d,有d小食店and熟肉火腿店都會有即製既簡單三文治賣,例如煙肉蛋包咁,都係£1至£3左右(以愛丁堡Queen street為例) 而超市都會有d肉批or自焗pizza於深夜特價出售,自己煮既話肉類平d的,或者乾脆公仔麵啦.....好又一餐唔好又一餐.... 其他食物如墨西哥卷係平價飽肚之選,蘇格蘭既羊雜碎Haggis我覺得都可以一試! 但傳說中咸爺至愛既黑暗料理皇者鰻魚凍Jellied eels,請恕小弟無膽打大佬呀................ (愛丁堡Queen street小食店) (熟肉火腿店) (Haggis,唔係個個頂得住) (鰻魚凍Jellied eels,個樣真係吸引到呢.........) 其實呢篇我寫寫下好想改為寫劣食,好似有趣好多......不過既然無乜食過就算la~ Anyway,由一個只係英國玩左十幾日既旅客寫英國飲食好似有d以偏蓋全,不過我真係想記一下於此飲食特色異常獨特國家既所吃所聞! 當聊以自娛好了,不用太認真!(寫呢d文章好敏感ga,梗係帶定頭盔先啦!) 呢個島國咁大又咁多米芝蓮名廚,應該仲有好多好野食,歡迎各位網友提供線報呢! ===================================== 補完此blog上未成文的相片和無聊閒事: My Facebook Page : https://www.facebook.com/Garcia.in.Germany ,多多支持呀!~