我其實完全唔明，點解咁多人覺得我去新加坡踩單車係一件怪事? 新加坡地方細交通貴，要周圍走周圍睇既最佳方法唔就係做個飆速宅男咩? 況且做過功課，知道新加坡既單車徑非常完善，仲有24小時的單車店，配套咁好點可以唔踩踩? 我原本打算環島ga! 都係9個鐘左右g ma~資料話~ 可惜既係，當我認真計一計我剩底既空餘時間，只係得返最後一日12點至4點ja……….. 環島不成，唯有改變策略，據報紙所講由Marina Bay既魚尾獅出發踩到East Coast Park來回啦~ (警告!本文涉及大量驚嚇自拍，有心臟病及睇唔慣核突野人士敬請注意!) 平時唔睇蘋果，但呢篇的確係有用http://hk.apple.nextmedia.com/ketchup/art/20160125/19463196 打邊爐最緊要有個爐，踩單車最緊要有架車 根據報章所講East Coast Park設有單車店就好似大埔海濱公園咁方便人踩來回，仲要係24小時還車tim~ 但East Coast Park仲衰過大埔海濱公園ge係由最近火車站行去都要成半個鐘! 如果好似我咁今晚就飛走既仲大鑊，用香港地點lai比喻，就等於去青衣租單車走一轉荃灣來回還車再返荃灣ge酒店囉行李先去機場! 邊有咁on居ga!? 好彩google顯靈，「荃灣」有單車鋪ar!!!!! 呢間The Bicycle Hut非常市中心，網上評價都唔錯~ 儘管最平既都要港幣約$120 3hours，但以新加坡呢個百物騰貴既地方lai講，百零蚊玩足成個下晝，算係咁la~ (就係呢間) (老闆勁好人，教哂我條路點行同有咩注意，連邊度有補給都照顧埋，勁細心!) 今日太陽咁猛，氣溫超過35度，又熱又乾，我得副超無太陽油，睇lai都會曬傷ga la，但既來之則安之，唔好理~好! 出發! 第一站去左新加坡既地標魚尾獅先! 呢個地方應該都唔使我介紹，我只係好奇點解遊客總係鐘意係條水柱前面掹大個口或者用手托住 諗真d，呢條野係屬於怪物一類，即係同異形同level……..飲異形口水!!!?????? 點擊圖片放大 +2 (似乎係日本既youtuber，見佢試緊直播) 點擊圖片放大 +6 (人太多，正正經經影張相走人算了) 之後沿海前行，經過前日行過既Art Zoo，向摩天輪進發 點擊圖片放大 +2 唔好以為我真係男人的浪漫，單拖毒自天荒地老轉下個摩天輪先得ga 摩天輪只係一個座標，重點係位於其後方的F-1賽車場~ Wa聽聞可以直接踩落賽車場用單車玩Top Gear wor!! 等我比新加坡人見識下咩係「冼拿轉生」啦!!!!! ee………咁多鐵閘ge…………..好似…….維修緊wor……… 點擊圖片放大 +3 既然冼拿轉唔到生，唯有向下個目的地前進啦~ Nicoll Highway地鐵站外沿岸係一片非常雅致的綠化草地~椰林樹影，係野餐談心既好地方~ 如果時間許可，我都想係度飲個椰青食件蛋治過一個悠閒下午ar~ 點擊圖片放大 +3 經過另一大建築Singapore Indoor Stadium 外形巨大而觸目，亦都顯示出呢個地方既重要性! 真係好緊要的，因為終於可以係呢度釋放你既膀胱壓力了~ 點擊圖片放大 減壓完畢就可以過小橋到對面的豪華住宅區，逆時針繼續走Marina Bay岸邊，向堤壩Marina Barrage前進了~ 值得一提既係呢個岸邊係一條非常非常長闊既平坦大道，閒閒地7-8架單車打橫一字型排開再合埋眼衝刺都無問題! 咁當然會唔會撞瓜D跑步人士就另一回事啦 點擊圖片放大 +3 Marina Barrage其實係一條大水壩，用以擋開新加坡海峽的海水以免水浸 廢話! 水壩根本就係咁用ga la! 所以對旅客們既功用，就係呢處可以一次過睇哂數個新加坡既新興重要景點~ 即係大包圍一張相攪掂~ 又係另一個唔踩單車就好難去既地方~ 風景係唔錯的，但係真係好Q熱……好彩都有個遮蔭位抖抖~ 點擊圖片放大 +4 避暑一輪休息夠，係時候繼續上路啦~ 因為天氣太熱，為防中暑我沿途係咁飲水，樽內現已所剩無幾 唔緊要ge~ 只要穿過Gardens By The Bay East，仲有約半個鐘就會到達East Coast Park 補給ga la~行啦~ 一離開水壩轉返入寬闊岸邊路，突然feel到塊面有水 邊個吐口水!!?? 唔係wor，水點越來越多，似落雨wor師兄…….. 10秒後，已經堅係落緊雨! 唔對路，即刻轉入花園內既樹底避避先! 說時遲那時快，架車停低果下已經由落雨變成落大雨了 而當時既我只能夠講一句 : 唉濕x哂 (副鏡已經全部都係水) (仔細d睇後面，係大雨緊的!) 5分鐘後，雨勢轉細，繼續上路~ 但各位睇開我個blog既朋友都知道-------我邊有咁好運的呢~ 1分鐘後突然由浪漫的細雨帶風變成痴孖筋的暴雨狂風!!!!!! 約7分鐘後我先搵到洗手間作第2次避雨 如果話之前係唉濕x哂，而家既我就係唉濕x到透哂! 根本同比人淋完水無分別…… 問題來了，而家我卡左路線既中間位，就咁睇場雨完全無短期內減弱既跡象，我又唔可以等幾粒鐘，飛機起飛都未還到車咪大檸樂!? 咁只有兩個選擇 : 一係踩返轉頭15分鐘過水壩對面避雨，二係就繼續前進，頂唔順時先搵棵高樹避雨 既然兩個choice都係會再濕勁d，男人lai ga嗎! 梗係前進好過後退啦! 一咬牙，耐著濕冷的身體，向East Coast Park繼續衝刺! 你以為反正都濕左就幾大雨都無乜所謂呢~我都以為係ar~但少年你太年輕了~ 出車5分鐘後，暴雨已成為黑雨，四周一片汪洋，我既狀態都由「被人淋完水」變成「係瀑布沖完水」 身上所有衣物完全貼身，寒風吹過又冷又凍，雨水不停流入及打進眼中，儘管在天極昏黑但都要帶上黑超擋雨，但都只能勉強掙開半隻單眼行車，連頭上gel all back既髮泥都沖到無影無縱瞬間變柒頭! 仲要我今日著既係白色短袖衫，大家就可以幻想得到，大雨中一個帶住黑超，透肉露點突肚腩形同半裸既死肥仔，在洪水般的雨勢下仍勇敢前進，同大自然渾然為一，個畫面係幾咁英烈! 幾咁引人犯罪! 最大鑊係此路段極為平坦，想搵棵枝葉茂盛既大樹伯伯遮遮頭都無! 我唯一可以做ge，就係處之泰然地默默前進，落雨不怕落雪也不怕，成盤係血當佢無事，但係夢想中的彼岸為何還未到………… 點解!!!!!!!明明我出車時仲係一條太陽燒粟米，點會係兩個鐘頭內會成一舊濕水大毛巾ga????? 點擊圖片放大 終於係雨中唔知過左幾耐，我終於嚟到目的地East Coast Park沙灘啦! 聽聞新加坡周邊海水污染嚴重，只有幾個海灘可以游下水，而當時亦的確有唔少星期日菲傭(係掛!?)係度玩水暢泳 但對於我嚟講，而家都同游完水無分別啦~~~~使鬼落去咩~~~~~ 於大樹下避避雨扭一扭件衫好過啦，一避雨又停雨la頂!!!!!! 點擊圖片放大 +4 雖然呢一程車囉命到爆，但總算成功到達目的地~都叫對自己有個交代~新加坡單車之行成功!!!! 陽光開始重現，係時候返去還車了~ 著返果件濕到透貼哂身既半白半黑恤衫上身……..無錯背脊已經係比濺起既泥整到全黑………. 凍到嘔，快d襯天氣好返d高速運動熱返個人先啦!!! 而個天總算待我不薄~ 當我原路踩返去岩岩fb live果個大雨位時，亳無懸念地有更大既雨係度等緊我la~~ 假如岩岩嚟果陣係係瀑布淋完出嚟，我回程既時候就係比條瀑布追住我嚟淋……… 算啦，我放棄了……… 點擊圖片放大 +6 終於，又比雨淋多一粒鐘既情況下，由堤壩穿過Gardens by the Bay，終於返到市中心金沙果邊，亦毫不意外地，天色放晴了~ 劉德華講過，希望雨水可以洗淨我既罪行，以我而家既狀態，殺人放火都應該無罪釋放啦! 點擊圖片放大 +8 滴住水返到去還車，身心俱疲，仲發現唔夠玻紙，要行兩、三個街口到Peninsula Plaza唱錢再行返轉頭(順帶一提我真係無諗過一個商場可以有堆田區既味道…….)，最後再行返酒店………… 果種全身濕透彷如無著衫、比街上人群側目歧視的狼狽，成個感覺，具體嚟講就好似下圖呢個樣……….. 點擊圖片放大 總括嚟講呢次單車之行都算經典啦! 自始之後我對任何無帶遮的下雨天都毫無感覺! 另外幾日後既我竟然無冷病，反而係曬傷左甩皮………. 同事話 :「阿鋒你黑左ge?」「係ar，裡面果層運勢外顯左」佢地以為我攪gag，其實我係講緊真話ga…………. 但諗深一層，就算我唔係而家咁淋到豬頭，應該都會變成紅燒豬頭………世事真係好難捉摸ar…….. Anyway啦，最後提大家一句 : 如果要係新加坡踩單車，天氣幾靚都好，點都要帶雨褸出門! 唔好好似我咁on居ar!!!!!! 係酒店囉返背包換件衫，時間差不多，係時候返香港，正式完結呢三日兩夜既快閃新加坡之旅~ 呢3日既行程我基本上係與一般新加坡遊客完全不同，咩牛車水馬食穀完全無去過，只係去見過下韓國明星，睇左場高爾夫，並置身於精靈花園及未來水世界，都算係一個幾特別既體驗~ (臨走時又倒過水) 點擊圖片放大 +3 最後都要再一次多謝UBlog、Eric果間公關公司同埋HSBC Women’s Champions 當局! 如果唔會有咁有趣既經歷，亦唔會知幾時先有機會嚟到新加坡~ 非常感謝! 好啦~下一個系列既遊記會回復返自己最擅長既背包窮遊~ 呢個真係……..窮到大乜鑊ar………….. 敬請期待!!!!! ================ Email : funggarcia@gmail.com Utravel Blog : https://blog.ulifestyle.com.hk/blogger/aeolusgarcia/ Instagram : https://www.instagram.com/fung_garcia/ DCFever - Fever Travel : http://www.dcfever.com/travel/utravelogue.php?id=799202 My Facebook Page : www.facebook.com/Garcia.in.Germany 請各位繼續多多支持呀!!!!!!!!!!!!!!!
